Harde hengel by Mazeppa

Na hulle die hoeveelste foto van nog ’n groot haai van Mazeppa op sosiale media gesien het, moes Neville Barnard en sy vriende, Eldrid Damos en Andy Morgen net weer plan maak om te gaan. Die probleem was maar net om te besluit wanneer. Ek was al so paar keer daar in Desember maar ek het probleme opgetel met die nie-hengelaars wat dit nie baie amusant gevind het nie dat ek groot haaie tussen hulle deurtrek op die swemstrand. Jy kan die haaie probeer land op die bekende eiland punt maar dit is baie veiliger vir die haai en die hengelaar om bietjie meer tyd te vat en die vis eerder op die strand te gaan land, maar as daar swemmers in die water is, is dit beslis nie ’n goeie idee nie. Die datum is toe aangeskuif tot na die skoolvakansie in Januarie. Dit is baie stiller as in Desember maar steeds warm genoeg vir die groot haaie om in die area te wees, en die kabeljoue is ook gewoonlik nog in redelike groot getalle teenwoordig. Oor die hele Desember het ons die stroppe gemaak en die weer dopgehou en alles so goed beplan as wat ons kan. Uit vorige ondervinding het ek geweet dat jy so groot en sterk as moontlik moet gaan met jou stroppe en gerei om konstante sukses by Mazeppa te hê. Stroppe My stroppe bestaan uit baie dik 2.8mm nylon van 20m lank wat dien as eerste voorslag. Voor op die strop word ’n groot ‘Longliner’ knip geheg waaraan die bytstrop vasgeknip word, wat bestaan uit 2mm tot 3mm SS staaldraad. Gewoonlik is daar dan ’n enkel groot sirkelhoek of dubbel “J” hoeke. Die beste gerei vir die area is lang sterk seestokke met groot katrolle met dik vleglyn as hooflyn. My hoofgerei bestaan uit 14vt medium- en swaaraksie stokke en groot draaispoelkatrolle met 50, 80 en tot 150-pond vleglyn op. Enige iets kleiner is eintlik maar net ’n mors van tyd vir diè deel van ons kus. Vir die kabeljoue het ek swaar spingerei saamgevat – 20-pond vleglyn met ’n 0.55 fluorocarbon voorslag. Met hierdie gerei kan jy kabeljou teiken op ‘dop shot’ en natuurlik ook kunsaas soos ’n “Chiselnose Plug’ gooi vir leervis. My enigste haai vir die sessie, ’n mooie van 147kg. Mazeppa het baie mooi diep water punte waarvan die bekenste die ‘eiland’, ‘boiling pots’, ‘shark point’ en ‘salt rock’ is. Die punte is ideaal om aas vanaf te gooi en te gly maar dit is ook een van die heel beste plekke om lyne met ’n vlieër te kan uitvat. Soos altyd sou vlieërhengel ’n groot deel van ons hengel uitmaak maar ons sou ook die baie kontroversiële dronehengel beoefen waaroor almal deesdae so baie praat. My vriend, Andy Morgen het ’n Cuta Copter aangeskaf en dit sou die eerste keer wees dat ons die tipe hengel voluit sou probeer. Ons het gehoop dat die meeste dae perfek sou wees vir vlieërhengel maar indien die wind baie lig is of verkeerd waai, sou die drone beslis die manier wees om te gaan. Twee mooi kabeljoue gevang binne 15 minute. Met groot afwagting het die tyd nader en nader gekom maar toe gebeur iets wat niemand kon voorspel nie - ’n tifoon tref Madagascar en vir die volgende week of wat is die see lelik omgekrap met groot skade wat deur onverwagte groot golwe wat die kus getref het. Vir die eerste week van ons hengelsessie wat die deinings massief en die wind het konstant oos en suid-oos gewaai wat die see nog groter en baie koud gemaak het. Dit was ’n doodsteek vir die haai hengel. Maar ons was hier en moes maar die beste van ’n slegte saak maak. Die lyne is elke dag perfek geplaas, met party wat uitgegly word en ander op 200m, 300 en 500m ver uitgevat word met die vlieërs as die wind reg waai, en met die