L. DIE HANDIGE HENGELAAR

WOORDE: Riaan 'Vis' Bezuidenhout FOTO'S: Verskaf DOBBERHENGEL VIR KURPERS IN MALAWIMEER Ek het onlangs die voorreg gehad om opleiding in Malawi aan te bied, en as vissermansbloed deur jou are vloei, soos myne, is die eerste ding wat ek Google, 'waar kan ek gaan visvang?' Malawi is bevoorreg om aangrensend aan een van Afrika se drie groot varswatermere te wees, die Malawimeer is die kleinste van die drie, maar in omtrek is dit die 9de grootste ter wêreld. Die ander twee, Victoriameer, is die grootste in Afrika en 2de grootste in omtrek ter wêreld, terwyl die Tanganyikameer die diepste in Afrika is. Die drie saam huisves meer as 1500 verskillende endemiese spesies kurper. Dus, vir my sou kurper beslis die teikenspesie wees, maar toe die vraag: hoe gaan ek hulle vang? Dobberhengel, oftewel 'floatfishing' is iets wat ons altyd as kinders gedoen het, met 'n standaard rooi en wit ronde dobber en dit was nog altyd met die ligtegerei wat gebruik is baie suksesvol en lekker. Dit was dus nou duidelik tyd om my dobberhengelvere reg te skud en ‘n paar van die meer se mooi visse, wat ek in my akwarium by die huis het, in hulle natuurlike habitat te gaan vang. Malawi – Die ‘Warm Hart’ van Afrika Die mense van Malawi heg regtig waarde aan hul land se bynaam; hulle is almal werklik baie vriendelik en hou hulle land mooi skoon. Die dorpe se sypaadjies is vol padstalletjies met kunstige, handgemaakte aandenkings, kos en klein kwekerye. Dit is opmerklik dat hulle deur niemand in die aande hoef opgepas te moet word nie. Malawi se geldeenheid is Kwacha wat ongeveer 55MK vir R1 is. Die wisselkoers maak vir ‘n redelike lekker leefstyl en as jy op die regte plekke in die dorp kyk, het vulstasies al jou benodighede onder dieselfde dak, van jou kos tot iets vir die keel. Die gewildste eetvis in Malawi is chambo, wat amper oral vrylik beskikbaar is, van heel gaargemaak tot in koekies en alles tussenin. Die opleiding wat ek aangebied het was in die hoofstad, Lilongwe, ongeveer so uur en ‘n half se ry van die meer af. Vir my afnaweek het ek ‘n kar gehuur en verblyf bespreek by een van die vele oorde by Senga Bay op die wesoewer van die meer. Tyd om te gaan visvang! My afnaweek het toe aangebreek en as ek nie ore gehad het nie was my glimlag reg rondom my kop! Vroeg Saterdagoggend was dit tyd om van Lilongwe na Senga Bay te vertrek. Die pad is in ‘n goeie toestand, maar daar is honderde fietse en nog meer motorfietse op die pad, so dit is ‘n stadige en versigtige reis. Die hele land deur voel dit asof ek in KwaZulu-Natal is, met die massiewe digte bome. Die Zambezi-koffieboom (Bauhinia petersiana) is volop en wanneer jy so binne 30km van die meer af is, begin die groot kremetartbome verskyn. Toe ek by die meer aankom, het ek in my kamer gaan inboek en sommer vinnig by een van die honderde vissermanne ‘n boot vir die dag gehuur. Dit vat mooi praat met die manne, maar daar was toe ooreengekom op 30 000 Kwacha (R545) en aas was ingesluit. Na ongeveer ‘n halfuur se bootry was ons naby ‘n klein eiland. Daar is visarende wat op die eiland nes maak, en as jy vir hulle ‘n vissie wys vlieg hulle nader en gaps dit uit die lug uit. By ‘n klein inham aan die noordelike kant van die eiland kon ons van die wind en sterk waterstrome ontsnap. Die visse het stadig aan die gang gekom, maar toe ek eers so bietjie ekstra fyngesnyde aas in die water gegooi het, het hulle behoorlik spoed opgetel. Soos alle kurpers veg hulle met mening, so my 6-voet teleskopiese stok het omtrent amper van punt tot punt gebuig! Daar is soveel verskillende spesies in die meer dat mens nie sommer twee soorte na mekaar vang nie. Die vissies het omtrent alle vorms en kleure (veral blou); hulle is beslis nie die grootste visse wat ek al gevang het nie, maar is by verre die mooiste visse wat ek al gevang het. Ek kon darem ‘n chambo tussen al die spesies vang asook twee pragtige spesies (veral die mbuna) wat ek baie graag sou wou hê om in my eie akwarium te kon aanhou. Ek het meer as 20 visse gevang, maar die een groot blou een het my dag gemaak. Die vis het selfs in die lug gespring en ‘n paar oomblikke se kommerwekkende geveg onder die boot tussen die klippe opgesit. Dit was werklik ‘n onvergeetlike dag se hengel, en terug by my huisvesting kon ek rustig op my stoepie gaan sit en uitkyk op die see sonder golwe ... Die 'vergete' kuns van 'float fishing' Daar is talle maniere om met ‘n dobber te hengel, maar persoonlik verkies ek die glydobber manier. Dit is eenvoudig en die diepte van die aas kan maklik verstel word afhangend van hoe diep die water is en hoe diep die visse aktief is soos dit verander soos die dag aanstap. Om die strop te maak, sny eers ‘n 20cm-stuk van die hooflyn af om later die glyknoop te maak. Plaas die dobber op die hooflyn met die poliesman bo dit op die lyn en bind ‘n hoek aan die lyn (persoonlik hou ek van ‘n #1 Daiichi). Bind nou die glyknoop bo die dobber op die hooflyn. Hou die hooflyn reguit en maak ‘n sirkel met die ekstra stuk lyn om die hooflyn. Die een punt van die ekstra stuk word dan deur die sirkel en om die hooflyn vier na vyf keer gedraai. Spoeg nat en trek styf. Moet nie die glyknoop se punte te kort sny nie, anders haak hulle op die stok se ogies en kan hulle moeilikheid op die spoel maak wanneer daar gewerp word. Ongeveer 2cm na 5cm werk gemaklik. Gummystops (rubberstopperballetjies) maak ook moeilikheid met die werp en op die spoel, so die glyknoop is by verre die beter opsie. Ongeveer 20cm bo die hoek kan ‘n paar knypsinkers op die hooflyn bygevoeg word. Die grootte en die dryfvermoë van die dobber sal bepaal hoeveel om by te voeg. Hierdie proses van bysit en wegvat moet gedoen word, sodat die dobber gebalanseerd is om effektief enige byt te kan aandui. Hou die knypsinkers so dig moontlik teen mekaar om te voorkom dat daar lynkoeke met die werpaksie vorm. Laaste, maar beslis nie die minste nie, is die aasaanbieding. Omdat kurpers klein en fyn tande het en maklik die aas van die hoek af kan eet, soms sonder enige aanduiding, word die aas, soos erdwurms, dun repies vis, hoenderlewer of insekte op die hoek geryg. Maar wees gewaarsku: as jou dobber vir langer as twee minute stil lê, beteken dit jou aas is klaar van die hoek af gesteel, so hou die dobber dus elke sekonde stip dop!Opsommend is dobberhengel baie eenvoudig en min hengelgerei word benodig. Ek hou nou permanent my 6-voet teleskopiese stok, ‘n paar hoeke en knypsinkers in my kar. Ek moet letterlik net iewers ‘n swartkriek vang en ek kan my lyn natmaak! Ek gaan ook nog baie dobberhengel toepas terwyl my spesiekarpstokke lê en wag – dis ‘n goeie alternatief vir kunsaashengel. Ek het juis vandat ek terug is op presies so manier ‘n mooi 3kg-karp gevang. Tot volgende keer, vriendelike hengelgroete, stywe lyne en nat nette!

