GABON: ONVERGEETLIKE HENGEL-ERVARINGE

WOORDE: Francois Sprong FOTO’S: Verskaf HENGELAVONTURE IN AFRIKA: ONVERGEETLIKE HENGEL-ERVARINGE IN GABON Ek is bevoorreg om deel van ‘n groep van nege passievolle hengelaars te wees wat tyd maak vir unieke ekskursies. Dit is ‘n vriendekring van hengelaars wat die samesyn van mekaar se geselskap geniet, maar ook die gevoel van ‘n blinklyf aan die lyn waardeer. Ons beplan, beraadslaag en bespreek moontlikhede gebaseer op vorige ervarings van hengelaars, internet-inligting en tydskrif-artikels. Vir ons almal is tyd kosbaar, nie net weg van ons beroep nie, maar ook weg van ons gesinne. Daarom moet so ‘n uitstappie vir ons almal die moeite werd wees, in tyd en in vis. Ons het al twee keer hierdie droom-avontuur meegemaak, so ek hoop hierdie artikel kan jou help om ook so ‘n droom te verwesenlik. Die Gabonese lugmag kom haal ons groep by Setta Cama. Nou Hoekom Gabon? Tarpon! Cuberra snappers, jack crevalle, longfin jacks, barracudas, African threadfin, Senegalese kabeljoue, en so kan ek aangaan. Van die eerste vrae wat enige iemand jou sal vra oor hierdie vangstes is hoe diep jy op die see uit was? Maar nee, hierdie is van die spesies wat jy kan verwag op ligtegerei-kunsaashengel van die strand af … in Gabon! DIE LIGGING Setta Cama is ‘n klein nedersetting geleë net buite die Loango Nasionale Park, tussen die Ndogo-strandmeer en die Atlantiese Oseaan. Dit is waarlik seker die wildste plek wat nog bestaan teen die weskus van Afrika. Die oorvloed van natuurlewe kan hiervan getuig en dit is veral die interaksie met die plaaslike olifantpopulasie wat daagliks vir baie opwinding sorg, in en om die kamp en soms ook op die strand. Die reënwoud is die tuiste van gorillas, sjimpansees, unieke bosvarke, buffels, skaars duikerspesies en ‘n baie groot verskeidenheid voëlspesies. Die uitgebreide riviersisteem wat in die see vloei by Setta Cama sorg vir ’n gesonde ekosisteem. Killifish voltooi hulle hele lewenssiklus in tipiese nat woudtoestande, in poeletjies wat geskep word deur diep voetspore, byvoorbeeld dié van ’n olifant. Afgesien van die rots- en strandhengel wat in my opinie geen gelyke het nie, is die tog na Setta Cama ook ‘n avontuur op sy eie. Met vlugte wat gereeld verander gedurende ons Covid-pandemie is daar basies twee roetes wat gevolg kan word afhangende van operasionele besluite van die lugrederye. Vanaf OR Tambo-lughawe in Johannesburg na Libreville in Gabon is daar tans geen direkte vlugte nie. Jy kan dus via Ethiopië (Addis Ababa) of via Rwanda (Kigali) vlieg. Ons groep het beide roetes gedoen sonder enige probleme. Die aansluitingsvlugte is redelik vinnig en die wag op die lughawe kortstondig. Met die vertrek en met die terugtog slaap die groep een aand in Libreville oor. Dit verseker genoeg tyd om alle reëlings in plek te kry vir moontlike Covid-toetse (sou dit nog nodig wees) en om ruimte te laat vir onvoorsiene vlugtydveranderinge en weersomstandighede. Hier moet ek sê dat die reëlings van African Waters puik is. ‘n Verteenwoordiger wat Frans magtig is ontmoet jou op die lughawe en neem jou na jou gekose hotel toe. Hier kan die groep dan ‘n paar yskoue biere geniet en van die lekker plaaslike disse eet. Die opwinding na wat voorlê borrel oor in vele stories en herinneringe van vorige hengelekspedisies. Van Libreville af vertrek jy dan die volgende oggend na die landingstrook op Gamba (sou die rit plaasvind met ‘n vastevlerk-vliegtuig), ‘n baie klein dorpie wat die tuiste is van die Shell-oliemaatskappy. Die vlug Gamba toe is nie ‘n kommersiële roete nie en sorg dus vir groot opwinding. Die negentig minute vlug geskied meerendeels oor een van die grootste reënwoude wat nog bestaan. Tans word daar van helikopters gebruik gemaak om groepe te vervoer weens die gebrek aan binnelandse vastevlerk-kontrakteurs. Die vlug is dan laag oor die toppe van die woud en die ongeskonde bos kan net as asemrowend beskryf word. So ‘n vlug neem jou dan direk na die kamp in Setta Cama. Sou jy egter op Gamba se vliegveld moet land is die hengelkamp ‘n verdere twee ure se ry per boot rivier af … see toe! Weereens ‘n onbeskryfbare ervaring oor ‘n magdom van water tussen eilande deur tot by jou bestemming, met ‘n vinnige buiteboordboot. Weereens met beide van ons ekskursies het alles seepglad verloop en is ons ingewag deur van die plaaslike hengelgidse wat ons en ons bagasie in die bote gelaai het, ‘n