HIER GAAN ONS ALWEER, REEKS 21: ‘Operasie Eetvis’ by Kleinbrak, Suid-Kaap

WOORDE: Wouter van Zyl FOTO'S Memory Creators Die manne van 'Hier Gaan Ons Alweer' het ‘n opwindende 21ste reeks wat afskop in die hartjie van die Suid-Kaap. Aanbieder Petri de Wet het gaan aanklop by Harten-Hengel Outdoor, ‘n hengelwinkel in Kleinbrak vanwaar ‘n span manne dan sou vertrek om 'Operasie Eetvis' aan te durf. Kompetisie onder die manne begin roer, want dis nou boothengel teen rots- en strandhengel met Petri wat die koue water op ‘n meer aandurf, terwyl die strandloperspan met Thinus van Staden van All Out Angling, Proteahengelaar Matthew Sumner en Wouter van Zyl van Harten-Hengel Outdoor gaan kyk of hulle vir Petri kan klop met die lekkerste en grootste eetvis. Die Conqueror-sleepwa is perfek vir wanneer oornagplek op die Tuinroete gesoek word. Die span toets Daiwa se nuwe 13’6” Saltist 3-5oz en 4-6oz stokke, gepaard met die nuwe Daiwa BG-MQ 10000 katrolle gelaai met 30-pond J-Braid. Aangesien die winter-teikenspesies hoofsaaklik galjoen, kabeljou, wit steenbras, belman en mosselkrakers is, word sardien, tjokka, seekat en witmossels by die hengelwinkel aangeskaf. Die strandmanne gaan trek gou 'n paar bloedwurms op Knysna uit, glo net om so klein bietjie te kan kompeteer met die garnale op die boot. Met almal gereed vir die uitdaging is dit water toe. Petri se sandkrewels laat die katrolle dans met ‘n paar jonger knorhane, maar kort voor lank loop sy rekening oor met ‘n monster knorhaan van die boot af terwyl die strandmanne loop en soek na ‘n bankie wat werk in die plat, koue water. Die seemeeue dra die nuus vinnig aan en die druk is dadelik op die manne. Alhoewel die haaie vreeslik dik byt in die omgewing, tel slegs eetvis en dus was alle staalstroppe sommer by die huis gelos. Petri de Wet met een van sy vele knorhane op die meer gevang. Daiwa se 13’6”, 3-5oz Saltist-stok met ‘n gemaklike wip vir meer afstand. Sowat ‘n uur suid van Mosselbaai doen die glibberige bloedwurm op ‘n Mustad Demon 5/0-sirkelhoek ten spyte van die koue weer sy werk en ‘n mooi belman word deur Wouter geland. ‘n Belman is ‘n besondere lekker eetvis; hy byt so skamerig en jy kry hom veral tussen rotse. Die see val toe heeltemal plat en die vis verdwyn, maar na nog so 3km se stap op die lang strand wys Matthew ‘n moontlike bankie uit wat kan werk. Dié bankie is diep met net nou en dan ‘n skuimkol wat dit weggee. Dis laagwater, wat help om gou ‘n paar witkrappe te vang. Daai knypgevaartes byt dat selfs geharde manne gil en ons praat eerder nie uit wie die hardste operalied gesing het nie! Met ‘n medium-grootte krap op ‘n Mustad Ring Soi 6/0-hoek, word hulle geduld beloon nadat iets Matthew se stok eerste plattrek en die katrol laat sing. ‘n Dieper sloep maak dat die vis moeilik op die vlak bank getrek word, maar na ‘n lekker geveg is die stoomtrein in die vlakwater. Dis ‘n pragtige witsteenbras wat nou skielik met baie meer respek hanteer word, want menigte van sy soort is al hier in die vlakwater verloor. Die vissermansverleentheid om weereens te vertel "oor ‘n grote wat weggekom het" sou die manne lelik laat bloos het, veral omdat dit nou op die kassie sou wees. Thinus gryp die vis en spreek ‘n paar gevleuelde woorde in die lyn van: “Matthew jou Engelse doring, lank lewe die koningin!” Wouter van Zyl, Matthew Summer en Thinus van Staden wat ‘n geselsie aanknoop oor die witsteenbras. Die strandspan is nou behoorlik op die telbord. Petri skuif egter sy fokus na kabeljoue nadat hy nog 'n paar jonger knorhane gevang het. Hy teiken ‘n sloep in die middag en land sodoende ‘n sitter van ‘n kabeljou op ‘n lang seekat-toon. Die tweede groot vis plaas Petri nou los voor en dit gaan baie vat vir die drie manne om hom in te haal. Sonder om te veel uit die mou te laat, raai ons die kykers van Reeks 21 se episode een aan om te sien hoe ‘n sloephaai amper ‘n stok breek weens die manne se aandag wat afgelei was! Om die kanse op groter eetvis te verbeter word verskillende stroplengtes gegooi, groter ase gemaak, lang tjokka-repe, muis-ase, geheime ase gebou en baie positiewe energie gespreek. Daar word heelwat grappies gemaak en selfs poetse gebak ondermekaar. Nadat Thinus ‘n 'krap-koffie' benut het vang hy drie jong kabeljoue, terwyl Matthew en Wouter nog ‘n paar jong belmanne, kabeljoue, ‘n elf en natuurlik die ongewensde seebabers pakslae gee. Kranige hengelaars sal verstaan hoe mens amper vloek wanneer daai drie-pen slymbolle jou pragtige asie insluk tot by sy nerfderm sodat jy hom moet slag om jou hoek los te maak. Daar word vroeg opgestaan om die beste hengeltyd te geniet. Die pragtige sonsopkoms hier maak vroeë oggende die moeite werd. Die manne skuif so 5km suid, ‘n strandgebied met rotsriwwe ongeveer 80m tot 100m diep wat binne gooiafstand is. Met die manne uitgesprei en Matthew so 300m links, teiken hy ‘n klein bankie wat die ongeoefende oog maklik sal miskyk. Sy aas word ingesluk deur nog ‘n gestreepte stoomtrein, hierdie keer ‘n regte bielie. ‘n Meestervertoning van hengelkundigheid speel af wat Zoeloe, die kameraman, laat naelloop om die laaste deel van die geveg af te neem. Vir selfs gesoute hengelaars is dit ‘n droomgrootte witsteenbras en wanneer kykers dit op die kassie sien sal hulle beslis daarmee saamstem. Met die neem van die foto skop die steenbras uit Matthew se hand en val rug-eerste op sy bobeen. Die voorste rugpen breek sowat 1cm diep af en later die aand met die stap huis toe los dit vir Matthew ‘n ongemaklike stappie, maar gelukkig kon hy self die pen sonder buite mediese hulp verwyder. Nadat die vis veilig vrygelaat is, is beide spanne nou kop-aan-kop. In die skoon water kom byt ‘n paar stoute elwe sommer die lyne af, nie eers naby die hoeke nie en daar word bespiegel of dit dalk selfs bronshaaie kan wees wat in die lyne vasswem. Die laaste sessie breek aan en douvoordag word daar klippe geklim op soek na daai ontwykende galjoen. Die aaskas is vol rypgemaakte rooi-aas wat selfs ‘n vark sal laat gril, vars witmossel en garnale. Daar word hard gewerk tussen die sloepe, skeure en rotse op soek na ons nasionale vis. Wouter gooi ‘n mengelmoes van garnaal en mossel op ‘n Mustad 1/0-tunasirkelhoekie wat uiteindelik ‘n eetbaar-grootte galjoen flous. Die rede vir die dikker hoeke is weens die feit dat mosselkrakers gereeld die kleiner galjoen-asies optel, en met daardie staalbekke eenvoudig die hoek toeknyp asof dit papier is. Sagte mossel-asie op ‘n sirkelhoek waarvan die punt van die hoek oop is. FOTO ONDER: ‘n galjoen word baklei vanaf die klippe direk in die wit skuimwater waar die galjoene jag. ‘n Heerlike kampvisbraai by die Hartenbos ATKV-oord se kampterrein volg saam met die vriendelike Conqueror-span en hulle families. Dis alte jolig met slaaie, knoffelbrood en steenbras teen galjoen op kameeldoringhoutkole. Spesiale souse word voorberei, want 'Operasie Eetvis' moet darem ‘n wenvis oplewer wat deur kampkommandant Vivian Torlage van Conqueror beoordeel word. Lieflike kampterrein reg langs die riviermond waar die braaivleisvure aangesteek word. Die vuur brand gesellig saam met die Conqueror-span, familie en kuiergaste. FOTO ONDER: Hier braai ‘n galjoen in sy eie vet wat die monde laat water. Die paar dae by Kleinbrak was weereens ongelooflik en ‘n glasie word geklink op 'Hier Gaan Ons Alweer' se 21ste bestaansjaar, ‘n mylpaal vir ons geliefde visvangprogram saam met Petri de Wet en sy span. VIR JOU DAGBOEK: Hou die kassie dop op Saterdag, 1 Oktober 2022 op DSTV kanaal 144 om 18:00 wanneer Reeks 21 van 'Hier Gaan Ons Alweer' afskop. Kom kyk saam hoe die manne die hengelwaters van die pragtige Tuinroete aandurf, die boot- en strandhengelaars so onder mekaar lekker vriendelik kompeteer, van hulle geheime deel en ‘n paar groot menere land!

