Hengelkamp Wenke – Hengel Etiket

Of jy nou sosiaal of kompeterend hengel is hengel etiket baie belangrik. As ons elkeen verdraagsaam teenoor mekaar kan wees, sal elkeen hul tydjie langs die viswaters baie meer kan geniet. Die feit dat hengeletiket steeds bespreek moet word, is skrikwekkend. In diè maand se uitgawe maak ons ’n uitsondering om vir die nuwe hengelaars wat nuut in die sport is te vertel van hengeletiket. Onthou dat elkeen langs jou by die viswaters hulle tydjie wil geniet, ontspan en baie visse wil vang! Nou deel ons ’n paar goue reëls wat ’n lekker hengelsessie sal verseker. Eerstens, groet jou buurman of -vrou! Of jy nou eerste by die dam is, of aankom terwyl daar reeds mense is, groet! Gebruik die geleentheid om te vra hoe byt die vis, watter ase die vis verkies en afstande wat gehengel word. Terwyl jy gesels, let op na die oewer. Gaan jy moontlik jou lyn oor jou bure gooi? Indien daar ’n moontlikheid is, bespreek dit dadelik om ongelukkigheid te vermy. Gebruik jou arms om jou hengel gebied uit te wys. Hou jou arms reguit na links en regs, in lyn met mede hengelaars en die algemene oewer lyn, bring jou arms na vorentoe. Daar waar jou hande aan mekaar raak, dit is die rigting waarheen jy moet mik as jy gooi. Kry ’n merk aan die teenoorgestelde oewer as ’n baken om te gooi. Bome, pale, geboue, torings en landmerke kan dien as bakens - die wit beeste werk nie! Daar is dit, nou het jy nuwe hengelvriende ontmoet, raad oor die spesifieke dam se vis gekry asook ’n relatiewe idee van die hengel rigting volgens die oewer gekry. Nou begin jy afpak en jou gerei regkry. By Bloemhofdam se Noordwes oewer - baie spasie tussen hengelaars om mekaar nie te haak nie. Daar by jou staanplek, net soos jy regmaak om te gooi, sien jy dat die oewer ’n kom maak. Dit beteken dat almal na dieselfde baken mik om te gooi. Ongelukkig is sulke oewers moeilik om te hengel omdat hengelaars oor mekaar se lyne gooi en lyne haak. Met jou eerste gooi, vra jou buurman of die kol waar jy gegooi het, reg is. Indien dit nie reg is nie praat mooi en probeer ’n oplossing kry om almal gelukkig te hou. Die kol wat reg voor jou is, is dalk reg voor jou buurman ook. Nou kom seker die belangrikste deel, behalwe die eintlike vang van vis, van die sport, naamlik die etiket van hengel. As elke hengelaar ’n bietjie links of regs skuif, sal daar genoeg hengel spasie vir elkeen wees. Indien die stokke wat op die grens (buite stokke) van die staanplek is en haak aan bure se lyne, kan dit nog uitsorteer word. Sodra binne stokke haak is daar ’n probleem. Dan kry mens oewers waar die staanplekke nie uitgemerk is nie. Wat maak mens dan? ’n 20m oewer spasie is voldoende vir 2-3 hengelaars. In sommige hengelkompetisies kry elke hengelaar slegs 5m oewerspasie! Dis maar ’n noue gaatjie om 2 lyne met ’n hounet in te druk. Maak die beste van jul tyd by die water, leer om kol en reguit te gooi. Die oomblik wanneer jy kan kol en reguit gooi, kan jy meer vis vang en ook met klein hengelspasies suksesvol hengel. Dit is nie nodig om ongeskik te wees en op mekaar te skree en skel nie. Ongelukkig raak mens se geduld klaar wanneer hengelaars mekaar nie wil akkommodeer nie, maar om te skree gaan niks uitrig nie. Buitendien, om te skree soos varke voor kinders en op vreemdelinge is uiters swak gedrag. Sluk jou trots, haal diep asem en praat mooi met medehengelaars. Wanneer die hengel gebiede uitsorteer is kan die hengel werklik begin. As jy sien dat jou buurman of vrou besig is met ’n vis, en daar is nie hulp naby om die vis te skep nie, of die hengelaar sukkel om self die vangs te skep, gaan help! Sukkel jou bure om hul tent op of af te slaan? Gaan help hulle! Voertuig se battery dalk pap, en jy het kabels om te help? Doen dit! Spaar lig om te leen vir bure wat hul ligte dalk vergeet het? Leen die lig uit! Jy kan dalk eendag iets vergeet by die huis en gelukkig wees dat jou buurman vir jou help. Ja, ons almal werk hard vir ons persoonlike besittings en wil dit graag oppas en nie laat weg raak nie. So pas ander mense se gerei en kamp toerusting op soos jy jou eie sal oppas. Wees vriendelik, akkommodeer, ondersteun en help mekaar. Nie net kan jy by ander iets nuut leer nie maar ook nuwe vriende ontmoet!