Bootvaardigheid: Drie belangrike inspeksies op jou boot!

Transom: Gaan gereeld jou boot se transom na en maak seker dat die hout nie nat word of begin vrot nie. Dit is een van die grootste nagmerries vir enige boot eienaar. Reparasies op ’n transom is arbeids intensief en duur, maar ongelukkig gebeur dit en hoe gouer dit opgespoor word hoe beter. Indien daar enige flex is in die transom kan jy maar weet jy het probleme. Jy kan ook met ’n ligte hamertjie klop op verskillende plekke op die transom. Jy moet ’n soliede klop klank hoor - ’n dowwe klank is gewoonlik ’n teken dat jou transom nat en vrot is. Nog ’n toets wat jy kan doen is om jou motor tot heel bo te trim en die motor as ’n hefboom te gebruik. Druk en trek op die motor en kyk of daar enige flex in die transom is – ’n transom in goeie toestand moet glad nie beweging of flex toon nie. Ondersoek ook die transom vir ooglopende defekte soos krake in die veselglas wat gewoonlik een van die eerste simptome van ’n vrot transom is. Indien jy vermoed en jy nie heeltemal seker is of jou transom vrot is nie, neem jou boot na ’n boot herstel sentrum met ’n goeie reputasie en laat hulle vir jou kyk, jy wil nie onnodig probleme op die water hê nie. Boot dek: Jou boot se dek kan ook vrot, en weereens is dit ’n redelike duur en arbeids intensiewe herstel proses. Gewoonlik is een van die eerste tekens dat jou dek vrot is plekke wat sponserig voel as jy daarop loop. Meeste bote het laaghout onder die veselglas en as dit nat geword het begin dit uitsit en vrot. ’n Sponserige dek is verseker ’n slegte teken en moet dadelik nagegaan en herstel word. Indien jy wil seker maak jou dek is nie gevrot nie kan jy met ’n gatsaag ’n inspeksie gat op die dek sny sodat jy mooi kan sien wat aangaan. ’n Dek wat vrot is is gewoonlik ’n groot werk en meer as net die dek sal reg gemaak moet word. Ek beveel aan dat jy jou boot na iemand toe vat met ’n goeie reputasie en baie ondervinding indien jy reparasies aan die dek gaan laat doen. Skuim en hout onder die dek: Water onder in jou boot se romp is gevaarlik en enige boot eienaar se grootste nagmerrie. Dit is nie altyd maklik om te bepaal of daar water in jou boot se romp is nie. Jy kan ’n paar toetse doen maar die maklikste is om ’n inspeksie gat of gate te sny in die dek om te kyk wat onder die dek aangaan. Jy kan jou oor teen die kant van die dek hou en die boot skud op die sleepwa. Partymaal kan jy die water hoor plons onder die dek. Jou boot lê dalk skeef in die water en die manier wat dit ry op die water is nie soos wat jy gewoond is nie. Water onder jou dek is gevaarlik en veroorsaak groot skade aan die hout onder die dek. Indien daar skuim onder die dek is wat water getrek het kan jy weereens ’n inspeksiegat sny en ’n plastiek pyp deur die skuim druk om sodoende ’n monster te trek van die skuim wat jy kan ondersoek vir water. Slotsom: Alhoewel ons almal mal is oor water kan dit ’n groot kopseer wees as dit in jou boot se hout intrek. Ondersoek jou boot gereeld en moet nie ’n blinde oog draai wanneer jy vermoed daar is probleme nie. Laat dit so gou moontlik nagaan en maak dit reg. Wees veilig op die water.