Bootvaardigheid -2

Deel 1 het gefokus op wat jy moet doen om sonder probleme van jou huis tot by die water te kom. Nou is dit die beurt van wat jy moet doen om jou boot so veilig en betroubaar moontlik te hou. Party van die wenke het nie regtig iets te make met bootvaardigheid in sigself nie, maar is wel belangrik om jouself en jou passasiers veilig te hou. Almal wat ’n skipper lisensie het behoort die basiese vereistes te ken, alhoewel as ek so op sosiale media kyk is daar baie grys areas en sien ’n mens fotos van bote wat bitter gevaarlik is. As boot eienaar is dit jou plig om te verseker jou boot is in so ’n toestand dat jy nie jouself of ander mense se lewens in gevaar stel nie. Ek kry baie keer die indruk dat party mense dinge so goedkoop moontlik probeer doen sonder om aan die gevolge te dink van wat kan gebeur as daar iets fout gaan. Hulle maak sodoende gebruik van minderwaardige materiaal en ook van bedenklike vakmanskap. Wanneer jy enige werk op jou boot doen of laat doen, doen navorsing, vra rond en vind uit hoe gaan jy die beste resultate kry vir wat jy wil doen; en maak ook seker as jy gebruik gaan maak van ’n boot werkswinkel dat dit ’n goeie reputasie in die bedryf het. Daar is baie kansvatters wat kort paaie vat en op die ou einde gaan jy duur skoolgeld betaal. Boot gepak en reg om te gaan hengel. Boot gepak en reg om te gaan hengel. Ondersoek gereeld die skuim in jou boot se romp want van die ouer tipe skuim trek water. Dit kan jou boot baie swaar en onstabiel maak. Moet nie wag tot die boot se dryfvermoë-sertifikaat verval voor jy dit nagaan nie. Indien die skuim water getrek het sal jy dit moet laat uithaal. Dit is ’n baie groot werk en moet eerder deur goeie boot werkswinkels gedoen word. Jy kan die ou skuim vervang met die nuwe “Sondor” spons wat nooit weer sal water trek nie. Laat jou motor gereeld diens. Daar is niks so teleurstellend en frustrerend om langs die water te staan met ’n boot enjin wat probleme gee nie; dit kan maklik jou hele hengeluitstappie kelder. Maak ook seker dat jy jou enjin goed ken en presies weet hoe alles werk. Motor op transom. Petrol en olie tenks moet altyd skoon wees en jy moet seker maak jy het genoeg olie en petrol om gemaklik tot by jou bestemming en terug te kom. Jy moet gereeld ook jou boot se dwarsbalk (transom) en vloer nagaan, veral as dit ’n ouerige boot is. Dit is nog ’n deel van die boot wat maklik kan water trek en indien dit wel gebeur kan die transom of vloer maklik breek en jou in ’n groot penarie laat beland. Hou jou boot skoon en netjies, maak seker dat elke ding sy bêre plekkie het op die boot en nie oral rondlê nie. Veral goed soos ’n gaffel en visstokke met hoeke aan. Organiseer alles so op jou boot dat jy gerieflik kan hengel en maklik by alles kan uitkom. Motor sonder dop. Respekteer almal op en om die water, moenie naby ’n boot of hengelaar op die kant verby jaag as jy sien hulle is besig om te hengel nie. Almal wil hulle tyd by die water geniet. Die heel belangrikste wenk van alles is: Gebruik jou boot, moet nie dat dit die hele seisoen staan nie. Jy het immers die boot gekoop om herinneringe saam met vriende en familie te maak. Jy leef net een keer en van die beste tye in jou lewe gaan op die water wees.