BOOTHENGEL: Klipdrift se Koi-Karpe

WOORDE: Werner Lubbe | FOTO'S: Jessica de Villiers Klipdriftdam op die pad tussen Johannesburg en Potchefstroom is ‘n baie spesiale dam met ‘n baie spesiale karakter – nie net kan hy jou baie stief behandel nie, maar hy kan ook vir jou mooi vis gee as jy alles reg doen. So het ek op uitnodiging van Schalk van Breda my boot gepak en afgesit in die rigting van Potch, reg in die middel van die winter. Die gehalte karpe wat Klipdrift in die winter lewer is besonders, en dis waaragter ons was. Maandag reeds het ek begin om al my gerei so stuk-stuk agtermekaar te kry om Woensdagoggend douvoordag in die pad te val. Ek het ook die weer dopgehou en het gesien hoe die tande van ‘n onwelkome kouefront al hoe nader kom, so al asof dit geskeduleer is om ons Woensdag te tref. Die oggend oppad Klipdrift toe loop die Toyota met boot en al soos stroop, en ek wonder nogal wat het gebeur tydens die laaste diens by Motus se werkswinkel. Toe ons stop by Klipdrift, verstaan ek presies hoekom – ‘n massiewe sterk wind waai reg van agter! Nietemin het ons gereed gemaak om te lanseer en al ons goedjies op die boot gelaai. Ons sou natuurlik nie ver hoef te gooi nie, so die 7- en 8-voet stokke is perfek. Schalk se assistent, Bennie Steyn, het gehelp om gou al die goedjies wat op ‘n hengelboot nodig is aan boord te kry, al was hy eintlik bietjie knorrig vir die sterke noord-ooster wat sy bui net aangejaag het! Toe die son sy flou winterstrale oor die horison gooi is ons gereed om die skip ter water te laat met twee lekker warm koppies boeretroos op die konsool. Naas die koffie is die belangrikste item wat gepak word natuurlik die SvB Extreme grondvoer. Net so ‘n paar pakkies wat ons lekker sag sou aanmaak is voldoende. Ons het egter beplan om ‘n paar blikkies pitte saam te bring om in die voer te meng, maar albei van ons het dit nagelaat – ja ek weet, uitstekende hengelaars wat hulle aas vergeet! Om ‘n dag op die water te kom spandeer in ‘n week waar daar baie ander dinge moet gebeur, en met nog ‘n sakevergadering daardie middag, moet ons darem so bietjie voorbereiding tref. Die vorige dag het Bennie vir ons ‘n mooi plekkie gaan uitsoek, waar die water vier meter diep is en dit mooi gemerk met ‘n drywende H-blok wat ons verwyder voor ons begin hengel het. Hy het ook die plekkie so bietjie voorberei deur ‘n emmer of twee Monster Mix oor ‘n area van ongeveer 10x10m te versprei. In die groter skema van karphengel is dit maar eintlik gering, maar heeltemal genoeg om te verseker dat vis oornag in die area sou inbeweeg en begin wei. Dit was so al asof die wind ons so ‘n klein venster gegee het om te lanseer en te anker voor dit weer sy woede sou uithaal en ons het die tydjie so effektief moontlik gebruik om te anker. Ek gebruik ‘n 4-ankersisteem, met twee ankers voor op 45 grade, en twee agter so naby as moontlik aan 80 grade. Die aanvanklike gedagte was om vir Bennie op die rubberboot saam met die kameraspan te hê om verskeie hoeke en kameraskote te dek, en dus al om die boot te kan beweeg en goeie filmskote te kry. Met die noord-ooster wat toe gou weer kwaad word, was dit egter glad nie haalbaar nie en sou hy net die heeltyd die wind moes veg om by ons te bly. Hy laai toe maar vir Jessica en haar kamera saam met ons op die boot af en keer terug na veilige hawe op die kant. WENK: Gebruik ‘n elektriese kabelrol om jou ankertoue op te stoor. Op hierdie manier is daar geen los toue wat iewers kan vashaak nie en dit maak die hele ankerproses baie gemakliker. Die battle box vir die dag – ‘n tipiese ‘Hier Gaan Ons Alweer’-kissie wat al die belangrikste goed inhet – floaties, ‘n paar bottels pitte en al die regte dips vir Klipdrift. Schalk se keuse oor wat in die kissie moes wees was presies in die kol; inteendeel, ek dink daar het ‘n paar ekstras saamgekom net om die gate vol te maak – ons kon heel waarskynlik met net ses botteltjies klaarkom. Schalk het natuurlik die takie gekry om ons voer aan te maak. Waar ek altyd alles presies afmeet, doen Schalk dit met sy hart, of dalk eerder sy gut feel. Hy gooi eers die water in die skottel, en dan voeg hy SvB Extreme by tot hy tevrede is. Die voer is lekker sag en sponserig, en werk baie lekker saam met die veertjiestrop. Die eerste stokke gaan in, en Schalk flick sy 7-voet Fenwick Classics net so agter die boot – een in die middel en een meer regs. Hierdie stokke is lig en sag en leen hulleself tot lekker ligtegereihengel. Schalk hengel al baie jare met hierdie stokke en dit is al ‘n keer of wat mooi nuut oorgedoen, het langer butt sections gekry, beter ogies en wat nog meer. My