E. Hengelbestemming: Rietspruitdam

WOORDE: & FOTOS: EIE REDAKSIE Die pragtige Rietspruitdam en Club Amigos-oord geleë sowat 10km buite Ventersdorp in die Noordwes met onbesoedelde water, ‘n prentjiemooi woonwapark, gras-bedekte staanplekke teenaan die oewer, skoon en netjiese ablusies, swembaddens (warm en koud) en ‘n lang glyplank skep ‘n veilige en rustige atmosfeer! - Die perfekte plek vir ‘n gesinswegbreek. Die Club Amigos-oord van Pieter en Sonja van Wyk is sowat 180km vanaf Pretoria en Johannesburg en die pad soontoe is baie mooi. Dit maak die oord reeds aantreklik omrede dit nie te ver is nie, toeganklikheid bied en boonop kan jy in ‘n rustige en veilige oord ontspan sodra jy daar is. By Club Amigos word daar egter nie net gekamp en gebraai nie – nee, dit is ook ‘n hengelaar se paradys! Rietspruitdam se oewer is netjies en skoon met kort gesnyde kikuyu gras tot teenaan die water. Die dam word deur die Rietspruit gevoed en vul slegs op met reënwater wat in die opvangsgebied val. Omrede dié spruit tussen saai en beesplase deur kronkel is daar geen besoedeling in die water nie. Dit is seker een van die skoonste damme waarin jy kan hengel. Natuurlik is daar dan ook geen hiasinte, slyk of modder nie en dit maak die ervaring net soveel beter. Oor vashaakplek hoef jy ook nie te bekommer nie want onderwater obstruksies bestaan nie. Die dam is nog altyd bekend vir goeie vangste van karp, baber, moddervis en geelvis maar a.g.v die droogte in 2016/17 het die geelvis en moddervis populasie egter baie verminder. Karp is daar gelukkig in oorvloed en so ook baber so die hengelaar het steeds baie om na uit te sien. Die algemene grootte van die spesies wissel van seisoen tot seisoen en in die hoogsomer is die karpe heelwat kleiner as in die winter en lente. Die dam is egter is ook bekend vir groot sakke vis wat gereeld gevang word - Rietspruitdam is ‘n tempo-dam so maak maar reg vir baie vis! Daar is enorme babers in die dam en indien die wind lekker van voor af waai kan jy beslis ‘n visaas soos viskoppe en filette uitsit, hulle is baie gretig om aas te vat! Met ons span se besoek is een van hulle pragtige chalets beskikbaar gestel vir ‘n nag en twee dae se lekker hengel. Ons het vroeg een môre by die oord gearriveer en alles was reeds aan die gang. Die werkers van die oord is aanhoudend besig om dit skoon te hou en te sorg dat die gras gesny is, alles netjies is en die besoekers altyd welkom voel. Alle COVID-19 voorsorgmaatreëls is in plek en die oord pas streng beheer toe. Ons het na die C-sone gery om te hengel en net nadat ons deur die hek is afgedraai tot by die oewer. Vir die eerste dag het Kobie van Staden van die bekende hengelwinkel “All Out Angling” in Montana, Pretoria as gashengelaar vir die dag saam met ons kom hengel. Ons kon nie ophou praat oor hoe mooi die dam, oord en oewer is terwyl ons die stokke, staanders en ander gerei gereed gekry het vir die dag se hengel nie. Die visse het elke nou en dan op die oppervlak gedraai en viskoors het beide van ons beetgekry soos nog nooit tevore! Sommer gou-gou het ons alles reggekry, voer aangemaak en die eerste lyne in die water gekry. Kobie van Staden begin sy dag met ‘n kong karp wat hy op ongeveer 55m aangekeer het. Later deur die dag vang hy hulle sommer twee-twee op ‘n slag! Kobie was dadelik aan met die eerste vis en binne etlike minute land hy ‘n karp van ongeveer 300-500g. Hy het sy lyn op ongeveer 50m vanaf die kant ingooi en is amper onmiddelik weer met dieselfde stok weer aan met ‘n vis. Die dam is bekend vir groot sakke vis is, veral onder kompeterende hengelaars, en dat hy baie besig gaan bly indien sy plan is om naby te hengel. Kobie het genoem dat hy uitgehonger is vir hengel en soveel as moontlik visse gaan probeer vang met daardie stok maar wel sy ander stok diep gaan gooi vir groter vis. Neville Foord aan die ander kant was weer lus om iets anders te probeer en het besluit om met sy 12-voet stokke op 115m en 125m te hengel – grootliks om te kyk of hy nie van die dam se groter karpe kon aankeer nie maar ook om sy langafstand hengeltegnieke te oefen. Kobie het egter beslis die beter besluit gemaak en het die een vis na die ander gevang. Met eens het hy ‘n byt op sy langer lyn gekry en vasgemaak met iets groot! Hy het die vis mooi gespeel wat baie swaar gevoel het en wat stadig nader met skielike ruk en pluk aksies nader gekom het. Ons het sommer dadelik geweet dat dit nie ‘n karp is nie en dat ‘n baber die aas opgetel het. Ongelukkig het die vis afgekom slegs sowat 20m voor die skepnet en Kobie se moed het tot in sy skoene gesak. Intussen het die jong karpe hom egter steeds besig gehou op 50m en hy het hulle behoorlik bymekaar gemaak. Neville Foord met sy baber wat hy gevang het in die verandering van kondisies. Neville vertel