HARTBEESPOORTDAM: Ifafi en ‘Om Die Dam’ Combo

WOORDE: Riaan ‘Alleman’ Riekert FOTO’S: Anel Riekert Jy kan by nou al weet dat waar die woord ‘Riaan Alleman’ is, is daar vir seker ‘n storie agter elke storie. Weereens het ek nie teleurgestel nie, en het die naweek saam met vrou Anel by Ifafi absoluut groot gegaan en elke oomblik geniet, al was van die oomblikke bloedsweet en trane gewees. Dit was so mooi in die hartjie van die winter met warm baadjies, baie komberse en ook was Riaan Alleman se hardloopsak ingepak. Ja, julle lees reg, my hardloopsak. Dis weer daardie tyd van die jaar vir die Om Die Dam-ultra-marathon en soos altyd die perfekte oefenlopie voor ek weer die Comrades einde Augustus gaan aandurf. Maar dis ook natuurlik my seisoen vir groot karpe – die koue weer bring mos daai groot karpe en sodoende is Ifafi perfek geleë sodat ek twee vlieë met een klap plat kan klap. Dis Donderdag en die marathon vind eers Saterdag plaas, so dit gee vir Anel en ek darem bietjie hengeltyd voor en na die wedloop. By Ifafi aangekom was dit opvallend hoe skoon die water was; ‘n paar maande terug was dit net orals watergras, seker die goeie reën wat gesorg het dat alles bietjie skoon spoel. Dit was ook opmerklik dat meeste van die hiasinte ook nie meer daar was nie, ons was bly om te sien die nuwe projek werk om dit te beheer. Ons sou wel later uitvind dat die projek ook nadele inhou, maar daarvan vertel ek later meer. Ons het nie gras onder ons voete laat groei nie en het dadelik begin kamp opslaan; moet sê ons Sahara ‘Junior’-tent van Tentco is ‘n juweel en regtig baie maklik en vinnig om staan te maak. Die spasie in die tent, veral die dakhoogte is besonders, onthou ek is nie van die kortste manne nie en ek het meer as genoeg spasie om my bed en natuurlik bo my kop gehad. Ons Tentco Sahara 'Junior’-tent. Ons ruim tent aan die binnekant – die spasie is werklik indrukwekkend. Met die kamp opgeslaan het ek die fynere afwerking vir Anel gelos en het begin regmaak vir die hengel. My laaste besoek aan Ifafi sal ek nooit vergeet nie: 18 vis waarvan 17 bo die 10kg was en natuurlik ook ‘n paar persoonlike bestes. My persoonlike beste van 15,40kg wat ek by Ifafi gevang het. Met dit nou agter my was die fokus op hierdie sessie en ek kon net vertrou dat dit weer so goed sou wees. Met my vorige besoek was ek vars in die spesie-tegniek, maar intussen het ek só baie geleer by Gilbert Foxcroft dat ek geglo het ek sou dit suksesvol in hierdie sessie kon toepas. Die mees belangrikste van so ‘n sessie is jou voorbereiding, en om goeie particles voor te berei is ‘n 3-dae proses, waarvan 24-uur daarvan is om net alles te week voor die kookproses begin. Elke hengelaar het maar dit waarin hy glo maar die belangrikste wat ek geleer het, is maak seker jou kaboempitte is lekker sag en jou hempsaad is oopgebars, anders was al die moeite verniet. Onthou ook om by Ifafi nie ‘n klomp voer op een slag af te gooi nie want die water word baie gehengel en daar is meer as genoeg voer in die water, en gebruik die mousetrap-metode elke slag as jy lyne invat. Die proses is aan die gang om die voer te maak, hier sny ek my boilies in die helfte om by die voer te voeg. Die hempsaad en kaboempitte word vir 24 uur in warmwater sag gemaak voor dit gekook word. Hier is die klaar gekookte kaboempitte in water met lekker baie growwe sout. Die tigernuts en pitte saamgevoeg, onthou tigernuts moet ook 24 uur lê voor jy dit kook en alles moet drie keer gewas word voor dit gekook word. Ek het ook besluit om met die sessie meestal gebruik te maak van die spinner rig met verskillende hoekase op die haar. Met my vorige besoek hier het ek al my vis geland op pienk en wit pop-ups, so natuurlik sou ek twee stokke met dit laai. Adriaan van der Merwe wat destyds saam met my was, het weer al sy vis geland op tigernuts so die ander twee stokke is daarmee gelaai, so iewers moes iets werk. Ek glo ook aan die PVA-sakkie gevul met Mainline se voer net vir daai ekstra voer naby die aas. Die bekende spinner rig. Wat die spinner rig spesiaal maak is die feit dat jy enige aas op hom kan gebruik. Hier het ek 'n pop-up as voorbeeld gebruik en dit is hoe die aas in die water sal vertoon. My voer is klaar en reg om daai groot visse te lok. Hier is my wenaas van laasjaar, die pienk pop-up wat dié keer net vir babers gesorg het. Met alles gelaai en reg vir aksie het ek begin om die lyne een vir een sorgvuldig in te vat en met presisie neer te sit. Onthou ek het vroeër gepraat van die hiasinte? Wel, met die sak van die lyne het ek gevoel die bodem is baie sag en sponserig met geen harde