DIE KATROLLE SING: Baber met die naam Jasper

‘n Rubriek deur Hennie Egen* Snorre en Rooi Jan van Looy braai ‘n vleisie by Grootlieg op die plaas. Die vuur brand, die vleis ook, en die bier spoel gesellig. Grootlieg se vrou kuier by haar suster en hy het besluit om die eensaamheid met vriende en ‘n vleisie op die kole te verdryf, veral as daar ‘n paar vriende is wat na sy stories kan luister. Is hy dan nie die bobaas storieverteller in die kontrei nie? Grootlieg brand om sy nuutste storie op te dis, maar Snorre en Rooi Jan hou moedswillig aan om oor die boerdery uit te vra en na die welstand van al wat leef navraag te doen. “Man ek weet nie hoe dit met hom gaan nie. Ek wil ook nie weet of hy lewe of dood is nie!” bars hy naderhand ongeduldig uit. Snorre en Jan skater van die lag, knak nog ‘n kannetjie en sit rustig terug om na een van Grootlieg se juweeltjies te luister. “Ek het so ‘n tydjie gelede vir my broer op die dorp gaan kuier toe ek so ‘n spartelende beweging in die gras in die leë erf naby sy huis gesien het. By nadere ondersoek blyk dit toe ‘n baber te wees wat daar spartel. Iemand het seker die baber in die rivier gevang, dit huis toe gedra en langs die pad besluit hy het nie lus om dit skoon te maak nie en dit in die gras gegooi.” Grootlieg gaan voort en vertel hoe hy by sy broer aangekom en die baber vir hulle gewys het, hulle wou ook niks van die lelike vis weet nie en sy broer se twee onnutsige seuns (albei op hoërskool) besluit toe om dit in die skool se swembad te gaan gooi. Die swembad is die vorige dag skoongemaak en word uit die skool se boorgat volgemaak so daar is nie chloor in om die vis se kieuwe te brand nie. Dit was ‘n Vrydagaand en die Saterdag sou daar ‘n groot gala by die skool wees waaraan verskeie skole van Noord-Gauteng deel sou neem. Daar was groot verwagtinge van twee meisies, Elize van ‘n gesiene meisieshoërskool in Pretoria en Ria van Warmbad in die 100m vryslag en die foendies het rekordtye voorspel. Die plaaslike Griet is nie eers genoem nie, dalk ‘n vyfde plek of so. Vroeg die oggend is die twee knape reeds skool toe om die baber uit te haal maar tot hul ontsteltenis was die sportonderwyser reeds daar doenig met vlaggies en die luidsprekerstelsel. Hulle is aan die werk gesteek en kon niks aan die baber, wat hulle sommer as 'Jasper' gedoop het se heil doen nie. Hulle het hom wel gesien waar hy in die hoek van die swembad weggekruip het. As hy daar sou bly was die Kaap Hollands, maar as hy tydens die gala begin rondswem? Wel, die twee wou nie aan die moontlike gevolge dink nie. Die gala is deur die burgemeester geopen en het goed begin. Die 100m vryslag vir dogters onder 15 was reeds vroeg op die program. Die aankondiger het juis gesê dat vuurwerke verwag kon word in die tweestryd tussen Riana en Elize en dat ‘n nuwe kringrekord beslis ‘n moontlikheid was. Die twee is bane 4 en 5 toegewys, terwyl Griet in baan 1 sou swem. Vier lengtes is ‘n lang afstand in ‘n kompetisie en Griet het maar verwese en vaal vertoon teen die twee fris meisies in die middelste bane. Sy het darem geweet dat al is sy nie so vinnig nie is sy wel goed fiks na ‘n harde oefenprogram. Na die eerste draai was sy vyfde, sowat drie lengtes agter die twee sterre wat kop-aan-kop voortgesnel het. Na die tweede draai was sy vierde toe die fiksheid begin tel en by die derde draai het 'Jasper' ‘n vin bygesit. Die gekrap en geskop en luide stemme het reeds op sy senuwees begin werk en toe Griet hier bokant hom teenaan die wal skop, skiet hy na bo om te sien wat aangaan en kom tussen Griet se bobene op. Sy skop so kragtig om van die gladde, krapperige ding weg te kom dat sy met ‘n gil sowat ‘n meter deur die lug trek voordat sy krappend en skoppend met ‘n skuimbol agter haar deur die water skeur. Vergete is die voorste twee wat sy nog voor die helfte van die swembad hulle ingehaal en verbygesteek het. Die skare is op hul voete en krete vir Griet en 'Jasper' vergesel die beangste dogter na die eindpunt. Juffrou Swanepoel moes Griet aan die skouers vashou om te verhoed dat sy uit die swembad spring. Trane loop oor haar wange maar die onderwyseres dink dit is oor dankbaarheid dat sy gewen het dat sy huil en dat haar gille aan haar aansporing om haarself te motiveer om beter te doen toegeskryf kan word. Die aankondiger wat uit opgewondenheid sy lip teen die mikrofoon stukkend gestamp het, hyg hortend oor die luidspreker: “Dames en here, asseblief net ‘n oomblik! U het sopas iets gesien wat u vir die res van u lewe sal onthou. Griet! Griet, liewe Griet! Nie net het jy ‘n nuwe byeenkomsrekord opgestel nie maar ook ‘n nuwe kringrekord!” Luide gejuig begroet die aankondiging en Griet met haar betraande gesiggie kyk onbegrypend om haar heen. “Het ek gewen, juffrou?” vra sy verbaas. En toe gil die luidspreker weer: “Luister hier, luister, Griet is ook die nuwe Suid-Afrikaanse rekordhouer. Sy het die ou rekord met byna twee en ‘n halwe sekonde verpletter!” Die skare gaan mal en drom om Griet saam waar sy skaam en verlore voor die kleedkamer staan. Intussen het die twee knape gesien almal drom by Griet saam so hulle het hul kans gewaag en vinnig die baber uit die swembad geskep, in ‘n sak geprop en is daarmee op pad huis toe. Daardie aand, onder dekmantel van die donker is 'Jasper' stilletjies in die spruit losgelaat. Wat daarna van hom geword het sal net die visse weet, maar hy het beslis nie weer sy opwagting in die skool se swembad gemaak nie. Die onderwysers wonder steeds hoekom spreek sommige seuns die groot swemtrofee as 'Jasper' aan! Tot volgende maand. *Oud-joernalis Hennie Egen is ‘n skrywer en digter met sy werke in 11 bundels opgeneem. Sy digbundel “Heimwee” is tans beskikbaar. Dit bevat 182 van sy beste gedigte en kan op Whatsapp, 072 209 4765 bestel word. Die prys is R120 en sluit posgeld in.

