Die Tegniese Debat – Hoe Reageer Die Visse Wanneer Die Voer Op Die Bodem Land?

Die oogmerk van die reeks is om varswater oewerhengel tegnies te benader. Dit sal ons in staat stel om die redes te vind waarom sekere items, tegnieke, metodes, ensovoorts beter werk as ander. Ons gaan hengelgerei, tegnieke, metodes, aassoorte en konsentrate met mekaar vergelyk, bestudeer en bespreek. Vir hierdie onderwerp het ons gebruik gemaak van Super Cast se SVB Droëvoer. Oor die jare heen wat diè droëvoer produk beskikbaar is vir die hengelaars in Suid Afrika, was daar al baie bespiegel oor hoe die visse daarop reageer. Daar is ook baie opmerkings en opinies van hoe die visse daarop wei. Die algemene gevoel is dat die doel van die voer is om te help om die visse te lok na die hengelarea en dan daar te hou sodat hulle gevang kan word. Die voer se samestelling is dus belangrik om albei hierdie funksies te vervul. Die droëvoer wat vervaardig word deur Super Cast, word vir alle hengelaars dieselfde gemaak, of jy nou ‘n sosiale hengelaar is of ‘n Protea hengelaar is. Die verskil kom daarin hoe jy dit aanwend. Die produk is so besonder dat jy dit net so kan gebruik deur slegs water by te voeg, of jy kan droë bestanddele soos fyn mielie gruis of vloeistowwe soos dips byvoeg om by jou hengelplan in te pas. Dit is egter nodig om te noem dat dit glad nie noodsaaklik is om ander bestanddele by te voeg nie. Die produk werk baie goed net so. Ons het dit dan ook net so gebruik. Die afbreek of opbreek of “oplos” tyd is baie keer ‘n debat onder hengelaars. Na gelang van jou behoefte, kan jy die voerbal maak dat dit vinnig afbreek of baie stadig. Jy kan dit bewerkstellig deur die hoeveelheid water wat jy gebruik nadat jy dit aangemaak het. Indien jy water by die reeds gemengde voer plaas, sal dit sagter wees en vinniger afbreek. Indien jy nog van die droëvoer byvoeg, sal die voerbal harder wees. Dis egter baie belangrik dat jy nie die doel van die voer uit die oog verloor nie...... “lok en vreet”. Die samestelling van die video materiaal vir die artikel het oor twee dae plaasgevind. Die eerste dag het ons voer op die gekose area ingesit om die visse te lok. Ons het slegs skoon 2kg SVB Droëvoer gebruik sonder enige bymiddels. Tydens die tweede dag was die visse in die hengelarea en ons kon die videomateriaal opneem om die reaksies te kon waarneem. Hoe reageer die visse op die voer? Andries se kommentaar:Ek is van mening dat die voer ‘n baie groter rol speel in ons hengel as wat die meeste hengelaars wil erken. Jy kan nie die mening opper dat ‘n voer is ‘n voer is ‘n voer nie. Droëvoer moet volgens my oor die volgende eienskappe beskik om effektief te kan werk:• Daar moet drywende dele wees wat in die waterkolom sal rond beweeg.• Daar moet fyn dele wees wat op die bodem gaan lê wat dit moeilik maak vir die vis om dit op te eet. So bly hulle geïnterresseerd en honger.• Daar moet growwe dele wees wat die visse wel kan vreet wat hulle meer aggressief sal laat wei.Die voerbal kan ook die draer wees van konsentrate of bestanddele soos heel mieliepitte. Die einddoel wat ek graag wil bereik met die voer is om die visse te kry om binne my hengelarea aggressief te vreet sonder om skrikkerig te wees. Indien die vis skrikkerig is, is die visse baie sensitief wanneer dit kom by die grootte van die hoekase, die hoek groottes, die dikte van die hoeklyne, ens. Die konsentrate of dips wat jy gebruik kan help om die visse te lok maar dan is dit noodsaaklik dat die voer sy werk verrig om jou vangste so goed as moontlik te kry. Schalk se kommentaar:Heel eerste is die voer volgens my die belangrikste deel van aas aanbieding. As ons ‘n vergelyking tref tussen die voer as lokmiddel en hoekase sal die persentasie seer sekerlik 10:1 wees. Daar is dus baie meer voer as aas beskikbaar vir die visse. ‘n Baie belangrike aspek is dat die voer verskillende funksies verrig naamlik;• Vis lok.