Hengel in Prieska

Na afloop van ons jaarlikse besoek aan Die Kaap van Storms, waar die Argus fietstoer vir die eerste keer in die geskiedenis uitgewaai het, keer ons terug huistoe so al langs die Weskus en deur die Noord-Kaap na Prieska, ons bestemming vir die volgende dag of twee. Vanaf Kaapstad ry ons op met die Weskus - Yzerfontein, Citrusdal oor tot by Clanwilliam. Die oop landskap van dié wêreld kan ‘n mens wye draaie laat ry veral as daar vir honderde kilometers letterlik niks is nie; ons het amper “Moedverloor” maar gelukkig loop alle paaie iewers heen en ons kon darem veilig by ons bestemming aankom. Daar stop ons oor vir ontbyt en eet die lekkerste spek en eiers so van die plaas af. Oppad uit maak ons brandstof vol en by die T-aansluiting wys die GPS dat ons moet regs draai Calvinia oor. My geheue vertel my ek moet eers terug N7 toe en dan verder aan afdraai Calvinia toe. Annetjie se slimfoon dui ook aan ons moet regs, die R364 wat ons via Calvinia, Williston en Carnavon na Prieska sal vat. So draai ons regs en vat die langpad aan, deur die Sederberge en oor die Kliphuisrivier al met die pas verby Heuningvlei. Wat ‘n pragtige landskap, met die mooiste rotsformasies wat jy aan kan dink. Na sowat 70 of 80 km, word die pragtige teerpad skielik ‘n grondpad; ons wonder of ons ‘n afdraai mis gery het of wat. So stop ons en bekyk eers al die kaarte op die tegnologie tot ons beskikking. Sowaar, dis steeds die R364 en ons is op die regte pad. Die pragtige Oranjerivier by Prieska is ‘n spesiale plek om ‘n lyn nat te maak. Te ver om terug te draai, en ons besluit om maar aan te gaan, dit kan seker net ‘n kort stukkie wees. Maar nee, ‘n honderd kilometer se grondpad, wat aanhou en aanhou en dis net stof en hitte en karoobossies – nie eers diere of mense of karre nie! Die volgende oomblik verstaan ons alles - hier is die bordjie wat wys “Moedverloor”! Hier is ons dus op “Moedverloor se Vlakte” - dis toe altyd ‘n regte plek en nie net ‘n idioom nie! Ek kon darem vir my ‘n mooi plekkie op die oewer uitgrou vir die dag se hengel. So vat ons maar die stuk grondpad aan teen bykans 40 grade Celsius en kom later in Calvinia aan. Ons volg nou net die teerpaaie en ry via Williston, Carnavon, Vosburg en Britstown na Prieska. Telkens was daar ‘n korter roete, maar telkens was dit ‘n stofpad. In Prieska aangekom, ry ons so 7km uit die dorp om by ons oornag- en hengelbestemming, Excelsior River Cottage, uit te kom. Skielik is alles groen en al wat jy sien is landerye onder besproeiing – die mielies staan hoër as ons voertuig en dis te mooi. Ons kom by die plaashuis aan, en die vriendelike bestuurder neem ons deur na die kothuis op die oewer van die Oranje - te pragtig ! Die Hyper Cast lyn waarna ek in die storie verwys. Die teenskuurvermoë is uiters goed en het my gehelp om die visse tussen die obstruksies te land. Die rivier is vol en dis duidelik dat die Vaal se water reeds by die Oranje uitgekom het en die vlak is heelwat hoër as normaal. Ons verstaan ook dat dit reeds besig is om te sak, maar ek kan sommer sien aan die massas water wat afkom dat die stroom regtig sterk is en dat die vuil water vol gras, riete, takke ensomeer die hengelsake redelik gaan bemoeilik. Nietemin is ons mos nie bang nie, ons is hengelaars en as daar water is met vis in, sal ons hulle vang. ‘n Vleisie op die kole die aand en vroeg in die bed is net wat nodig was na die lang dag op die pad. Dis drukkend warm, maar gelukkig is die lugversorger heel effektief en ons slaap deur tot bykans sesuur. Dis heel ver wes, en toe ek sesuur buite kom is dit nog lekker donker. Ek begin alles gereed kry en om onder by die water uit te kom