Cuta Copter as die wind gaan lê. Die aas wat ons tot ons beskikking gehad het was geelstert, tuna koppe, dorodo koppe, sandhaaie, seekatte, kolsterte, kabeljoue en knorhane wat ons daar gevang kon kry. Net so terloops, die beste aas op die sessie was geelstert en sandhaai gewees. Die weer was net heeltemal teen ons die eerste week en ons moes dit maar op die ken vat en net aanhou probeer. Ons het die tyd ook nie gemors nie. Ons het op die dae wat die see regtig sleg was eerder rivier toe gegaan en vir sandhaaie gehengel wat ons dan weer gebruik het as aas sodra hengel weer moontlik was in die see. My gidse, Zola en Freedom, besig om my te help om ’n groot aas uit te sit met die vlieër. Tunakop en heel seekat kombinasie. Dat dit so stil was het ons wel genoeg tyd gegee om lekker met die drone en vlieërs te speel. Ek moet sê ek was erg skepties oor die drone ding, maar ek was verbaas om te sien wat die drone kon lig. Ons het maar klein begin en net kort afstande gehengel maar later het ons die drone tot op sy maksimum afstand van 500m uitgevat met koppe wat al hoe groter en groter geraak het. ’n Hele geelstert lyk na ’n groot aas maar hulle is maar net so 800-900g, wat kinderspeletjies is vir die Cuta Copter wat ’n dra kapasiteit het van 2kg. Die belangrikste was om elke keer eers die drone se GPS en gyro’s te stel en alles reg op te stel voor dit die lyn uitvat. Dit het sy nadele soos natuurlik die prys, die feit dat jy beperk is met die gewig wat jy kan uitvat en dat hulle nie van sterk wind hou nie, maar die voordele maak op vir dit. Jy kan dit omtrent van enige plek af stuur en soos ek genoem het is ’n kop van 1kg eintlik baie groot, so die grootte van die aas was regtig nie ’n probleem nie. Dit is ook baie vinnig - as die stokke klaar opgestel is kan 3 lyne binne 5 minute 500m ver uitgevlieg word. Ek sal nooit net ’n drone of net vlieërs by my hê nie. Altwee het beslis ’n plek in my hengel en veral by plekke soos Mazeppa of St. Francis waar lang rotspunte diep in die see in loop. (Kyk gerus op my Instagram (barnarneville) die video wat ek gemaak het van een van my ase wat ons uitgevat het met my vriend se drone. Regtig indrukwekkend. Beslis iets waarna ek sal kyk voor ek weer gaan). Dit gee jou meer effektiewe hengeltyd langs die see met ’n groot aas ver uit. Hier is Neville besig om ’n groot driehoek vlieër uit te sit van Boiling Pots af. ’n Noord-Oos wind is die beste vir die plek langs Mazeppa se kuslyn. Die verandering in die weer kon nie gou genoeg kom nie en die eerste sterk weste wind van ‘boiling pots’ se kant af (dit is suid van Mazeppa ), het ons almal sommer in ’n goeie stemming gehad. Almal wou eerste hulle lyne met die vlieër of drone uitvat na water toe wat meer as ’n week laas gevis is, en almal van ons het gou ons stokke, stroppe en aas reggekry. My vriend, Eldrid Damos het besluit om sommer gou ’n geelstert uit te gly terwyl hy sy kans afwag om ’n lyn dieper te kry. Dit was nie lank nie toe sê hy my dat daar iets by sy aas besig is. Met sy lyn wat styf trek en slap raak het ons sommer geweet dat ’n Raggie die sondebok is. Hy het vasgemaak en na ’n kort geveg het hy ’n mooi mannetjie Raggie in die “garage” gelig aan die linkerkant van die eiland punt. Die lengte tot gewig omskakeling tabel het vir ons ’n gewig gegee van 147kg. Nie te sleg nadat ons dae en dae net mooi niks behoorlik gehaak kon kry nie! Andy was volgende aan die beurt maar hy kon die haai ongelukkig nie behoorlik vaskap nie. Dit was eintlik ’n groot probleem daardie week. Baie van die haaie oor die volgende