• Voed.Soos ons almal weet voldoen Super Cast se Super Feed en SVB aan al die vereistes as gevolg van die samestelling van die voer. Volgens my gebruik die meeste hengelaars slegs die voerbal net as draer om addisionele reuke in die hengelarea te kry en vergeet van die belangrikheid van die voer self. Ek weet van hengelaars wat geen konsentrate op die voerbal gebruik en geweldig suksesvol is. Jy kan sien dat die visse reeds in die hengelarea is waar hulle opsoek is na kos. Die visse swem baie rustig rond in die area. Sodra die eerste voerbal die water tref kan jy onmiddellik sien dat die visse skrik. Binne sowat 1 minuut begin die eerste vis belangstel in een van die voerballe wat die verste van die kamera af geland het. Die voerbal lê tussen die klippe so die vis sukkel om by die voerbal uit te kom. Jy kan sien dat die een moddervis begin baie gemaklik wei op een van die klippe waar van die voerdele gaan lê het. Die beweging van die moddervis se bek is mooi sigbaar. Ons aanbevelings... Andries se kommentaar:In die video materiaal is dit duidelik sigbaar dat die visse gevoelig is vir geraas. Sodra die voerballe die water tref, skrik die visse aanvanklik uit die hengelarea en dan swem hulle weer nader. Alhoewel daar ’n skool van visse is, vreet hulle nie almal gelyk nie. Die visse swem redelik agterdogtig rond aan die begin en dan raak hulle meer gemaklik. Dit is duidelik sigbaar dat wanneer die visse op die voerbal afsak en vreet, doen hulle dit vinnig en swem dan weg. My mening is dat die voerbal nie iets is wat hulle baie aan gewoond is nie, maar hulle erken die droëvoer onmiddellik as voedsel. Die video opnames is oor ‘n tydperk van ‘n uur geneem. Dit is duidelik sigbaar dat die visse na ‘n geruime tyd eers meer gemaklik raak om te vreet en al meer van die visse beweeg nader om van die voedsel te kan geniet.My aanbevelings is die volgende:• Maak seker dat jou voer reageer soos wat die visse dit verkies.• Moenie onnodige geraas maak by jou hengelarea nie.• Maak gebruik van goeie kwaliteit droëvoer wat die visse onmiddellik as voedsaam sal erken.• In die meeste gevalle sal dit nie raadsaam wees om van te harde voerballe gebruik te maak nie. Die visse kan dan te veel fokus op voerballe of hulle sal nie in die hengelarea bly nie aangesien daar niks is om te vreet nie.• Maak seker dat jy op ‘n goeie bodem hengel wat in die video opnames kan daar gesien word hoe die visse sukkel om by die voerdeeltjies uit te kom Schalk se kommentaar:Ek gaan begin deur ‘n stelling te maak wat baie mense dalk vir ’n rukkie goed sal laat nadink. Oor die afgelope twintig jaar het ons as hengelaars ons plaaslike vis gekondisioneer met die gebruik van die droëvoer en die samestellings daarvan. Wanneer die tweede en derde voerbal in ‘n hengelarea land sal die vis proaktief begin reageer op dit wat aangebied word. Die eetlus van die visse word dus gestimuleer. Jy kan in die video opname sien hoe die voer die eetlus van die visse stimuleer en aanwakker sonder enige konsentrate/dips. Die konsentraat/dips moet dien as ‘n hulpmiddel om onder sekere omstandighede die byt tempo te verhoog.My aanbevelings is die volgende:• Eerstens sorg dat jy ‘n kwaliteit voer gebruik.• Tweedens volg die instruksies noukeurig na om die voer aan te maak. Sodoende sal jy die volle potensiaal van die voer kan geniet. In die video opname kan jy die belangrikheid van die voer sien en ek wil tog jou versoek om te glo dat hierdie droëvoer die funksie verrig waarvoor dit ontwerp is.