Aktiewe Of Onaktiewe Grondvoer?

Hoe meer jy van jou grondvoer en die werking daarvan in die onderwater wêreld weet, hoe beter kan jy dit toepas en gevolglik sal jou resultate verbeter. Dit kan met jou gerei en hoe dit gebruik word vergelyk word. As die nutsman nie weet hoe om ‘n spesifieke stuk gereedskap te gebruik of die voordele wat dit kan bied besef nie, kan hy nie sy taak vinnig en effektief verrig nie. Dieselfde met grondvoer - as jy die grondvoer wat jy gebruik ken, weet hoe om dit voor te berei en wat die reaksie daarvan in die water is, en oor ‘n basiese agtergrond van die spesie wat jy teiken beskik, sal jy meer vis in jou skepnet kry. Ken jou vis se wei gewoontes Hier onderskei ons tussen vis wat op die bodem of baie naby aan die bodem wei, en vis wat weg van die bodem wei en wat ook bekend staan as ‘op in die water wei’. Bodem weivisse sluit in karp, baber en moddervis. Op-in-die-water weivisse sluit in geelvis, graskarp en moggel. Kyk na ‘n vis se bek: ‘n bek wat na onder wys beteken dat die vis ‘n bodem weivis is, en ‘n bek wat vorentoe wys is tradisioneel ‘n spesie wat op-in-die-water wei. Dis belangrik om te besef dat meeste tradisionele bodem weivisse ook op in die water kan wei indien omstandighede dit vereis. So kan karp, kurper en baber byvoorbeeld op-in-die-water water gevang word, en dit gebeur ook baie dat graskarp en geelvis op die bodem gevang word. Hou altyd in gedagte watter spesie jy teiken en pas jou grondvoer daarby aan. Om bodem weivisse te teiken is ‘n dooie of onaktiewe grondvoer nodig. Om op-in-die-water-weivisse te teiken moet jy ‘n voer gebruik wat lewendig of aktief is. Lees die omstandighede reg Weet wat by die water aangaan. Kyk na alles wat gebeur wanneer jy hengel en interpreteer dit, en dan baie belangrik – pas dan aan volgens dit wat jy waarneem. Nou praat ons nie net noodwendig van konvensionele oewerhengel nie, nee ons hou ook boot, spesiekarp, feeder en match in gedagte. Soms gebeur dit ook dat lugdruk ‘n invloed op vis se wei gewoontes het en kan jy byvoorbeeld sukkel om karp op die bodem te vang. In hierdie situasie moet jy dus ‘n aktiewe voer gebruik om die karp in ‘n spesifieke teikenarea te probeer hou om hulle daar te kan vang. Wanneer die wind byvoorbeeld matig tot sterk waai is die kanse dat jy graskarp op die bodem sal vang baie groter as wanneer dit windstil is. In hierdie geval moet jy dus ‘n swaarder en onaktiewe voer gebruik wat stiller op die bodem sal lê. Watter grondvoer vir watter vis? Hierdie antwoord is heel eenvoudig: gebruik ‘n aktiewe voer vir vis wat op in die water wei, en ‘n onaktiewe grondvoer vir vis wat op die bodem wei. Onthou dat die verkeerde tipe voer jou resultate kan beïnvloed. ‘n Aktiewe voer vir bodemvisse mag heel moontlik die vis weg neem van die voerarea af indien hulle agter die partikels wat op-in-die-water beweeg, aan swem. Die gebruik van ‘n dooie voer vir kurper wat op-in-die-water wei sal amper geen reaksie tot gevolg hê nie.