teen die skuins walle af op nat gras is ‘n lekker uitdaging. Na sowat ‘n uur se gewerskaf is alles daar en ek het so saam met die sonsopkoms vir my ‘n mooi gelyk plekkie uitgeskrop op die wal en my seatbox staan mooi gelyk. Annetjie se oewerhengelstaander moes maar effens hoër op teen die wal staan. Die stroom is sterk en enige poging om verder as 10m van die kant af te hengel is tevergeefs. Annetjie gooi selfs ‘n P4 so op 25m, maar dit spoel eenvoudig net stroom af. Maar ek is nooit bang om naby te hengel nie, veral nie in ‘n rivier nie en ek maak twee plekke gereed, een so op 3m van die kant af en een so op 8m. Nou ek weet nie hoeveel van dit wat ek gevoer het, het daar bly lê nie, maar ek het heelwat pitte en growwe voer gebruik. Die SVB van Super Cast is lekker taai as jy minder water gebruik en hom lekker brei, en bly dus langer in die feeder of op die sinker. Teen nege uur is dit reeds lekker warm en die sweet tap ons af. Die een ding waaraan daar nie ‘n tekort is in die Oranje nie, is kleinbek-geelvis. Dis ook die eerste vis wat gevang is en die geveg is elke keer lekker. Tussendeur kom ‘n babertjie of twee uit. Ek kry ‘n mooi byt en slaan vas. Die feederstok staan sekel en die blinklyf trek stroomaf, sommer gou-gou is hy in die boomstompe wat so ent ondertoe teen die kant lê. ‘n Hoeklyn sneuwel en ek sit ‘n nuwe een aan. ‘n Tweede keer word ek in die klippe en bome ingevat, en hierdie keer is die voorslag ook daarmee heen. Ek besluit toe om eerder my lyn op te gradeer as net ‘n voorslag. Ek trek so klomp meter af, en voel sommer hoe grof die lyn is van die stompe. Ek gebruik my voorslaglyn, die 11-pond Hyper Cast van Sensation en sit sommer so 40 of 50 meter op. Dis ‘n lekker soepel lyn en is ook baie skuurbestand. Die volgende paar gooie lewer mooi geles, ‘n baber en ‘n mooi karp op. Ek kon die vis nou beter beheer en heelwat harder trek. Hier teen twaalfuur raak dit heel warm, en ons besluit om ‘n blaaskans te vat en Prieska te gaan verken. Ons moes ook nog proviant gaan aankoop en ‘n hengelwinkel gaan soek waar ons swaarder sinkers kon kry. Ons pak op, neem ‘n paar fotos en ry in dorp toe. Die vriendelike jong man by die Build-It tak se hengel-afdeling op die dorp help ons entoesiasties en ons kry alles wat nodig is. Al wat so skaars soos hoendertande is, is wurms. Laatmiddag is ons terug en vang nog ‘n klompie mooi geles. Die feeder was baie meer effektief as die oewerhengel, ek reken maar hoofsaaklik omdat ek effektief teen die kante van die stroom kon hengel met ‘n oop 45g feeder wat se gewig net onder is. Dit verhoed dat hy rol, en met die hooklyn mooi stroomaf in die voerlyn was dit makliker vir die vis om die aas effektief op te tel. Die aand skyn die volmaan mooi en ek besluit om ‘n viskoppie in te gooi vir ‘n grootbek of baber. ‘n Uur later word die aas opgetel en my gerei weereens te lig gevind. Die rietbos aan die linkerkant wen die geveg. Na ‘n heerlike vleisie op die kole, ‘n snikhete dag en op-en-af gehardloop teen die wal, besluit ons om halt te roep en gaan kruip in. Ek reken as mens meer tyd het om ‘n behoorlike nagsessie met die regte gerei in te sit, dat ‘n paar monsters beslis aan die orde van die dag is. Die feit dat jy sommer so van die braaivleisvuur af die stokke kan dophou, is natuurlik uit die boonste rakke en ‘n week hier by Excelsior se River Cottage sal ‘n fees wees. ‘n Lekker sak vis vir die kort sessie wat ek gehengel het - die Oranje is ‘n juweel! Die volgende dag sou ons so ‘n paar honderd meter of wat afgaan na “John se hengelparadys”, ‘n pragtige stukkie oewer wat John van der Westhuizen, die eienaar spesifiek vir die hengelaar ingerig het.