verder: "Tussendeur die klein vissies het ek probeer om ‘n baber te vang en ‘n bodemstrop met slangwurms wat ek in Ebony (rooi musk) gedoop het die diep water ingegooi. Dit was egter sonder enige sukses maar later deur die dag toe die wind gedraai en van voor af begin waai het, het ek besluit dat dit die perfekte kondisies was om weer te probeer. Ek het twee van die jong karpies se koppe af gesny en met ‘n baberstrop gegooi, een op elke stok! Die wind het al sterker gewaai en die golfies op die water het die water lekker geskommel – presies wat die babers laat jag! Dit was nie 20 minute nie toe my linker stok wegtrek met ‘n snorbek en ek uiteindelik vasmaak met die vis waarvoor ek al heel dag lank wag! Die geveg op die 7-pond hooflyn het sowat 10 minute geduur maar die baber moes opgee en kon ek daarin slaag om ‘n mooi een van ongeveer 9kg te land." Kobie eindig die dag met 44 visse in sy net en die groot een wat weggekom het. Neville eindig met ongeveer 20 en ‘n mooi baber – nie sleg vir die eerste dag nie. ‘n Lekker besige dag se hengel vir Kobie en hy eindig met 44 visse – wel gedaan! . Die oord is werklikwaar prentjiemooi en die span onthou nog hoe hulle vir mekaar gesê het dat dit seker een van die mooiste plekke is waar hulle die afgelope tyd was. By die chalet aangekom was die span aangenaam verras met hoe skoon en netjies dit is. Spierwit beddegoed met vere duvets, ‘n gerieflike braaiarea wat uitkyk oor die kampterrein en dam en ‘n skoon lekker warm stort is mos al wat ‘n man nodig het na ‘n dag se harde hengel – nodeloos om te sê het almal daardie aand soos konings geslaap! Vroeg die volgende môre was ons egter uit die vere en weer terug op die oewer – dié keer so paar meter links van die vorige dag se hengelplek. Herman Dicks wat vir Legends Pro Angling hengel asook Elru Buitendag wat vir Jumbo Fishing hengel was ons gashengelaars en hulle het aan weerskante van my opgeslaan. Die dag se kondisies was heelwat anders en ons het reeds vroeg opgemerk dat dit baie duinserig is met ‘n redelike sterk wind reg van agter. Herman is bekend vir sy vernuf om baie effektief op langafstand te hengel maar hy het reggemaak om met een stok vir die jong vis naby te hengel. Herman Dicks se rysmiere wat hy op sy baberstrop laai is iets waarmee hy baie sukses behaal, veral in plekke soos Vaaldam, Bloemhofdam en Koppiesdam. Elru was die “local” omrede hy van Potchefstroom af kom en gereeld by die dam hengel. Hy het aan ons genoem dat die water waar ons hengel ‘n redelike diep gat naby aan die oewer vir ongeveer 60-70m uit maak en daarna ‘n vlak plato vorm. Dit is sulke inligting wat jy nooit sal bekom as jy net blindelings hengel en nie met medehengelaars gesels nie. Ek het egter besluit om nie in die “gat” te hengel nie en met een stok op 95m en die ander op 125m te hengel. Elru het sy een stok op 60-70m gegooi en die ander een 115m en Herman op 50m en die ander een met ‘n baberstrop en rysmiere op wie weet waar – baie ver! ‘n Mooi baber op ‘n Juana (musk) gegeurde floatie gevang. Die viskop waarmee die groot babers geteiken was. Die dag was heeltemal anders en die visse het baie stadig gebyt. Ek het die eerste byt vasgemaak op die 95m lyn wat sowat 15 minute gelê het en ‘n tipiese jong karpie geland. Die stok was terug op die kol gegooi maar die lyne het sonder enige roering gelê. Herman se baberstok het later so effens ‘n terugsak gewys maar niks positief genoeg om vas te maak nie en Elru se lyne was doodstil. Ek het die vorige dag se hengel saam met Kobie met hulle bespreek terwyl ons elkeen solank iets geëet het toe my 95m stok se poliesman weer sak en ek ‘n jong karpie land. Intussen het Elru se stok ook gebyt asook Herman se naby stok en kon ons darem almal ‘n vis in die net plaas. Elru Buitendag besig om ‘n beter vis kant toe te speel. Herman het weer ‘n roering op sy baberstok opgemerk en besluit om die vis te kap – ‘n jong baber van seker 100g het op die rysmiere gebyt maar dit was nie wat ons verwag het nie. Herman het weer die strop gelaai en hom die keer net nog verder gegooi omrede hy oortuig was dat hy ‘n groter baber moet vang! Intussen het ons op die karp-aas darem so nou en dan ‘n byt gekry en ‘n vis gevang maar dit was baie stadiger as die vorige dag. Die wind het steeds van skuins agter gewaai en dit het bewolk geraak. Ons het aanhou werk maar die visse wou net nie aan die gang kom nie. Ek het toe weer besluit om twee viskoppe te gooi met die hoop dat ek weer een van die mooi babers kon aankeer. Daar het ‘n stilte oor ons gedaal wat geeneen van ons kon verduidelik nie – die visse was weg en ons lyne het bytloos gelê en wag vir beter dae... Konsentrasie loop hoog in die “vriendskaplike kompetisie” tussen Herman en Elru! Ons het van die tyd gebruik gemaak om te gesels en mekaar