koue verversing in die hand gestop het en koers gekies het oor die water. SETTA CAMA-KAMP Die kamp is geleë teen die rivier en kan maksimum tien hengelaars huisves. Die huisies is eenvoudig, maar meer as wat enige hengelaar voor kan vra. Daar is gemaklike beddens en lugversorging met spoeltoilette. Die gemeenskaplike kuier-area is gerieflik met genoeg plek vir hengelvoorbereidings, lang gesprekke en lekker kuier. Die kos is uit die boonste rakke en sjefs Eric en Nadine sorg vir ‘n ontspanne atmosfeer. Hulle is van Franse afkoms en is altyd byderhand met raad en hulp. Die houthuisies by Setta Cama sorg vir gerieflike verblyf. Die visse hier is aktief gedurende donker ligkondisies so hengel geskied meestal in die skemer tot in die nag, of baie vroeg in die oggend tot net na sonsopkoms. ‘n Tipiese dag begin 03:30 soggens met beskuit en koffie, waarna die bote jou na die monding neem, ongeveer sestien kilometer van die kamp af. Die gidse is ervare en jy raak gou gemaklik en gewoond aan die rit in die donker op die rivier. Die hengel is fantasties! Wanneer die son uit is en aktiwiteit begin afneem, keer jy terug kamp toe. Ontbyt word dan gewoonlik teen tien uur bedien. Hierna word stories gedeel en lekker gekuier. Dit is die klein goedjies wat ons altyd beïndruk. Jy kan maar net met moeë arms en lywe van die boot afklim en na ‘n lekker warm stort rustig raak. Die gidse spoel elke stok en katrol na elke sessie af en gaan almal se toerusting amper ongesiens deur. Voorslagte is gewoonlik alreeds vervang indien jy voor die namiddagsessie jou gerei gereed kry. Na middagete is rus onontbeerlik aangesien die aandsessie gewoonlik teen 16:30 begin met die vertrek na die mond. In ons ervaring sorg die aandsessie ook gewoonlik vir meer opwinding aangesien jy in die donker in hengel. Weereens sal al jou verwagtinge oortref wees wanneer jy teen ongeveer 22:00 terugkeer vir aandete en ‘n kort nagrus. Slaap wanneer jy kan slaap, jy gaan dit nodig hê! DIE HENGEL Ek kan nie aan woorde dink om hierdie hengel-ervaring te beskryf nie! Dit is iets wat jy nie vir iemand kan oorvertel nie en foto’s is ook nie altyd ‘n bewys van hierdie hengelparadys se opbrengs nie. Die feit dat ons groep teruggegaan het vir ‘n opvolg-avontuur spreek boekdele. Ons hengel meestal net kunsaas en al die hengel geskied van die strand af. Vlieg- en kunsaashengelaars baljaar onder die duisende jacks wat in skole deur die riviersisteem beweeg en seker maar elke lewendige prooi verorber. Die water borrel en bruis letterlik soos hierdie aggressiewe jagters in ‘n oomblik van voedingswaansin letterlik enige nabootsing sal verswelg. Dit hou heel oggend aan, elke oggend, elke dag, onbeperk. Jy kan letterlik jou longe uithengel! Aankoms by kamp na hengelsessie met een van die Barracuda-bote wat ons vervoer. Dit is egter die magiese tarpon, die onverskrokke cuberra snapper en die African threadfin wat jou strand toe trek. Daar is min, indien enige, ander plekke waar ‘n hengelaar tarpon van die kant af kan teiken. Verskeie van hierdie monsters word gedurig ook in die riviermonding deur vlieghengelaars vanaf die oewer geflous. Visse van 40kg tot 80kg is nie ongewoon nie. Die gevoel en opwinding as die son se laaste strale agter die horison verdwyn is verslawend. Dit is dan wanneer die see begin lewe, silhouette van akrobatiese monsters verskyn teen die swak lig en elkeen van die triljoene harders veg deur die nag vir oorlewing. Groot barracudas breek die water, skole jacks jag asof dit hulle laaste ete is en tussendeur herken jy daardie groot blink lyf, die een waarna jy op soek is, die een wat soms tot ‘n meter deur die lig trek in ‘n skouspel op jag na sy prooi, die tarpon! Dan, as die stilte van die nag jou verswelg, met net die klank van die branders en die gerusstellende wete dat jy darem nie alleen op hierdie oomblik êrens tussen nêrens is nie, begin jou keuse van kunsase verskuif. Cuberra snappers van tot 40kg en African giant threadfin van oor die 30kg patrolleer die kus snags en sal elke deel van jou gerei tot die uiterste beproef. Hierdie visse is eenvoudig net in ‘n ander klas en is brutaal sterk. Met albei ons besoeke was ons hengelgids Ewan Kyle, wie se kennis van die omgewing en sy passie vir die sport heel opmerklik is. Hy het al vele seisoene agter die rug as gids by Setta Cama en daar is geen twyfel nie dat hy ‘n groot rol in jou hengelsukses sal speel. Met ons laaste