keuse vir die dag, ‘n perfek-gebalanseerde kombinasie – my Poseidon 8-voet Snipers met die Daiwa 4000 Black Widow BR katrolle. Ek het egter bietjie swaarder gegaan met die lyn, en gebruik ‘n 0,30mm 12-pond lyn vir die korter hengeltoepassing. Die hoogs sigbare geel Kingfisher Fluoro Yellow-lyn werk vir my baie goed van die boot af; dis ook nie nodig om so ver te gooi nie, en dit kan selfs sonder ‘n leader gehengel word. Vir groter vis glo ek altyd aan pitte, en Schalk se raad aan my was ook om relatief min dip te gebruik. So dit is toe hoe ek begin het – ‘n enkel pynappelpit, met net so ‘n paar druppels Tjop-Tjop op die bal. Op die boot is daar ‘n hele laai van hierdie stroppe – ‘n klein veertjie met ‘n ligte gewig en ‘n enkel hoek. Daar is twee variante, een met ‘n Fear None #1-hoek op ‘n 8-pond-hoeklyn, en ‘n #2 met ‘n 11-pond-hoeklyn. Schalk se stroppe was soortgelyk, maar met twee hoeke. Skoon vlapoeier, hy skud elke bal daarin voor hy gooi. Maar hy het ook ‘n ander geloof – hy gebruik elke keer ‘n nuwe een, of stel dit so – ‘n vars batch. Hy hou nie daarvan dat die vorige naweek se dips nog ‘n geur agterlaat nie, en maak seker sy vlapoeier is elke keer ‘onbesoedeld’. Skaars 20 minute na sy eerste gooi begin die lyn net so kant toe beweeg en Schalk maak vas. Die eerste karp het geval vir die Pampoenpitte-floatie met Perdeby en Tjop-Tjop op die bal. Net een spuit Tjop-Tjop met ‘n klein bietjie Perdeby bo-op die bal, en dan natuurlik terug in sy 'fairydust' – die vlapoeier. So paar minute later kry ek ook ‘n mooi loop en baklei een van die Klipdrift-vegters. Terwyl ek besig is, vlieg die ander stok ook weg en vat sowat 50 meter lyn terwyl ons die ander vis land en weer terugsit. Ek tel op en dis ‘n mooi vis, maar op ‘n stadium word dit nogal swaar. Die vis swem hoog en ons sien dit op die oppervlakte, maar daar is nog ‘n vis op die enkelhoekstrop en die volgende oomblik is alles af en die twee visse swem lui-lui weer die dieptes in! Schalk is nog besig om ‘n nuwe strop te bind toe die stok se punt begin buig en die katrol skree. Hy maak vas en die vis baklei sterk, maar bly na die linkerkant toe trek. Ons reken dis ‘n mooi vis soos dit lyn vat, maar ons was effens teleurgesteld toe dit by die boot kom – dis toe glad nie so groot nie, maar die tweede hoek het in die analevin gehaak – vandaar die getrekkery na die een kant toe. Hier verduidelik ek vir Schalk my denkwyse oor twee hoeke van die boot af. Met die verhouding van dié tipiese stroplengte en grootte van hierdie karpe, gebeur dit baie dikwels dat wanneer die karp die onderste hoek optel en wegswem, die boonste hoek dit iewers naby die stert haak. Dit maak die baklei moeilik en dikwels breek die strop. Daar is twee moontlike oplossings – gebruik ‘n enkelhoekstrop, of maak die skaglyn van die dubbelhoekstrop BAIE kort, letterlik 15-20cm. Die sagte stok wat Schalk gebruik stel hom in staat om met ‘n klein hoek redelik baie druk op die vis te plaas sonder dat hy die risiko loop van ‘n hoek wat uitskeur. Wanneer jy twee op ‘n boot hengel en die vis byt, moet jy maar hand bysit. Hier het ek die stok wat Schalk besig was om te laai, klaar gemaak en gegooi terwyl hy sy vis baklei – lyk my hy is maar versigtig vir my gooivernuf, want hy koes maar laag … Returning the favour – ek staan met twee stokke in die hand, elkeen met ‘n vis aan – Schalk kom gee hand by, maar o weë, hierdie linkerhandste katrolle besigheid werk nie so lekker vir hom nie. Al twee kere wat hy my kom help het en ‘n vis moes speel met die linkerhand, het hy hulle verloor – klink my daar is ‘n verskuilde boodskap! Ek het hom Schalk, dankie! Een van die kombinasies wat redelik goed gewerk het, met die speserye wat redelik sterk deurkom. Schalk vervang egter die Raja-floaties met Pampoenpitte en vang ‘n paar dik visse. ‘n Kombinasie wat moeilik geklop word; ‘n titsel Perdeby kan natuurlik ook hier bygevoeg word. Een van die lang karpe wat vir die pitte geval het. Klipdrift se karpe is maar net eenmaal kenmerkend met hulle geel en/of oranje vlekke op die skubbe en vinne. Daar het vir seker iewers ‘n baie sterk koikarp-invloed in die dam ontstaan. Hierdie bloedlyn loop diep en ten minste drie tot vier karpe uit elke tien wat jy hier vang, het een of ander bewys van ‘n koi in die voorgeslagte. Nadat Schalk oorwegend groter vis vang as ek, verander ek die aanbieding en gebruik nou twee Pampoenpitte-floaties en ‘n lang dun degie om te kyk of ek ook die groteres kan uitsoek – suksesvol ook ja! So halfpad deur die oggend waai die wind nou te lekker, en ons is naderhand heeltemal van die ankers af. Dis vir