beter te leer ken en nadat ons talle hengelstories en staaltjies oor jag, rugby en ons jonger dae vertel het maar weer die lyne uitgetrek en met ‘n paar veranderings ingegooi. Skielik was Herman se 50m kol aan die gang en hy het ‘n paar byte gekry nadat hy ‘n BAIE sterk fluorescein dip genaamd “Tracer” op die voerbal gesmeer het. Ek moet bieg, nog nooit het ek so iets gesien nie! Die hoeveelheid fluorescein in hierdie doopsous was sigbaar op die oppervlak vir 5 minute nadat Herman die aas in die water op 50m gegooi het. Die jong karpies het dit egter aantreklik gevind en soos Herman al hoe vinniger begin byte kry so het die wind ook stelselmatig van rigting verander totdat dit reg van voor begin waai het. Neville met sy mooiste vangs vir die dag - ‘n pragtige spieëlkarp. Die oomblik toe die wind só waai het die visse gebyt; Elru het ‘n pynappel en duiwelsdrek mengsel gebruik met die naam “Crazy Pine” wat Jumbo Willemse spesiaal vir sy borghengelaars gemaak het en skielik was sy kol ook aan die gang. Die twee manne het tussen hulle ‘n vriendskaplike kompetisie gehad met wie die meeste vis kon vang in die laaste rukkie van die sessie voordat hulle voer opraak. Ek het teruggestaan en my gerei opgepak uit vrees dat ek in die spervuur sou beland! Herman in die een hoek en Elru in die ander met ‘n ysige wind van voor, golwe op die water, donker wolke en ligte reën wat oor ons waai het die visse uiteindelik tou gestaan om aas te vat. Die fluoroscein truuk van Herman was egter net te goed vir Elru en met Elru se voer wat eerste klaar was het hy die nederlaag aanvaar. Herman was soos ‘n masjien met nuwe lewe in-en-uit die water om visse te net en hy het op die ou einde met die louere weggestap met 24 vis teenoor Elru se 15. Nietemin was beide hengelaars ‘n groot sport vir die dag en het ‘n moeilike dag in ‘n japtrap opgesom en die resultate gelewer waarvoor hulle bekend is. Elru se mooi sak vis op ‘n moeilike dag. Herman het hierdie keer met die louere weggestap, en dit sonder ‘n bonus baber! Rietspruitdam en Club Amigos is die kompeterende sowel as die sosiale hengelaar se droom; glo ons, en as jy ons nie wil glo nie, gaan vind uit vir jouself – jy sal aangenaam verras wees! Venue info Club Amigos is ‘n rustige, veilige, skoon en netjiese oord met hoë standaarde en streng reëls. Daar is pragtige woonwa en kampeer staanplekke onder koelte bome met lieflike gras toegerus met krane en elektrisiteit (A en B sone). Braaiers is daar in oorvloed en elke staanplek beskik oor sy eie een.Die ablusies is baie skoon en bied storte met warm water, baddens, moderne wasbakke en krane, toilette en krippe by die mans. Alles word deurgans onderhou en skoongemaak op ‘n daaglikse basis. Die staanplekke grens teenaan die water en jy kan basies op jou “voorstoep” hengel. Daar is ook staanplekke wat nie teen die water grens nie so maak seker met jou bespreking dat jy vir jou die regte staanplek kry. Die chalets is netjies en skoon en met luukse linne voorsien. Daar is 4 chalets wat op die water gebou is en twee chalets wat verder van die water af gebou is. Die chalets is selfsorg en bevat alles wat jy sou nodig kry, van eetgerei, potte en panne, yskaste, beddegoed en braaigeriewe. Warm sowel as koue swembaddens word daagliks na omgesien in die oord en die warm swembad is onderdak. Vir die jongspan en die avontuurlustiges is daar ‘n glybaan wat jou in die hoofswembad laat beland. Die oord beskik oor ‘n winkel wat naby die ingang geleë is en basiese kruideniersware voorsien. Die Oewer Prenjiemooi is eintlik die enigste woord wat dit kan beskryf. Die fotos vertel die storie. Aas Die jong visse eet eintlik enige iets maar op sekere tye van die jaar byt die groter visse beter. Vir hoekase is geel floaties en soet witdeeg voldoende. Ons het nie goeie sukses met mieliepitte gehad nie maar glo dat die groter vis later in die jaar beslis daarvan sal hou. Karibawurms is ‘n moet en so ook ander vleisase soos viskoppe vir die babers. Geure wat vir ons goed gewerk het was musk/pienk sweets, piesang, pynappel, bunspice, gemmer, spiritus, amandel en duiwelsdrek. TOP TIP 1: Slaplyn Dit is raadsaam om met ‘n slap lyn te hengel veral wanneer die wind van agter af waai. Dit help dat die visse nie so baie met die lyn in aanraking kom nie en verbeter jou byttempo. TOP TIP 2: Gummy stop Gebruik ‘n gummy stop op die skaglyn van jou Gly-rietvleistrop wat jy kan af skuif na die voerbal. Op dié manier hengel jy baie effektief veral vir kleiner vis omrede hulle vinniger gehaak word wanneer hulle die boonste hoek insuig. TOP TIP 3: Baberstrop Gebruik rolpleister wat jy rondom jou sinker draai. Dip dan die rolpleister en sinker in jou baberdip van keuse. Die pleister sal die geur intrek en stelselmatig vrylaat op die bodem wat die babers nader lok.

