fbpx
Bank AnglerVenues

Hengeldamme van Suid-Afrika – Vaaldam Wilgedraai

Oewers op die Vaaldam word naweek vir naweek toegepak met hengelaars, alles vanaf kampeerders en kompeterende hengelaars waarvan die laasgenoemde meeste van die tyd aan dag-kompetisies deelneem. Die Vaaldam beskik oor ‘n groot verskeidenheid verskillende oewers wat beide soorte hengelaars gemaklik kan akkommodeer, en in volgende uitgawes gaan ons na hierdie oewers kyk.
Wilgedraai is al jare lank reeds aan gereelde hengelaars van die Vaaldam bekend maar het vir ‘n gegewe tydperk toegemaak. Na groot aanvraag en hengeloewers wat meer gewild raak rondom die dam het die bestuur van Wilgedraai weer besluit om hul hekke te open. Hierdie keer het die oord en bestuur die reëls aangepas en die oord en oewer word streng beheer – natuurlik ‘n pluspunt as jy lekker wil gaan hengel. Boonop is die oord ten volle omhein en daar is wagte wat sorg dat veiligheid nie ‘n kommer vir jou hoef te wees nie. Die oewer is altyd netjies en die bestuur sorg dat die gras gesny is en die staanplekke altyd ruim en skoon is voor jy daar gaan hengel. Uit ‘n hengel oogpunt beskik die oewer oor twee gedeeltes – die baai en die rivier. Die baai is heelwat vlakker as die rivier gedeelte maar beide van dié verskaf meer as genoeg hengelplesier. Dit is raadsaam om egter te weet dat die afstand wat jy gaan hengel drasties tussen die twee kan verskil.

Die baai:
Is ongeveer 200m-350m breed. Waterdiepte wissel van 2m tot 3,5m ongeveer 120m vanaf die kant. Die water kan gou van kleur verander wanneer die wind sterk in die baai in waai – natuurlik ‘n goeie ding vir hengel. Die jongspan kan gemaklik tussen 40m en 70m hengel vir moddervis, karp, graskarp, geelvis en somtyds selfs groot babers. Die groter karpe wei gewoonlik ongeveer 110m tot 130m vanaf die kant op dié oewer.
Sagte popcornvoer kan gebruik word om ‘n voerplek te maak, pitmielies in die voer help om die groter karpe op die kol te kry. Vir die moddervisse kan mielierys gekook word wat saam met die voer gemeng word.
Hoekase vir die moddervisse sluit in soet witdeeg, rooi en geel floaties asook wurms. Vir die karpe is dit raadsaam om ‘n groter hoekaas te gebruik soos ‘n mieliepit met ‘n soet witdegie agteraan asook backings agter ‘n mieliepit, floatie of erdwurm.

Die rivier:
Hier is die dam baie breed (sien kaart). Die oewer loop teen ‘n baie skuins helling met ‘n sanderige bodem. Die water op 45m is reeds ongeveer 3,5m diep en op 120m ongeveer 4m-7m diep. Die water is effens blou en koel soos dit vanaf die Wilgerivier invloei. Hier kan daar lekker naby aan die kant gehengel word vir geelvis, selfs 20m vanaf die kant kan goeie vangste oplewer. Vir karp en baber is dit beter om die dieper waters te trotseer en ‘n goeie hengelafstand vir dié spesies is enige iets vanaf 80m tot 120m. Hier is groot karpe en babers wat gereeld die aas optel.
Gebruik harder voerballe om seker te maak die voer bereik die bodem. Pitmielies in die voer help om die groter visse te lok.
Vir hoekaas gebruik gerus ‘n mielipit met ‘n backing.
Viskoppe, filette en heel vis soos graskarp is uitstekend om te gebruik as aas vir die babers. Geure wat goed werk op beide gedeeltes van die oewer sluit in karamel, piesang, amandel, TCP, en bunspice. Wilgedraai bied ‘n verskeidenheid van opsies vir elke hengelaar en jy kan jou hengelsessie dienooreenkomstig beplan. Die oord beskik oor netjiese ablusie geriewe so neem die hele gesin saam.

Dam Profiel
Amptelike naam: Vaaldam
Naaste dorp: Deneysville/Oranjeville
Doel: Industriële en huishoudelike gebruik
Konstruksie datum: 1938
Kapasiteit: 2 609 799 000m3
Oppervlak area: 320 km²

Tags
Close