besoek was hy bygestaan deur Mike Dames, self ‘n passievolle hengelaar en ook ‘n bekwame gids. Hierdie mense sal uit hulle pad gaan om elke oomblik vir jou die moeite werd te maak en om seker te maak dat jy veilig in midde-Afrika is. Die skrywer met ’n pragtige jack crevalle gevang met knalprop. Mike Dames (hengelgids) en Francois Sprong. Skole jacks patrolleer die monding op soek na kos. Pieter Coertze met ’n pragtige sandhaai; die aas was 'n dooie harder. Nog ’n jack geflous met kunsaas. Hengelgidse is heeltyd byderhand vir hulp. LD Griesel met ’n longfin jack. LD Griesel met ’n longfin jack geflous met ’n shiver stick. Francois Sprong met ’n cubera snapper gevang in die riviermonding op 'n bucktail. Pragtige jack crevalle gevang deur LD Griesel op die noordebank. River snapper gevang deur LD Griesel. HENGELGEREI African Waters is ‘n hoogs professionele hengeltoer-organisasie wat jou vooraf deeglik inlig aangaande kunsase en hoeveelhede asook hengelgerei. Alle voorgestelde hengel-items kan ook sommer by hulle bestel word teen billike pryse. Een of twee oggendsessies word gewoonlik toegewy aan strandmeerhengel vanaf die bote met ligtegerei-kunsaas. Hier is ‘n 5000-grootte koffiemeulekatrol en ligtegerei 7- of 8-voet-stok voldoende. Jy gaan egter meeste van die tyd op die noorde- of suide-banke van die riviermonding bestee op soek na groter trofees. Hierdie hengel geskied met ‘n 11-voet-stok en ‘n koffiemeulkatrol wat lig maar ook sterk genoeg is om kunsase die hele dag te gooi. Vir strandmeerhengel vanaf die bote gebruik ons 30-pond-breekkrag braid en vanaf die strand 65 pond. Daar is ook hengelgerei en kunsaas in die kamp te huur of te koop sou jy êrens ‘n tekort hê of ‘n probleem ontwikkel. Ligtegereihengel op die rivier sorg vir groot vermaak – hier is LD Griesel. met een van die vele vangstes Hengel met aas is ook opwindend, uiters doeltreffend en vir dié wat dit wil probeer is daar geen tekort aan lewendige harders nie. Hiervoor gaan jy egter dan jou gewone strandtoerusting moet saamneem in die vorm van ‘n 13- of 14-voet-stok en ‘n gepaste katrol. Ons het egter min hierby uitgekom aangesien daar geen tekort aan belangstelling in die kunsaas was nie. Internasionale vlugte en bagasielimiete beperk die hoeveelheid hengelgerei wat jy kan saamneem. Jy moet dus mooi pak en die gewig van jou tas dophou aangesien die lugrederye baie streng is. Klere word gratis in die kamp gewas, dus bestaan die groot meerderheid van jou tas se inhoud uit hengelgerei. Katrolle kan as handbagasie geneem word, maar die spoele met lyn moet maar in die tas ry weens veiligheidsredes. Die lengte van jou stokhouer mag nie twee meter oorskry nie. Francois Sprong met ’n jong tarpon geflous met kunsaas. Longfin jacks kom in groot skole langs die kus voor en sorg vir langdurige aksie. OPSOMMING Setta Cama in Gabon sal elke verwagting van jou oortref. Die seisoen duur van September tot April en hoe meer dit reën hoe beter. African Waters is uiters professioneel en weens die afgeleë posisie van die kamp word alles deeglik beplan. Hulle is intens betrokke by die bewaring van ons visbronne en speel ook ‘n integrale rol om die plaaslike gemeenskap op te hef en werkgeleenthede te skep. ‘n Getuigskrif van hulle toegewydheid het met ons laaste besoek te voorskyn gekom: Weens onvoorsiene omstandighede kon ons nie terug van die kamp af na Libreville per vastevlerk-vliegtuig of per kommersiële helikoptervlug nie. Ons is egter meegedeel om nie te bekommer nie. Op die geskeduleerde vertrekdatum en -tyd land daar toe ‘n Puma-helikopter van die Gabonese lugmag langs die kamp op Setta Cama! Al nege van ons met bagasie en al is gelaai vir die Puma-vlug terug oor die woud, wat iets is wat ons almal vir die res van ons lewens sal bybly. Moet my nie vra hoe dit gereël is nie. In tye van onsekerheid is vriende en herinneringe onontbeerlik – dit is lekker as ‘n gedagte of droom skielik vlerke kry en waarheid word. Ons groep het geen tekort aan oortuiging nie. Almal spring in en help met reëlings en e-posse en hemde en hoede … en … en … en … En voor jy jou oë uitvee, ruik jy die jetfuel en hoor jy die dakka dak! *Kontakte: www.africanwaters.net; epos na: info@africanwaters.net; kontak Robb of Keith direk op Tel 033 342 2793. Kry jou lusmaakfoto’s by @african_waters op Instagram. Die huidige wisselkoers gaan wel jou sak ruk, maar dit sal elke sent die moeite werd wees …