DIE KATROLLE SING: Baber met die naam Jasper

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

GROOTKARPHENGEL: Ons Hengeltog by ’n Moeilike Dam

Yamaha to Host Joburg’s Biggest Boat Show

ACTUALITY: SACRAA TO INTENSIFY EFFORTS TO GAIN GOVT RECOGNITION FOR RECREATIONAL FISHING

DIE KATROLLE SING: ‘n Entrepreneur

ANGLING INDUSTRY: 2022 SAFTAD GENERATES ‘CAREFUL OPTIMISM’

BAARSHENGELKLASKAMER: KRULSTERT-GRUBS (‘CURLY TAIL’ GRUBS)

BOOTHENGEL: Klipdrift se Koi-Karpe

BASS FISHING IN THE SPAWN – A SCIENTIFIC PERSPECTIVE

FISHFINDER: August

MAJOR BASS FISHING: Inanda Dam July 2022

GROOTKARPHENGEL: Ons Hengeltog by ’n Moeilike Dam

Yamaha to Host Joburg’s Biggest Boat Show

ACTUALITY: SACRAA TO INTENSIFY EFFORTS TO GAIN GOVT RECOGNITION FOR RECREATIONAL FISHING

DIE KATROLLE SING: ‘n Entrepreneur

ANGLING INDUSTRY: 2022 SAFTAD GENERATES ‘CAREFUL OPTIMISM’

BAARSHENGELKLASKAMER: KRULSTERT-GRUBS (‘CURLY TAIL’ GRUBS)

BOOTHENGEL: Klipdrift se Koi-Karpe

BASS FISHING IN THE SPAWN – A SCIENTIFIC PERSPECTIVE

FISHFINDER: August

MAJOR BASS FISHING: Inanda Dam July 2022

GROOTKARPHENGEL: Ons Hengeltog by ’n Moeilike Dam

Yamaha to Host Joburg’s Biggest Boat Show

ACTUALITY: SACRAA TO INTENSIFY EFFORTS TO GAIN GOVT RECOGNITION FOR RECREATIONAL FISHING

R499.00 per year

R49.00 per month

R299.00 per year

R29.00 per month

R299.00 per year

R29.00 per month