paar dae wou net nie lekker die aas mooi optel nie. Jy kry ’n kwaai trek maar sodra jy die stok optel los die haai net die aas en kom nie weer terug nie. Drie-uur die middag kry ek ook so ’n trek maar omdat ek ’n baie groot sandhaaikop as aas gebruik het besluit ek om net die aas te los en te kyk wat gebeur. So kwart oor drie hardloop my stok so stadig en ons gee die haai genoeg tyd om die aas mooi te sluk. Na so 80m word die lyn styf getrek en die geveg was aan. Ek was gou terug huis toe en is gebel en gesê dat ek gou moet terugkom want ek is aan en dit voel na ’n mooie. Ek het teruggegaan en die stok oorgeneem en die geveg het begin. Met die sterk gerei wat ek gebruik kon die haai nie maak soos hy wil nie en is redelik gou onder beheer gebring. Die probleem was om dit op die regte plek te kry. Ek sou hom nie graag op die rotse land op die eiland se punt nie en het eerder hom weer laat uitswem om te kyk of hy nie dalk regs uit wou swem sodat ons hom eerder op die swemstrand regs van die eiland kon uithaal nie. Dit is net baie veiliger vir ons en die vis. Na twee keer se probeer het hy geswem waar ons hom wou hê en ons het die pad strand toe gevat. Dit is eintlik waar die geveg begin het want dit was laaggety en elke keer as die haai die sandbank gevoel het, het hy omgedraai en weer ’n klomp lyn gevat. Dit het seker ’n uur gevat om hom die laaste 300m te bring deur die branders. Op diè stadium kon ek voel dat die dalk nie so klein is soos wat ek aanvanklik gedink het nie. Die eerste keer dat sy vinne by die branders uitgesteek het kon ons sien dat dit ’n groot bronsie was. As jy eers jou hande op die 2.8mm nylon kry is dit amper soos om ’n gaff te gebruik. Hy is basies dan geland. Vat net jou tyd en wag vir die water om terug te trek. Hy was besonder dik vir ’n mannetjie en het ’n lengte gehad van 220cm wat omskakel in so 145kg. Nie ’n monster nie maar na niks oor die laaste paar dae was hy baie welkom. Ons het die groot 20/0 sirkelhoek uit sy bek gehaal en hy het ongedeerd terug geswem. Oor die laaste twee dae het ons nog ’n kans of wat gehad met haaie maar kon niks aanslaan nie. Die mooi kabeljoue wat wel uitgekom het, het darem so klein bietjie troos gebring. Dit is eintlik baie lekker om kabeljoue in Mazeppa te teiken. Daar is baie plekke wat bekend is vir goeie vangste van die visse in alle weersomstandighede en wind rigtings. My gunsteling tegniek om hulle te teiken is op dropshot en ligte spingerei. Jy kan die kunsvissies op gewone loodkoppe hengel maar die manier is nie ideaal tussen al die klippe waar ons die kabeljoue soms vang nie. Jy sit baie vas. Om dit te voorkom gebruik ek die kunsvisse amper soos met baarshengel met die hoek wat binne in die vis gesit word om vashaak te voorkom. Vooraan sit ek dan ’n 2 ons glygewig. Die plastiese kunsvissie word dan in plek gehou met ’n tande stokke of stukkie dik nylon wat ek brand aan albei kante. Met diè manier kan jy baie gerieflik tussen struktuur hengel sonder om bang te wees dat jy elke tweede gooi aan iets gaan vassit. Enige 8vt tot 11vt spinstok sal werk solank dit so 1.5 tot 2.5ons gewig gemaklik kan gooi. Die 5000 of 6000 grootte katrol met 15 tot 20-pond vleglyn op is ideaal. Ek sit dan so 1m fluorocarbon vooraan sodat die visse nie die lyn so maklik kan sien nie. So kom ons sessie op ’n einde. Nie die beste sessie wat ek al hier gehad het nie maar soos ons almal weet, kan jy nie die weer bestel nie. Ons het hard gehengel en aan die einde kon ons darem so ’n paar mooi haaie afneem en so ’n paar visse terugbring vir die braai.