areas om die aas op te plaas nie. Die nagevolg van die sukses met die hiasinte het veroorsaak dat die plante sink en het dus ‘n matras op die bodem gevorm, so dit sou die sessie baie moeilik maak! Hierdie is die ander wenner, my wit pop-up. Ek probeer iets anders, Mainline se quads, een van die beste ase by Aqua Paradiso. ‘n Dubbel tigernut met kurke in dit geboor om hulle mooi in die water te laat balanseer. Dit was egter nie lank nie toe skreeu die eerste alarm; my hart het vinnig geklop al het ek gevoel dis nie ‘n Ifafi-monster nie. Die vis het snaaks geboks en tot my teleurstelling het ek ‘n klein baber op die pop-up geland. Ek het daar en dan besluit dat pop-ups my net hoofpyn gaan besorg en het die aas verander na die tigernut necklace. Dit bestaan uit ‘n reeks tigernuts en kurk wat jy in ‘n halssnoer-vorm aan die spinner rig sit (dié spesifieke aanbieding het vir Gilbert-hulle die mooi karpe besorg met die onlangse ‘Hier Gaan Ons Alweer’-sessie. Wat hierna gevolg het was seersekerlik ‘n eerste vir Riaan Alleman by Ifafi – ek het nie minder nie as ses babers geland en dit op enige aas wat ek aan die hoek gesit het. Ek was skoon moedeloos en moes hard kopkrap om my weg deur die babers te vind na die karpe toe. Ek weet ook Harties se karpe hou van mielies en ek het besluit om ‘n tigernut met een 'fake maize'-pit te probeer, en dit was die probeerslag werd want kort voor lank land ek ‘n karp, nou nie een wat die skaal laat kreun nie, maar darem is dit karp en was daar weer hoop vir die sessie. Die tigernut-kombinasies vir my laaste aand; dit verskaf ‘n beter idee van hoe die tigernut necklace lyk. Met aand een agter die rug was ek reeds vroeg uit die vere om lyne in die water te kry. Ek het vroeg-vroeg vasgemaak, maar weer met ‘n baber; ek kon my oë nie glo nie maar ten minste ruik dit soos vis. Die res van die dag was stil en niemand op die oewer het iets geland nie, maar van opgee was daar geen sprake nie, kry sal ek hulle kry! Teen sterk skemer en met die mooiste sonsondergang het ek my aandlyne ingevat – more is dit tyd om daai 50km se hardloop aan te pak, so laat hengel is nie op die kaarte nie. Met slaaptyd het ek vir Anel gesê ek gaan die stokke maar inlos want net dalk byt daai monster karp vanaand, maar dit was egter nie so slim nie want more is dit vroeg opstaan en ek het die slaap nodig … Harties bly maar mooi as die son ondergaan, lyk soos ‘n kunswerk! Die aand het toe geen vis opgelewer nie en teen 04:30 was ek op met koffie in die hand reg vir my wedloop. Ek moes egter die stokke inbring voor ons vertrek. Met slegs 10 minute voor ons moes ry skreeu my een alarm – perfekte tydsberekening of dalk nie – ek was gedruk vir tyd en moes die vis maar hard boks en vinnig inbring. Dit was ‘n mooi karpie en my oggend het sommer met ‘n groot glimlag begin, maar met die fotosessie het die vis egter besluit dit het ander planne en Riaan Alleman is na sy wedloop toe met ‘n lekker slymstreep op sy sweetpak … Hier spog ek met een van die karpe, die een net voor my wedloop. Met die aaklige Covid-regulasies nou nie meer so streng nie was dit lekker om aan te tree saam met 2000 ander atlete, maar net een van hulle ruik dan soos vis! Die opwinding was groot en almal was slaggereed om die 50km om die dam aan te pak. Vir diegene wat nie weet nie, die ‘Om Die Dam’ is seker een van die meer moeilike ultras op die kalender en is ‘n goeie oefensessie vir die groot Comrades later vanjaar. Dit was weereens vir my opvallend dat meeste van die hiasinte weg was soos ons plek-plek die dam kon sien in die wedloop, maar daar was egter nog baie by die damwal maar ek glo in die volgende paar maande sal dit ook iets van die verlede wees. Hier is Riaan Alleman op die 44km merk, amper klaar. Ek en Anel by die einde, nou vinnig terug kamp toe om verder te hengel. Anel was darem op die roete en het my mooi ondersteun, en net so bietjie oor die vier ure later het ek die wedloop voltooi, en was dit tyd om terug te keer om te gaan hengel. Na ‘n kort middagslapie is die stokke weereens gelaai vir die aandsessie, nou net hoop en bid die snorre bly weg en die mooi karpe word honger. Die aandsessie was baie meer suksesvol en ons het darem nog twee karpe geland, ongelukkig nie groot nie maar darem beter as niks. Hierdie een is op die laaste aand geland; kyk net sy lekker ronde magie. Ongelukkig was dit die volgende oggend in die koue vroeg oppak, maar van een ding kan julle seker wees, Ifafi sien Riaan Alleman weer, in September en dan gaan dit ‘n perd van ‘n ander kleur wees! Hoe sê ek altyd: "Waar is dit lekker? Hiér is dit lekker!"

