Hengeldamme Van SA – Boschkop Vaaldam

Afhangend van die pad wat jy kies om te ry is die Boschkop-oewer van Vaaldam die naaste oewer van die dam aan Gauteng, maar dit is nie die enigste rede waarom dié oewer so gewild is nie. Die oewer bied jou veiligheid, gerieflikheid en vele pret met sakke vol vis. Die oewer is baie groot en kan baie hengelaars tegelykertyd hanteer. Daar is ablusie geriewe vir dié wat daar wil kamp maar dit is naby die hek geleë so jy sal tot daar moet ry om daarvan gebruik te maak indien jy verder langs die enorme oewer af kamp. Toegang na die oewer word streng beheer en daar is slegs een pad in en een pad uit. Die oewer kan basies in drie gedeeltes verdeel word: oorkant die sloep, die baai voor die opstal en om die draai na regs by die bloekombome. Volgens meeste hengelaars wat suksesvol is by dié oewer is dit nie nodig om spesifieke hengelplekke uit te soek nie omdat daar orals vis te vind is. Daar is egter plekke waar daar heelwat meer klippe in die water is, so wees maar versigtig vir vashaakplek by dié plekke. Die vis byt oor die algemeen baie lekker en dit is die ideale oewer om die jongspan saam te neem vir ’n dag van opwinding en pret. Moddervis, karp, graskarp, baber, en kleinbek-geelvis kom gereeld uit, en dit sommer lekker naby aan die kant. Afstande van 50m, 70m en 90m is meer as voldoende om dié spesies aan die byt te kry. Indien jy op soek is na groter vis en bietjie langer wil wag is 110m – 125m ’n beter opsie. Gebruik gerus kort Vaaldam- en Glyrietvleistroppe om die moddervisse naby aan die kant te teiken en Glyrietvleistroppe vir die groter vis. Dit is ook raadsaam om met sagte voer te hengel waarby daar ’n handvol of twee wit mielierys by die voer gevoeg word. Die moddervisse vind die mielierys onweerstaanbaar en bly langer op die voerkol. Op die hoek werk ’n enkel karibawurm met ’n klein soet witdegie agteraan baie goed asook geel en oranje floaties met ’n soet witdegie agteraan. Vir die groter visse werk mieliepitte wat in die voerbal gehaak is baie goed. Goeie geure sluit in rooi musk, pink sweets, rooi bessie, perske en karamel. Kombineer ook dié soet geure met wintergreen, duiwelsdrek, bunspice en knoffel wanneer dit onweer is, reën of as die wind sterk waai. Maak dus seker om altyd so akkuraat as moontlik te wees met jou werpslag want dit sal ’n beter voerkol en meer visse in jou net verseker. Dam Profiel:Amptelike naam: VaaldamNaaste dorp: Deneysville/OranjevilleDoel: Industriële en huishoudelike gebruikKonstruksie datum: 1938Kapasiteit: 2 609 799 000m3Oppervlak area: 320 km²Boschkop Hek koördinate: 26°52’0.4722”S 28°15’57.6576”E 1. Draai by bloekombome: Hierdie area is nader aan die rivierloop met dieper water op so 70 - 90m. Heel regs is dit ’n goeie plek om groter karp te teiken. 2. Baai voor opstal: Hierdie is ’n baie gewilde area met baie vis. Die groter vis is egter in dieper water op ’n afstand van so 120 - 140m. 3. Oorkant die sloep:Daar is vlakker water in die sloep. Dit is ’n goeie moddervis area, veral in die somer.