E. Hengelbestemming: Rietspruitdam

Ons hengel by Club Amigos, Rietspruitdam.

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

Pro Mania Top 10 | June 2022 – Week 4

U. ELEGANT FUEL BLOEMHOFDAM BONANZA 2022

How to stay competitive in tournament angling

T. WINTERBESTEMMINGS: Vuurwarm AKSIE by Ifafi!

S. WINTERBESTEMMINGS: Karpe en geelvisse by ‘n YSKOUE Henbase

R. Roodeplaat’s ‘trains’ with Barend Breedt

Is dit belangrik om fiks te wees as jy op ‘n hoë standaard wil kompeteer in hengel?

Q. WHAT’S IN THE TACKLE BOX?

Gooi, Krag en Uithouvermoë vir toernooie.

P. EG Kerk Tuine Hengelkompetisie 2022

Pro Mania Top 10 | June 2022 – Week 4

U. ELEGANT FUEL BLOEMHOFDAM BONANZA 2022

How to stay competitive in tournament angling

T. WINTERBESTEMMINGS: Vuurwarm AKSIE by Ifafi!

S. WINTERBESTEMMINGS: Karpe en geelvisse by ‘n YSKOUE Henbase

R. Roodeplaat’s ‘trains’ with Barend Breedt

Is dit belangrik om fiks te wees as jy op ‘n hoë standaard wil kompeteer in hengel?

Q. WHAT’S IN THE TACKLE BOX?

Gooi, Krag en Uithouvermoë vir toernooie.

P. EG Kerk Tuine Hengelkompetisie 2022

Guess the mass of the CARP and WIN an Adrenalin Fishing Tackle Hamper

Pro Mania Top 10 | June 2022 – Week 4

U. ELEGANT FUEL BLOEMHOFDAM BONANZA 2022

R499.00 per year

R49.00 per month

R299.00 per year

R29.00 per month

R299.00 per year

R29.00 per month