Wanneer die land weer oop is vir hengel… Bivandedam se Karpuitstappie

Al wat ons wel weet is dat die dam nie baie toeganklik is nie en dat ons heel waarskynlik nie by die regte areas sal uitkom met enige voertuig nie. Die dam is propvol en loop oor by die damwal, wat beteken oral, reg rondom is die water tot in die gras en nêrens is daar ’n stukkie grond oop nie. Die beste manier wat ons hiervan ’n sukses kon maak, is om met ’n boot te gaan en al die kamptoerusting daarmee karwei tot op die aangewese oewer. Hierdie oefening opsigself was glad nie maklik nie en ons het ’n hele paar uur spandeer om ’n oewer te kry waar ons toegang tot geskikte water het en wat semi-leefbaar is. Die veld is ruig en die gras is skouerhoogte. Dawie, die vriendelike oordbestuurder se hande staan gelukkig vir niks verkeerd nie en hy spring vinnig in, reël dat hy van sy manne met die boot oorbring en sny vir ons so ’n stukkie kampspasie oop. Dit werk goed en ons kon kamp opslaan. Verder kry ons alles gereed, identifiseer ’n paar areas, voer dit met Tigernuts, gekookte witmielies en boilies. Spesiekarphengel is ’n langdurige affêre van wag en kyk, herlaai, voer en wag en kyk verder. Volgens die fundis is dit belangrik om nie te vinnig en te gereeld te karring aan die aas wat lê en wag vir die ou grotes nie. Vir my is dit maar moeilik, en ek moes iets kry om mee besig te bly tydens die wag. Vanweë die spasie beperking het ek maar net die belangrikste items van my feedergerei saamgesleep. Die gerief van ’n seatbox en staander en alles was ons natuurlik nie beskore nie, maar dit is eintlik glad nie nodig nie. ’n Stok en katrol, met ’n feeder en hoek, saamgesmee met basiese aas en twee oewerpenne is eintlik al wat nodig is. Nou ja, so ’n paar dae langs die water is natuurlik ’n unieke geleentheid om nuwe vriende te maak. So beland ek en die videograaf van GT Productions op die oewer en deel heelwat interessante oomblikke en kennis rondom hengel en die lewe in die geheel. Avaran van Niekerk is nie net ’n vaardige videograaf en redakteur nie, maar is ook lief vir die buitelewe, kamp en hengel. Nadat al die karpstokke in is en ons begin met die wag, haal ek ’n 12-voet feederstok uit en steek twee penne in die grond, gryp ’n kampstoel en slaan ’n klompie voer aanmekaar om saam met ’n blikkie mieliepitte te hengel. Die water is baie diep hier vlak voor ons, maar ook vol bome en struktuur teen die walle van die ou rivier. Dis nie sommer net vir ingooi nie, en ek spandeer goeie tyd om ’n oop plekkie voor ons in die water te vind. Avaran aanskou die gedoente net en vra nuuskierig ’n paar vrae oor feederhengel. Ek besluit om in so vier meter water te hengel, wat slegs 15 meter van die kant af is. Die katrol word mooi ingehaak en ek gooi so 10 feeders vol fyn Super Cast met heelwat pitmielies in. Na sowat ’n halfuur kry ek die eerste indikasie en ons is opgewonde dat daar wel vis hier naby is. As jy in die boendoes gaan hengel langs ’n vol dam, help dit as die vriendelike oordbestuurder die manne met die "brushcutters" per boot aanry om dit so effens begaanbaar te maak. Elke nou en dan haak die hoekie vas in die struktuur en ek verloor op ’n stadium sommer alles. Die oplossing is ’n kleiner hoek en dunner hoeklyn, sodat die hoek eerder breek. Met die derde gooi buig die punt sommer so ’n boog en met die vasslaan stroop die vis die paar meter lyn tot op die inhaak en in ’n oogwink is die lyn af. Avaran is verbaas oor die akkuraatheid van die metode en ek wys hom ook hoe om eerder die lyn te merk en nie in te haak nie. Hierdie karpe is te wild. Nog ’n paar gooie en ’n mooi karp is weer aan, ek moet hom probeer weg hou van die struktuur af en die klein hoekie skeur uit. Na ’n opgradering tot ’n #0.5 FN 505 op ’n 0.20mm lyn en ’n paar truuks om die haakplekke te vermy, soos om elke keer op die rubberboot te spring as die vis aan is, begin ons hulle land. Konsentrasie - as die punt buig, moet ek kap! Gereed vir die dag se hengel, voer en pitte vir die vis en hawermout vir die hengelaar! Videograaf Avaran van Niekerk in sy element hard aan die werk met sy kamera in die hand. Akkuraat gooi is belangrik; vir Avaran was dit ’n aanpassing en moes hy die oorskouergooi in die see vinnig afleer. Daardie middag vang ons so tien stuks karpe en Avaran land sy eerste karp ooit en sommer ’n mooie van so by die 3kg. Die son sak en dis tyd vir ’n braaivleis vuur om sy ding te doen. Deur die loop van die nag kry ek ’n loop of twee op die karpstokke maar die bome wen! Geen vis aan wal! Die volgende oggend begin ons vroeg met die feeder en nadat al