HARTBEESPOORTDAM: Ifafi en ‘Om Die Dam’ Combo

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

SOCIAL BASS FISHING: Remind Yourself Of The Good Times!

THE BLUE ECONOMY

UIT & TUIS: NSRI – ’n Unieke en Blywende Geskenk …

COVER: December 2023

DIE KATROLLE SING: Reg en geregtigheid het geskied …

MY TURN | MY BEURT: Stywe Lyne Tight Lines December 2023

UIT & TUIS: Vis in die boot, waar is my sandale …

LESERS | READERS: November 2023

Major Bass Fish-Off at Albert Falls

JUNIORS: November 2023

SOCIAL BASS FISHING: Remind Yourself Of The Good Times!

THE BLUE ECONOMY

UIT & TUIS: NSRI – ’n Unieke en Blywende Geskenk …

COVER: December 2023

DIE KATROLLE SING: Reg en geregtigheid het geskied …

MY TURN | MY BEURT: Stywe Lyne Tight Lines December 2023

UIT & TUIS: Vis in die boot, waar is my sandale …

LESERS | READERS: November 2023

Major Bass Fish-Off at Albert Falls

JUNIORS: November 2023

SOCIAL BASS FISHING: Remind Yourself Of The Good Times!

Von Du Rust is ‘Von-derlik’

THE BLUE ECONOMY

R550.00 per year

R55.00 per month

R399.00 per year

R40.00 per month

R399.00 per year

R40.00 per month