my onstellend want ek anker altyd so, en my ankers hou altyd. Ten einde die probleem te probeer oorkom, maak ons die agterste ankers net weer aanmekaar vas en plaas hulle oorboord, tel altwee die voorste ankers op en gaan plaas hulle ver voor uit, baie naby aanmekaar. Nou ry ons terug en gaan maak weer agter ook vas – nie ideaal nie, maar heelwat beter met twee ankers nou voor. Na ‘n analise van waarom ons so sukkel om te anker, vertel Schalk my dat die Klipdrift-bodem maar hard en gruiserig is. Op die kant aangekom gaan stel ek ondersoek in, en sien dat dit presies net so lyk. Ek sal ‘n ander tipe anker as ‘n plat plaatanker moet gebruik. Dís die karpe waarvoor ons Klipdrift toe kom, ‘n lekker dik wyfie wat die skaal sommer seermaak. Dis duidelik dat hierdie vis al ‘n paar jonger generasies in die lewe gebring het en besig is om lekker te wei vir die broeiseisoen van later in die jaar. Dis is ook duidelik waarvan sy hou – die asies wat lekker met flouro gedip is, het natuurlik hulle weg gevind tot in haar maag. Dis natuurlik ook altyd goed om te weet dat hulle hou van wat jy hulle gee – dit kweek vertroue in wat jy aan die hoek sit. Ja dis lekker om te sien dat Schalk ook so nou en dan die babas vang, en nie net al die dikkes nie, maar ons het ‘n goeie leerervaring gehad hiermee. Inteendeel, hy het seker drie of vier van hierdie kleiner karpe gevang – almal met dieselfde stok, op dieselfde kol. Bennie het die vorige dag ‘n redelike groot kol gevoer met Monster Mix, en ons het dit so beplan dat dit reg agter die boot sou wees. Met die wind wat ons geskuif het, was dit meer aan ons linkerkant soos ons agtertoe gekyk het. Schalk het sy regterstok dus van die voerkol afgegooi, maar het dit doelbewus bly doen om te sien of hy groter vis van die kol af kon vang – die sukses was maar skraal! Wanneer daar van die boot af gehengel word, is die kans vir ‘n groter vis redelik goed en dan moet jy reg wees met die regte gerei. ‘n Groot, sterk skepnet met ‘n lang (maar nie té lank) steel, is die beste belegging. Twee van hierdie, sodat elke hengelaar sy eie een het, word aanbeveel. Die skerp-soet geur van Cachou (Pink Sweets, Juana) is een van daardie waarop jy kan staatmaak as die wind nou lekker pomp, en die watertemperatuur aan die lae kant is. Met slegs 11 grade, was hierdie keuse ‘n goeie een en het dit ‘n paar mooi karpe gelewer. Een van die bekende gesigte vir die dag – ‘n double-up! Dit was ‘n relatief kort hengeldag, maar op die 'See van Galilea' met ‘n noord-ooster wat nie vriendelik was nie, was dit vir ons net reg. ‘n Hele paar van hierdie mooi besonderse Klipdrift-karpe het die aas opgeraap en ons was tevrede en geseënd met die vangste. Verder het ons ‘n paar waardevolle lesse geleer en dis lekker om dit met lesers te deel. Tyd vir huis toe gaan en op ‘n redelike steil oewer sonder ‘n lanseerblad, is dit belangrik om sekuur te wees as jy die boot terugsit op die sleepwa. Jy het so bietjie momentum nodig en jy moet presies die kiel op die rollers kry. Dis belangrik om dit op te ry, want as die voertuig eers die walletjie af moet ingaan, is dit moeilik om dit weer uit te kry. OM TE LEER … Hierdie dag het ons baie geleer en ons het weereens besef die karpe van Klipdrift is baie spesiaal, maar met die regte benadering kan die dikkes gevang word. Alhoewel ons met die boot so 'n paar honderd meter ingegaan het en die spesifieke diepte gaan soek het, kan hierdie karpe ook van die oewer gevang word, as jy alles reg doen. As daardie diepte so bietjie ver is, gebruik gerus 'n aasboot, rubberboot of kano om van die kant af by hulle uit te kom. WENKE: Gaan soek so 3-4 meter water voor jou hengelkampie. As jy langer kamp, voer elke dag so een emmertjie Super Cast Monster Mix oor 'n wye area, strooi dit sommer so. Hemp, kaboems en Tigers is die hoofbestanddele.As jy gooi, gaan so lig as moontlik, en met 'n redelike lang strop.Nr 1 en Nr 2 hoeke op 7-pond of dalk 10-pond is die grootste en swaarste – 12cm hoeklyne.As jy kan gaan afgooi met 'n bootjie, gebruik groot sagte voerballe.Dubbel Pampoenpitte-oozers met Tjop-Tjop en Perdeby was die beste kombinasie. Dus daardie sagte oranje cinnamon-float met pynappel en naeltjie-tipe dips, met 'n bietjie fluoro. Onthou die skud in vlapoeier! Die back-up wat goed gewerk het is 'n enkel pit, terug in die bal – Pynappel of Cachou! Selfde dips! En so kan jy nie net vanaf ‘n boot, maar ook van die oewer met 'n aasboot of 'n kano ook sukses behaal by Klipdrift. Geniet dit en stuur foto's! The latest print edition of Stywe Lyne Tight Lines is now available in retail and selected angling stores!

