Die Tegniese Debat

Die oogmerk van die reeks is om varswater oewerhengel tegnies te benader. Dit sal ons in staat stel om die redes te vind waarom sekere items, tegnieke, metodes, ensovoorts beter werk as ander. Andries Maree en Schalk van Breda gaan hengelgerei, tegnieke, metodes, aassoorte en konsentrate met mekaar vergelyk, bestudeer en bespreek. So wat het ons sover geleer? Die video opnames vir hierdie artikel reeks is oor ’n tydperk van meer as twee jaar saam gestel en oor die tydperk het dit vir ons baie duidelik geword dat die natuur wonderlik geskape is. Ons het die voorreg gehad om die “wilde” visse se gedrag te kon bestudeer in hul eie natuurlike omgewing. Tydens die samestelling van die video opnames en die bestudering daarvan, het die volgende vir ons baie duidelik geword: • Ons weet nog bitter min van die visse wat ons graag wil vang. • Daar is verseker ’n baie duidelike aanduiding dat die visse se gedrag “gerig” word deur die oorlewings-sintuig. • Deur terug te kyk na die opnames het ons besef dat daar wel belangrike goed geleer is. • Van die visspesies soos die karpe en moddervisse kan baie goed sien teenoor die baber wat se sig minder goed is. Met die begin van die video opnames was die doelwit om ons kennis te verbreed tov die volgende: • Hoe lyk dit daar waar ek ’n vis probeer vang? • Wat gebeur regtig met my strop onder die water? • Hoe reageer die vis teenoor die eindgerei? • Wat gebeur werklik met my voer en aas? • Hoe lyk dit wanneer die visse wei op die voerplek. • Hoe lyk dit wanneer die visse die hoekaas optel? SO wat het ons so ver geleer? Die video opnames het vir ons belangrike goed geleer wat ’n deursigtige verbindingslyn vir ons uitgewys het. Die spreekwoordelike “goue draad” wat ons gevind is dat die volgende aspekte beslis ’n positiewe of negatiewe effek op jou vangs resultate sal kan lewer: • Die aspekte waaroor die hengelaar beheer het. • Die aspekte waaroor die hengelaar nie beheer het nie. Dit mag dalk vir jou vreemd wees, maar vir ons het dit oor tyd baie duidelik geword dat dit waaroor jy as hengelaar beheer het, moet jou so goed as moontlik uitvoer om suksesvol te kan wees maar dan het die natuur steeds nog ook ’n invloed op jou uitslag waaroor jy nie beheer het nie. Die visse ken hulle omgewing baie goed, sodra ons inbeweeg om die opnames te maak, is die visse se gedrag baie meer “agterdogtig” en benader hulle die stroppe met groot versigtigheid. Waaroor het jy nie beheer nie? Die video opnames het vir ons baie mooi uitgewys dat indien die weer skommeling met ’n kouefront wat gepaard gaan met ’n groot lugdruk verandering, die visse beslis nie wil wei wanneer dit gebeur of gebeur het. Die visse kan beslis die aankoms van die verandering “aanvoel” en dus word hulle gedrag direk voor die inbeweeg, tydens die teenwoordigheid en die onmiddellike tyd nadat die front oorbeweeg het negatief beïnvloed. Waarneming: Die visse beweeg nie heeltemal uit die area waar hulle natuurlik voorkom en wei nie. Hulle sal of net hoër in die water kolom op beweeg en daar rond swem of hulle sal steeds naby die bodem wees maar ’n baie statiese gedrag opneem wat dan veroorsaak dat hulle nie wei nie. Hierdie is ’n natuurlike gedrag en wanneer dit gebeur moet jy besef dat die vangste sal waarskynlik baie swak wees of jy kan sommer maklik niks vir die dag vang nie. Die video opnames het vir ons baie mooi uitgewys dat indien die voer nie korrek saamgestel is of verkeerd aangewend word, die visse beslis baie minder belangstelling gaan toon aan jou hoekaas en voerbal. Waarneming: Indien die voer se samestelling korrek is, word die visse baie goed nader gelok in so ’n mate dat hulle aggressief begin wei en dat hulle dan makliker bereid is om die strop te nader en te wei aan die voerbal en hoekase. Soos die voerdele oor ’n groot area versprei word, word die visse versprei aangesien die visse baie plekke het om te wei en dan verminder dit die kanse wat jy het dat die visse jou hoekaas sal opsuig. Die video opnames het vir ons baie mooi uitgewys dat indien die lyne byvoorbeeld te dik is en nie op die bodem gaan lê nie, kan dit die byte negatief beïnvloed en jou kanse tot vangste verminder. Waarneming: Indien die visse se vinne, lywe of bekke aan die vislyn raak, het die visse beslis geskrik en dan wou hulle nie weer naby die strop wei nie. Aangesien die visse nie altyd die lyn kan raaksien nie, skrik hulle vir die aanraking aan die lyn want hulle kon dit nie sien nie. Die video opnames het vir ons baie mooi uitgewys dat indien die “verkeerde” dip of die dip in te oormaat gebruik word, dit die byte negatief kan beïnvloed en jou kanse tot vangste verminder. Waarneming: Indien die visse reeds in die hengelarea is en daar word van te veel konsentraat gebruik gemaak, het die visse glad nie nader geswem om aan die strop te kom wei nie. Die visse het weg gebly van die strop af. Dan het ons ook gesien dat min tot geen konsentraat ook positiewe reaksies by die visse verkry het. Ons aanbevelings: Uit die opnames is dit duidelik dat jy as hengelaar baie meer beheer het oor die resultate van jou vang pogings as wat voorheen gedink was. Die ou gesegte... “die visse wou nie byt” dra eintlik baie waarheid! Ons beveel dus aan dat jy alles waaroor jy beheer het soos die keuse van die hengelarea, die items wat jy gebruik vir die eindgerei, die aas en voer aanbieding en die gebruik van die dips, een honderd persent reg moet uitvoer. Sodoende kan jy net jou kanse tot sukses verbeter. Indien jy langs die hengelwater sit, en jy weet dat daar baie visse voor jou is moet jy deur middel van ’n stelselmatige proses deur al die bogenoemde aspekte werk en klein verstellings of verandering aanbring tot die visse begin belangstelling toon in jou stroppe. Wat lê vir ons voor? Die video opnames het vir ons baie ander vrae oopgemaak en onbeantwoord gelaat. Die opnames sal dus voortgesit word om die gedragspatrone van die visse beter te verstaan en dan baie belangrik aanpassings te maak in die hengel tegnieke om meer sukses die visse te kan beïnvloed en te kan vang. Die vis wat nie wil wei nie weens die invloed van ’n koue front & groot lugdruk verandering. Die regte aanwending van die grondvoer kan die visse in ’n aggressiewe wei patroon bring. Die verkeerde gebruik van konsentrate of dips kan die visse baie negatief beïnvloed. Die eindgerei wat jy gebruik as voorslag en vir die strop kan die visse afskrik.