L. DIE HANDIGE HENGELAAR

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

Fishing is a FAMILY AFFAIR

HENGEL met RIAAN ALLEMAN – Ohana Fishermen Cabins

Wenke vir die LENTE …

INHOUD: Die Oewerhengelaar | CONTENTS: The Bank Angler

Hengel saam met FRIK & RIËTTE

First 70-pounder in SA!

Columbia Drainmaker™ XTR Shoes

1. VAN DIE OEWER • FROM THE BANK

Camp Master Sleeping Bags – For every occasion

FISHING IS A FAMILY AFFAIR

Fishing is a FAMILY AFFAIR

HENGEL met RIAAN ALLEMAN – Ohana Fishermen Cabins

Wenke vir die LENTE …

INHOUD: Die Oewerhengelaar | CONTENTS: The Bank Angler

Hengel saam met FRIK & RIËTTE

First 70-pounder in SA!

Columbia Drainmaker™ XTR Shoes

1. VAN DIE OEWER • FROM THE BANK

Camp Master Sleeping Bags – For every occasion

FISHING IS A FAMILY AFFAIR

Kortlikse oorsig: ‘Queens of the Ocean’ 2024 by St Lucia

Fishing is a FAMILY AFFAIR

HENGEL met RIAAN ALLEMAN – Ohana Fishermen Cabins

R550.00 per year

R55.00 per month

R399.00 per year

R40.00 per month

R399.00 per year

R40.00 per month