Die Sport en Ontspanning van Hengel

Hoe vlieg die tyd nie! Hierdie is my 23ste wat in Stywe Lyne verskyn. Dit voel soos gister toe my eerste een in die uitgawe van Junie 2018 opgeneem is. Ja, die tyd vlieg werklik. Ek is trots om ’n bydrae in hierdie pragtige tydskrif te maak en wag elke maand ongeduldig om ’n Stywe Lyne in my hande te hou. Kyk, dit laat mens se hart sommer warm klop as jy sien wat word uit die binnelandse riviere en damme getrek asook die pragtige visse waarmee seehengelaars spog. Hengel bly die grootste en beslis die ontspannendste sport in Suid-Afrika! Nie net is dit ontspannend nie, maar redelik veilig en kan deur almal (beide geslagte) van klein tot horingoud beoefen word. Hengel is ook ’n werkskopper. Dink net aan al die winkels waar hengelgerei verkoop word, plekke wat kunsaas en hoeke vervaardig, asook bote vir hengel maak, enjins vir die bote vervaardig en die ouens wat wurms in hul agterplase kweek. Wêreldwyd word daar biljoene in hengel belê. Gevaarligte flikkers egter reeds geruime tyd vir die Suid-Afrikaanse hengelaar. As daar nie binnekort teen besoedeling opgetree word nie, kan veral ons binnelandse hengelaar geen vis of skoon en veilige hengelplekke meer hê nie. Die owerhede besef nie (soos gewoonlik) hoe vinnig die besoedeling tydbom besig is om te tik nie! Ons mense, nie slegs die hengelaars nie, ervaar daagliks die bitter ondervinding van vuil, ongesonde en stink water…en die owerhede sit op hul vet sitplekke, palm reuse salarisse in en doen oudergewoonte niks. Besef hulle nie dat hulle verplig is om skoon drinkwater aan mense in ons dorpe en stede te lewer nie? Die burgers van Suid-Afrika sal in hul miljoene opruk en ons land sal erger as Australië brand as die mense in hul honderde begin sterf as gevolg van ’n tekort aan water of as die water heeltemal ondrinkbaar is. Daar was reeds waarskuwings soos in die geval van Loskop naby Groblersdal waar die water so erg besoedel is deur riool en chemiese stortings dat visse en selfs krokodille gevrek het. Watervoorsiening aan Bronkhorstspruit en omliggende nedersettings gaan binnekort sy eerste slagoffers eis. Die water uit die Bronkhorstspruitdam is nie geskik vir mens of dier nie. Alge het die spruite en riviere oorgeneem en Delmas sowel as Bronkhorstspruit se munisipaliteit doen eenvoudig niks om die situasie te beredder nie. Oewerbewoners van die eens skoonste dam in Gauteng het reeds twee jaar gelede ’n forum gestig om Delmas en ander besoedelaars te oorreed om nie met hul besoedeling voort te gaan nie, Maar al hul pogings val op dowe ore en nie die munisipaliteit of die Departement van Water en Sanitasie verroer ’n vinger om die gevaarlike, dodelike vergrype die hoof te bied nie. Die regering laat hierdie misdade, ja dit is ’n misdaad om iemand te vergiftig, ooglopend toe. Hulle erken dat dorpe se rioolwerke is verouderd, maar doen niks om dit te vervang nie. Die rioolpype moes lankal vervang word, maar dit is ook nie gedoen nie. Hulle spandeer miljarde om Suid-Afrika in staat te stel om toeriste en sakelui na Suid-Afrika te bring om hier in stikkend riool rond te stap of te ruik hoe ons kraanwater soos riool ruik. Julle speel op jul viole terwyl SA brand! Die karpbevolking in die Bronkhorstspruitdam groei mooi aan en binne ’n jaar of twee gaan ons ook weer mooi kurpers vang. Dit wil natuurlik sê as hulle nie almal weens besoedeling vrek nie. Stywe Lyne tot volgende keer!