fbpx
Bank AnglerFishing Tips

Die Tegniese Debat – Die elemente van ‘n strop…

Deur: Andries Maree en Schalk van Breda

Die oogmerk van die reeks is om varswater oewerhengel tegnies te benader. Dit sal ons in staat stel om die redes te vind waarom seker items, tegnieke, metodes, ensovoorts beter werk as ander. Ons gaan hengelgerei, tegnieke, metodes, aassoorte en konsentrate met mekaar te vergelyk, bestudeer en bespreek.

Vir hierdie onderwerp reeks het ons gebruik gemaak van die volgende monofilament lyne om die illustrasies af te handel:
• Double X Platinum Plus
• Double X Fluorocarbon Schock Leader
• Sufix Fluorocarbon
Die eerste aspek wat ondersoek was is die gebruik van ‘n “dun” en soepel/sagte lyn vir die hoeklyn en dit te vergelyk met die gebruik van ‘n “dikker” en harder/stywer lyn as hoeklyn. Dit is belangrik om te weet dat die gebruik van ‘n “dikker/harder/stywer” lyn verskillende invloede uit oefen wanneer ‘n “klein” hoek of ‘n “groot” hoek gebruik word.

Dun/Sagter/Soepel Lyn:

Andries se kommentaar:
Wanneer ek na “dun” verwys in die omstandighede is dit tipies ‘n 7-10lb (0.20-0.23mm). Daar is heelwat  voordele met die gebruik van hierdie tipe lyn, naamlik:
• Die hoek met die aas word nie geforseer om ‘n spesifieke posisie in te neem wanneer die strop op die bodem beland nie.
• Die vis, byvoorbeeld ‘n karp, kan makliker die aas en die hoek opsuig aangesien die sagte lyn nie weerstand bied nie weens die sagtheid/soepelheid.
• Die hoek neem ‘n meer effektiewe posisie in aangesien die lyn nie weerstand bied indien die hoek byvoorbeeld deur die floatie gedraai word nie.
• Kleiner visse kan die hoek en aas makliker opsuig aangesien die lyn nie weerstand bied nie. Die dikker lyn is geneig om soos ‘n veer (spring) weerstand te bied.

Die dunner/sagter/soepel lyn gee dus aan jou ‘n baie meer “natuurlike” aanbieding van die aas aangesien die vis deur middel van sy normale suig aksie die aas in sy bek kan kry soos enige ander natuurlike voedsel wat op die bodem voorkom of wat dryf in die water kolom. Dunner lyn het egter uitdagings wat in ag geneem moet word:
• Die skaaf (abrasion) weerstand is minder en kan dus makliker afskaaf teen obstruksies.
• Die lyn kan nie vir te veel keer herhaaldelik gebruik word nie.
• Die regte knope moet gebruik word om die breek sterkte van die lyn so hoog as moontlik te hou.

Schalk se kommentaar:
Dun lyn in varswater hengel vir eindgerei is ‘n bespreking wat telkemale debatte veroorsaak. Ek het al geweldig baie proefnemings gedoen en dus ook duur skoolgeld betaal. Ek verduidelik graag my stelling. Ons almal weet dat alle spesies wat ons van die oewer af vang partymaal onder geweldige hengeldruk is en dit maak dat veral die hoeklyne baie sorgvuldig gekies moet word.
In alles is daar ‘n “te” ook. Ek het al met hoeklyn diktes gehengel tot en met 4lb/0.12mm. Die rede vir die gebruik was om moddervis te teiken wat baie sku is maar die nadeel is ook dat hierdie hoeklyntjie dan maklik kan breek. Ek sê altyd dat die eerste stap is om ‘n byt te kry en dan die res van die proses reg te hanteer. Ek het al telkemale verskillende fabrikate se fluorocarbon lyn probeer. Aangesien die samestelling van diè lyn veroorsaak dat die lyn meer “bros” is as normale monofilament, kan die kort en dun lyne wat vir hoeklyne gebruik word nie die impak van die funksie heeltemal vervul nie.
In die video materiaal sal jy sien dat die fluorocarbon lyn baie goed reageer met die aanbieding van die aas. Om die aanbieding meer vrylike beweging te gee kan jy van monofilament gebruik maak.

Dik/Harder/Stywer Lyn:

Andries se kommentaar:
Ek beskou die dikker lyne as lyn wat 10lb of 0.24mm oorskry. Hierdie dikker/harder lyne het verseker bepaalde voordele indien hulle as hoeklyne gebruik word. Die voordeel kom na vore wanneer jy visse soos groot babers teiken of waar daar uitermatige obstruksies in die water is. Die volgende nadele bestaan wanneer die dikker lyne gebruik word:
• Beperking met die gebruik van seker knope weens die grootte van die hoek se ogie.
• Die beweeglikheid van die hoek en die aas word negatief beïnvloed.
• Die natuurlik draai van die hoek word negatief beïnvloed wat swak haak verhouding kan veroorsaak.

Schalk se kommentaar:
Die gebruik van dikker lyn as hoeklyne het altyd ‘n plek op die regte tyd. Ek verduidelik graag dit as volg:
Die regte lyn vir die regte aanwending metode vir die regte omstandighede (“horses for courses”). Wanneer ek babers teiken sal ek met gemak ‘n hoeklyn tot en met ‘n dikte van 0.30mm gebruik. ‘n Baber is ‘n roofvis wat gewoonlik sy prooi jag en dus minder sensitief is vir die hoeklyn diktes. In teenstelling daarmee maak die karpe gebruik van ‘n suig aksie om die aas in die bek te kry en die moddervis ‘n tipe “voel/suig” metode soos ‘n stofsuier. Dus beïnvloed die dikker lyn die hoeveelheid byte wat jy sal kry.
My ervaring is dat die deursnit sosiale hengelaar meer gebruik maak van dikker hoeklyne wat die oorsaak kan wees dat minder vis in die skepnet beland en sekere byte nooit realiseer tot ‘n volledige byt nie. 

Ons aanbevelings:

Andries se kommentaar:
• Die volgende lyne beveel ek aan om as hoeklyne te gebruik wanneer jy normaalweg oewerhengel doen, naamlik 7lb in beide wit en groen.
• Vir die skaglyn waarop die sinker gly beveel ek 24lb in wit aan.
• Daar is geen twyfel by my dat jy ten alle tye ‘n dunner hoeklyn moet gebruik.

Schalk se kommentaar:
My aanbeveling ten opsigte van die hoeklyn keuse sal ek soos volg opdeel:
• Kompeterende hengelaars: Vir die kompeterende hengelaar is enige moontlike byt belangrik. Die minimum massavereiste in kompetisies vir ‘n telbare vis, is 150gr en groter. Elke vis kan egter geweeg word en dus kan vis wat kleiner is as 150gr ook tel vir jou gewig van jou vangste. Met dit in gedagte sal jy beter verstaan hoekom hoeklyne van kardinale belang is vir kompeterende hengelaars. My aanbeveling vir diè doel is tussen 5 en 7lb (0.16 tot 0.21mm) wat voldoende sal wees. 
• Sosiale hengelaars: Vir die deursnit sosiale hengelaar is ‘n dag by die water al klaar deel van die sukses. Dit is dan nie so belangrik om daardie klein kompetisie visse te vang nie. Die groter vis kan makliker met die dikker hoeklyne gevang word. Ek wil egter die sosiale hengelaar nooi om te eksperimenteer met die bietjie dunner lyn want dit kan dalk net die dag net nog beter maak. My aanbeveling is dan tussen 10 en 12lb (0.24 tot 0.30mm).

Tags
Close