Oewerhengel – Begin met ‘n Plan!

Om 'n plan saam te stel is jou beste begin punt vir 'n kompeterende oewerhengel seisoen en heel bo aan die lys moet OEFENING staan. Hoe meer jy by die water kan uitkom hoe beter vir jou seisoen se hengel. Nuwe tendense! Terwyl ons lekker langs die water sit en vis vang is daar skeppende hengelaars by besighede wat konstant besig is om nuwe produkte vir die hengelmark te vervaardig. Innoverende uitvindsels om ons resultate langs die water te verbeter word gou bekendgemaak en dit is belangrik om daarvan te weet sodat ons kan vasstel of dit 'n plek in ons mondering moet kry en of dit net nog 'n produk is waarvan ons alreeds genoeg kennis dra. Gebruik goeie voer! Dit is uiters belangrik om die beste kwaliteit voer te gebruik om sodoende die varste, mees aanloklikste aas as moontlik aan die visse te bied. 'n Tipiese 2kg sakkie voer moet altyd eers mooi geskud en deeglik gemeng word voor die droë bestanddele uitgegooi word. Onthou vanweë ons pragtige paaie skud die voer agter in die bakkie wat maak dat die growwer bestanddele bo kom lê en die feiner bestanddele onder gaan lê. Volg altyd die gebruiksaanwysings noukeurig! Dn kan die perfekte voerbal gevorm word wat sag is, lekker ruik en oplos op die bodem. My goue reël vir sukses is dat die voer perfek moet wees, sag, vars en geurig. Deeg, floaties, wurms! Dit is werklik al wat nodig is om as aas op die hoek te gebruik - die voer doen hoofsaaklik die meeste werk om die vis te vang. 'n Gewone soet wit deeg (SWD) sonder enige geure soos amandel of knoffel vang die vis omdat dit ure lank op die hoek kan bly. Die feit dat dit wit is help dit ook om uit te staan op die bodem. 'n Klein bietjie suiker in die deeg maak dit meer elasties en minder bros sodat mens makliker met dit kan werk (suiker het wel nie veel te doen met die vang van die vis nie!). Floaties vang baie vis omdat dit die hoek effens optel van die bodem af en uitstaan bo die ander partikels; 'n floatie kan ook maklik gegeur en gekleur word om nog meer uit te staan. Wurms is belangrik omdat dit 'n baie goeie natuurlike aas is. Enige vis sal 'n wurm vreet en daarom kan ‘n wurm altyd met selfvertrou aan die hoek gehaak word. Maak seker om die wurm in die lengte op die hoek te ryg sodat die wurm so natuurlik as moontlik bly. Kappies (backings) is maar 'n afstammeling van 'n degie en is nie noodsaaklik nie. Sommige hengelaars wat nie met floaties hengel nie is lief daarvoor om 'n deeg en kappie aan die hoek se sit om sodoende die vis te vorseer om die aas op die bodem op te tel. Dit sorg gewoonlik dat die hoek die vis beter en dieper in die bek haak. Dips! As jou voer reg is en jou aas sorgvuldig en netjies aangesit is, jou werpvaardighede uitstekend is en jou gerei gepas is vir die omstandighede, dan behoort jy sakke vol vis te vang (en dit sê ek uit ervaring). Geure en kleure is nie noodsaaklik om baie vis te vang nie, daarom moet jou aandag op diè aspek heel laaste lê. Bemeester eers al die ander aspekte voordat jy met geure en kleure begin rondspeel, dit sal dan ook makliker wees om te sien wat werk en wat nie werk nie. In Suid-Afrika egter oorheers die dip geur en kleur tendens ons hengel en meeste hengelaars dink die vis het stilgeraak omdat hy/sy nie die regte dip op die bal gesit het nie... klink dit bekend? Die heel beste raad wat ek enige hengelaar kan gee is om die werp vaardighede uiters hard te oefen met sagte, vars, perfek aangemaakte voer, netjiese aanbiedinge van aas op die hoeke en aanpasbaarheid volgens die dag se omstandighede sonder om slap te lê op enige van die bogenoemde. Na dit alles egter is dit so dat dips wel ‘n plek en dit maak die hengel interessant. Die belangrikste aspek van dips is om sagte en harde geure te identifiseer en te kombineer. Hengelaars praat altyd van 'n “caller” en 'n “keeper” en dit is wel so: 'n harde geur lok die visse van ver af en 'n sagter geur hou die vis daar, maar onthou net die harde geur gaan nie weg wanneer die vis daar opdaag nie so wend die harder geure maar minder aan en die sagter geure meer mildelik.