die karpstokke se ase vervang, gelaai en gevoer is, is dit volstoom feeder. Ek hengel, verduidelik die tegniek aan die kykers en Avaran doen sy ding agter die kamera. Toe al die werk gedoen is, is dit sy beurt om die stokke te vat. Hy leer vinnig die fynere kunsies en vang ’n paar mooi visse. Die gooislag was vir hom ’n aanpassing, gegewe sy rots- en strandhengel agtergrond en moes hy leer om afstand te verruil vir akkuraatheid. Hy kry dit mooi reg en kort voor lank is hy heel bedrewe. Ons het nog ’n baie gerieflike truuk bygeleer en spring nou sommer met elke vis op die groot boot wat teen die kant vasgemeer lê en soos ’n jetty werk. Dit gee telkens net die regte hoek en ons kry die visse mooi oor die haakplekke gespeel. In die proses tel ons ’n mooi karp of twee op wat net te veel is en ons tot in die bome daar in die diepwater hardloop. Ons leer ook dat hierdie wilde karpe graag die pitte uit die feeder vroetel en dan die hoekaas heelwat langer laat lê. Ons maak ’n aanpassing en vind toe die optimale taktiek - gooi drie feeders met heelwat pitte en fyn Super Cast voer, skakel dan oor na gewone growwe Super Cast met geen pitte in die feeder nie. Die byte is dan baie meer aggressief, en hulle stamp nie net die hele tyd aan die feeder nie. Die growwe voer het genoeg in om die karp geïnteresseerd te hou en die punt staan sommer gougou sekel. Na ’n halfuur se hengel, gooi weer twee of drie feeders met fynvoer en pitte en hengel dan weer met die growwer, ietwat natter voer wat lekker hard gedruk word. So by middagete se kant is dit tyd vir die kamera om by spesiehengelaar John Dearden van “The Carp Angler”, wat net so paar honderd meter verder sy kamp staan gemaak het, te gaan inloer. Avaran gaan doen gou die werk daar, en toe hy terugkeer vat hy weer die feederstok vas terwyl ek so bietjie swem oefening inkry en so uur of wat gaan swem. Die water is so 21 grade en redelik skoon, vergeleke met ons Vaalsisteem water waaraan ons gewoond raak. So kilometer of wat uit, nader aan die hoofstroom kan ek voel dat daar ’n yskoue strook water deur die dam kom en ek verstaan ook waarom die vis, en veraldie baars, so ietwat nukkerig is om te byt. Ons span van “Die Baarshengelaar” is ook daar en alhoewel hulle ’n paar mooi vis gevang het, was die getalle maar min. So kom die dag ook tot sy einde en Avaran is verbaas oor die sak vis wat ons so deur die dag bymekaar gemaak het. ’n Vinnige foto en hulle is weer mooi teruggeplaas om groot te word. Daardie aand kry ek die eerste karp geland - nie ’n bielie nie, maar ’n mooi vis van net so oor die 7kg. Die res van die tyd tel ons nog ’n paar mooi vis op, maar al die groteres is heeltemal te sterk en gaan soek die bome op. Ek kry egter nog ’n 8kg vis uit, maar ons ore hang maar; heel duidelik sal ons volgende keer met ’n baie beter plan na vore moet kom. AASMielie en mieliebasis voer bly maar een van die effektiefste ase vir karp. Die enkelpit op ’n relatiewe klein hoek en langer hoeklyn in die gras het die beste resultate gelewer. Die vis het egter na ’n ruk se hengel met die fyn voer heelwat langer gevat om behoorlik te byt. Na ’n minuut in die water het die stok se punt al aangedui dat daar gepeuter word aan die feeder of die aas, maar soms het dit 6 tot 10 minute gevat voordat die aas behoorlik opgetel word. Met ’n eksperiment in die vlakwater kon die verskil tussen die fyn voer en growwer Super Cast popcorn duidelik gesien word. Met die growwer voer het die karpe beslis meer aggressief gebyt. SPESIE KARPHENGELBivanedam het beslis mooi karpe en met die voer van tigernuts en gekookte kaboemmielies het hulle beslis ingekom. ’n Eenvoudige kleinerige asie wat op die bodem kon lê of selfs met kurk effens gelig word, het die beste gewerk. Ons het groot vis aangehad, maar die grotes het almal die bome opgesoek en ons kon hulle nie keer nie. Ek het egter die geveg gewen met die kleiner karpe van so 7kg en 8kg. Hierdie kleiner struike wat voorheen sekerlik mooi geil teen die hange gegroei het, is met wortel en tak uitgetrek met Berkley se Connect+ 15lb lyn, maar die bome staan nou met ’n paar mooi versiersels daar onder en ’n paar bielie karpe swem nou weer rond. Die boot wat teen die wal gemeer staan het mooi gewerk om soos ’n jetty te gebruik en die vis mooi veilig bo-oor die obstruksies te speel. Karp was nie die enigste spesie wat van die mielies gehou het nie - die makriele het dit soms gegryp nog voor dit op die bodem was. Deur die loop van die dag het ons om die beurt skofte gehengel en ’n mooi sak bymekaar gemaak. Hier hou Avaran die dag se fonds trots vas.