HIER GAAN ONS ALWEER, REEKS 21: ‘Operasie Eetvis’ by Kleinbrak, Suid-Kaap

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

BOOTHENGEL: Klipdrift se Koi-Karpe

BASS FISHING IN THE SPAWN – A SCIENTIFIC PERSPECTIVE

FISHFINDER: August

ACTUALITY: ARE YOU TOWING LEGALLY?

COVER: August 2022

PRODUKFOKUS: DEEPER PRO PLUS 2 SMART SONAR

IN DIE SLIK BY MELUTI GAME LODGE

Guess the mass of the CREVALLE JACK and WIN an Adrenalin Fishing Tackle Hamper

LESERS | READERS

JUNIORS

BOOTHENGEL: Klipdrift se Koi-Karpe

BASS FISHING IN THE SPAWN – A SCIENTIFIC PERSPECTIVE

FISHFINDER: August

ACTUALITY: ARE YOU TOWING LEGALLY?

COVER: August 2022

PRODUKFOKUS: DEEPER PRO PLUS 2 SMART SONAR

IN DIE SLIK BY MELUTI GAME LODGE

Guess the mass of the CREVALLE JACK and WIN an Adrenalin Fishing Tackle Hamper

LESERS | READERS

JUNIORS

BOOTHENGEL: Klipdrift se Koi-Karpe

BASS FISHING IN THE SPAWN – A SCIENTIFIC PERSPECTIVE

Supercast deel alles nuut | Hengelindustrieskou

R499.00 per year

R49.00 per month

R299.00 per year

R29.00 per month

R299.00 per year

R29.00 per month