Hengel Harties Saam Met FISH

Om Harties te hengel is altyd n groot uitdaging. Jou beste vriend is die App “Windfinder” en jy moet seker maak waar die groen gevaar homself bevind. My voorkeur oewer is verseker Meerhof - dit is nie net ’n oewer wat elke dag skoon gemaak word nie, maar ook ’n oewer wat ongelooflike mooi vis hou. Dit is ’n oewer wat jy nie moet jaag om jou stokke in te kry nie. Die groen gevaar bepaal die spoed wat jy gaan hengel. Harties is verseker ’n dam wat by my spook as ek nie by hom uit kom nie. Die laaste twee maande hengel ek die land vol. Van Bivanedam al die pad tot by Spitskopdam in die Noord-Kaap. FISH het die Spitskop Bonanza in die Noord-Kaap geborg en ek was bevoorreg om FISH daar te verteenwoordig. Ek sit by Spitskop en hoor hoe my foon sy kop verloor met al die boodskappe. Maak die foon oop en sien hoe een van FISH se borg hengelaars, Dünelle Stergianos, pronk met ’n prag karp van 12,92kg by Meerhof oewer. Maandag terug in Pretoria maak ek Windfinder oop en kyk ek wanneer ek Harties sal kan hengel. André op sy "happy place" op die oewer van Hartbeespoortdam waar hy gereelde sukses met van dié dam se pragkarpe geniet. Die enigste dag wat reg was, was die volgende dag. Ek noem vir Arno van Rooyen (en nee, hy is nie familie nie) dat ek Harties wil gaan hengel en hy sê hy is beslis in. Vyfuur die oggend trek ons weg uit Pretoria en kom 5:45 by Meerhof se hek aan en wag dat hulle oop maak. Met die inry sien ek dat daar steeds groen gevaar in die area is. Met die afpak hou ek altyd die water dop om te kyk waar die vis hulleself wys. Dit is doodstil en net ’n klomp klein vis wys. Maar ek ken Meerhof en ek weet later sal die groot vis hulle koördinate deur stuur met ’n klomp spronge. Ek laai my aas van keuse: 50ml sagte Pokkol floats en Pokkol dip op die bol. Die oggend gaan maar stadig en ons vang ’n paar 1kg karpies en met elke byt verwag ons daai groot Harties monsters. So 11-uur spring daar ’n monster so 20m van die kant af en ek besluit om my 10vt stokkie met my nuwe 4000 katrol van Pretoria West Traders op 20m uit te toets. Nog een kyk voor André die pragtige spieëlkarp vrylaat. Tien minute later klink dit asof ’n Putco bus op die Molotopad my strop opgetel het. Ek tel die stok op, los hom dat hy hardloop en verduidelik vir Arno dat dit ’n Baber is wat so hardloop (ek ken mos die dam en net ’n baber hardloop so in Harties). Die geveg is aan! Eers vat ek lyn en dan die “baber”. Groot is my verbasing toe die vis net voor my lyf wys dat hy skubbe het. Nog nooit het ek ’n rem stelsel so vinnig los gedraai nie. Nou is dit die stres om daai mooi vis in my Mitchell net in te kry. Ek gebruik 7-pond Trilene Max met nommer 1 FISH hoekies en ek kan sien dit sal ’n persoonlike beste wees. Die vis draai nader en tot my verbasing sien ek dit is ’n Mirror. Arno skep die vis en ek kan my oë nie glo nie! Ons skree soos twee tiener meisies op die oewer en weet die vis is SPECIAL. Dünelle Stergianos met een van Hartbeespoortdam se karpe, dis hierdie tipe visse waarvoor hengelaars daarheen reis. Die vis word versorg op die “unhooking mat” en word geweeg - 16kg, ’n PB Mirror vir my! Die gevoel kan ek nie beskryf nie. Arno kry die eer om my nat te gooi en ek stuur haar met sorg weer terug die dam in vir ’n ander man om sy droom te bewaarheid. Ek sit daar en dink aan al die wonderlike vis wat Meerhof my mee bederf het die laaste 2 jaar. Die wen aas is verseker Pokkol soft floats met Pokkol op die bol. Pokkol het al gesorg vir oor die 22 PB’s net tussen my vriende. Beslis ’n moet in jou kas. Dankie Here vir U Blessings. Die sagte Pienk Sweets/Musk geur waarmee "Pokkol" vermeng is blyk asof dit 'n groot-vis aanlokker kan wees, beslis vir Hartebeespoortdam. Twee Pokkol-geur floaties wat in die voerbal terug gesteek is met Pokkol op die voerbal het weereens die grote geflous.