‘Hemel op aarde’ – Casa da Pesca en Tiervisse

Ek het hemel op aarde ontdek. Dit is dalk nie net die medehengelaars, die Casa da Pesca Lodge of die Cahora Bassadam nie, maar eerder ’n kombinasie daarvan. Ek en my vier vriende, Ulrich, Dean, Jaco en Ian het ons gate uit geniet. Ons het natuurlik elke dag geswem om die 45 grade Celsius hitte ’n bietjie te breek, en het selfs weer ’n duik laataand na ete geneem voor ons gaan slaap het. Ons het die aande lekker gesels oor die dag se hengel terwyl ons ’n ou verversintjie geniet het. Ons het verskeie grootte tiervis gevang van 1kg tot 8,5kg. ’n Hengelaar van ’n ander groep besoekers, Gareth Sparks, het soos my geluk dit wil hê die nuwe Casa da Pesca tiervisrekord van 12,175kg gevang. Net nog ’n bewys dat Emildo en sy span nie speel nie. My PB van 8,5kg het sommer klein gelyk teen Garreth se 12,175kg. Ulrich het sy PB gebreek met ’n 6kg vis en Dean en Jaco het ook hul PB’s gebreek. Ian het laasjaar ’n vis van 7,2kg gevang, maar moes die keer tevrede wees met ’n 4,5kg vis - natuurlik glad nie ’n slegte vangs nie. Ons het weer soos gewoonlik baie groot vis verloor, maar die gesegde heet mos: die groottes kom altyd weg! AS JY GAAN Cahora Bassa is so groot, hy maak sy eie getye en ’n mens kan sien hoe die dam se water beweeg. Die feit dat die dam amper 300km lank en gemiddeld 20km breed is, laat mens net wonder hoe so baie water kan beweeg. Die weer is nie altyd dieselfde op al die dele van die dam nie. Die dam is werklik groot, om in perspektief te stel, so groot soos vanaf Pretoria na Harrysmith! Wanneer die wind opkom kan die dam nogal lelik omgekrap raak met die golwe wat van 1.5 meter tot 2 meter hoog kan raak. Met al die feite in gedagte is dit net logies om die beste gidse te hê om jou op die dam te vergesel. Dit is natuurlik hier waar Emildo Sada van die Casa da Pesca Lodge sy ondervinding as nie net ’n Proteahengelaar nie, maar ’n fyn kenner van die dam inkom. Hy het 16 jaar ondervinding van die dam en jy kan dit sien aan die grootte en hoeveelheid vis wat deur hom en sy gidse gevang word. Hy en sy vrou Annetjie bly permanent op ŉ eiland naby die groot waters van Cahora Bassa. Die lodge is baie goed toegerus en sy berei die lekkerste kosse voor. Ons akkommodasie was uit die boonste rakke en ek kan enige iemand aanbeveel om die uitstappie na Casa da Pesca by Cahora Bassa aan te pak. Die Lodge het ook hengelgerei wat jy kan huur indien jy nie jou eie gerei wil saam met jou af vlieg nie. Casa da Pesca Gareth Sparks met ’n 12,175kg tiervis, die nuwe Casa Da Pesca rekord! Cehebra Bassa Die damwal waar die oorspronklike wal gebou is, was Cehebra Bassa genoem, wat beteken: “plek waar die werk nie kon aangaan nie.” Die Portugese wat die dam begin bou het, het dit Cabora Bassa gedoop. Dit is ook die rede hoekom jy nou nog mense kry wat die dam Cabora Bassa noem. Die Mosambiek regering het later die dam se naam verander na Cahora Bassa en in 2007 ŉ 80% aandeel van die dam beheer van Portugal gekoop.