Amasone Rooistert Baber

Monster varswatervisse van die wêreld Die Amasone Rooistertbaber (Phractocephalus hemioliopterus) is ‘n uitsonderlike mooi vis - selde dat so iets van ‘n baber gesê word! Die Amasone Rooistertbaber is inheems in die Amasone in Suid-Amerika en meer spesifiek in die Orinoco en Essequibo riviere. Alhoewel die visse redelik volop is het argeoloë ‘n verwante spesie, P. nassi, wat uitgesterf het, se fossiele ontdek. Die verwante spesie het sowat 13.5 miljoen jare terug geleef. Hierdie vissoort word glad nie deur die plaaslike bevolking geteiken nie bloot omdat hulle dit nie eet nie want die vleis het ‘n swart kleur. Onder sporthengelaars egter is hierdie ‘n baie gesogde vis. Die grootste eksemplaar tot nog aangeteken is ‘n vis van 1.8m lank met ‘n massa van 80kg. Die huidige IGFA wêreldrekord van 56kg word gehou deur ‘n Brasiliaan. Amasone Rooistertbabers laat my baie dink aan die “varkhond” onder visse. Dit is bonkig, baie gehard, baie sterk en het ook ‘n sterk uithouvermoë. As jy die visse van nader beskou sal jy oplet dat die helfte van die vis (bokant), ‘n grys tot donker grys kleur het en die onderste helfte oorwegend wit is. Dit is die perfekste kamoeflering wat ‘n vis kan hê, soos diè van ‘n Witdoodshaai. Van bo of van onder in die water gesien sal dit met die omgewing insmelt. Tog het die visse net agter die borsvinne aan weerskante ‘n prominente swart vlek. Die twee rugvinne asook die stertvin is dan afgerond met ‘n rooi kleur. Die visse het ‘n groot kop en ook ‘n groot bek met ses snorbaarde. Die doel van die snorbaarde is om die geringste beweging of trillings in die water gou waar te neem en dan te ondersoek. Elders in die wêreld is die visse baie gewild as ‘n akwarium spesie. Handel in die klein vissies lewer dan ook baie geld op vir die verspreiders. My ondervinding met die “Amazon Redtail Catfish” Ek en Brandon het met ons Thailand ekskursie soveel moontlik spesies probeer teiken. Met sardien as aas kan die meeste roofvis gevang word. Ons wou baie graag ‘n “Amazon redtail catfish” vang en was natuurlik baie opgewonde toe ons dit die eerste keer vang! Vooraf het ons heelwat “Asian Redtail Catfish” gevang wat inheems in Thailand is en glad nie so ‘n harde bakleier as die Amasone weergawe nie. Die Asiese Rooistert is ‘n lang, slap tipe vis met vreeslike lang snorbaarde, tot ‘n meter per snorbaard. Elke keer wat ons ‘n Amasone Rooistert aangehad het, het ons gedink dis ‘n verskriklike sterk gedierte gemeet aan die vis se baklei vermoë. Die visse soek dadelik struktuur en is geweldig sterk. Hulle is ook gereeld eerste by die aas en ons het dit later as ‘n “lastige-vraatsige” vis ervaar wat ons erg uitgeput het! *Ervaar jou eie avonture met hierdie monstervisse by www.gillhamsfishingresorts