GABON: ONVERGEETLIKE HENGEL-ERVARINGE

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

Guess the mass of the CARP and WIN an Adrenalin Fishing Tackle Hamper

How to stay competitive in tournament angling

BAARSHENGEL-AKADEMIE: Kul hul met ’n wurm – Die Trick Worm

Is dit belangrik om fiks te wees as jy op ‘n hoë standaard wil kompeteer in hengel?

Spangled Emperor Vakansieverrassing!

Gooi, Krag en Uithouvermoë vir toernooie.

AN AMERICAN IN AFRICA: A Bass Angler exclusive with Ray Scott

LESERS | READERS

NEXT LEVEL BASSING: Targeting Transition Zones In Late Winter

MY BLOEMHOF PB & BONANZA WINNING CARP!

Guess the mass of the CARP and WIN an Adrenalin Fishing Tackle Hamper

How to stay competitive in tournament angling

BAARSHENGEL-AKADEMIE: Kul hul met ’n wurm – Die Trick Worm

Is dit belangrik om fiks te wees as jy op ‘n hoë standaard wil kompeteer in hengel?

Spangled Emperor Vakansieverrassing!

Gooi, Krag en Uithouvermoë vir toernooie.

AN AMERICAN IN AFRICA: A Bass Angler exclusive with Ray Scott

LESERS | READERS

NEXT LEVEL BASSING: Targeting Transition Zones In Late Winter

MY BLOEMHOF PB & BONANZA WINNING CARP!

Guess the mass of the CARP and WIN an Adrenalin Fishing Tackle Hamper

Pro Mania Top 10 | June 2022 – Week 4

U. ELEGANT FUEL BLOEMHOFDAM BONANZA 2022

R499.00 per year

R49.00 per month

R299.00 per year

R29.00 per month

R299.00 per year

R29.00 per month