BOOTHENGEL: Klipdrift se Koi-Karpe

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

DIE KATROLLE SING: Reg en geregtigheid het geskied …

MY TURN | MY BEURT: Stywe Lyne Tight Lines December 2023

UIT & TUIS: Vis in die boot, waar is my sandale …

LESERS | READERS: November 2023

Major Bass Fish-Off at Albert Falls

JUNIORS: November 2023

HENGELLEWENSSTYL: Die begin van ’n nuwe front …

VAALRIVIER: Stuur jou foto’s van siek visse!

FIRST EVER SASACC CHALLENGE: Angling Administrators Bending Rods

CAMPING for the holidays with CAMP MASTER

DIE KATROLLE SING: Reg en geregtigheid het geskied …

MY TURN | MY BEURT: Stywe Lyne Tight Lines December 2023

UIT & TUIS: Vis in die boot, waar is my sandale …

LESERS | READERS: November 2023

Major Bass Fish-Off at Albert Falls

JUNIORS: November 2023

HENGELLEWENSSTYL: Die begin van ’n nuwe front …

VAALRIVIER: Stuur jou foto’s van siek visse!

FIRST EVER SASACC CHALLENGE: Angling Administrators Bending Rods

CAMPING for the holidays with CAMP MASTER

DIE KATROLLE SING: Reg en geregtigheid het geskied …

GALJOEN ‘MONSTER’ ON HERITAGE DAY

MY TURN | MY BEURT: Stywe Lyne Tight Lines December 2023

R550.00 per year

R55.00 per month

R399.00 per year

R40.00 per month

R399.00 per year

R40.00 per month