fbpx
Bank AnglerFishing TipsHow To

Hoe Skep Ek My Vis?

Jy het alles reg gedoen: die strop gelaai, gegooi, gewag en aangeslaan.
Nou moet jy skep, en dit moet oordeelkundig gedoen word…

As jy die vis op die verkeerde tyd probeer skep en dit skielik omvlieg en weer die dieper water opsoek is die kans om die vis vlak voor die skepnet te verloor baie groot. Die selfverwyt bly maar swaar om te sluk.

DIE VIS IS AANGESLAAN:

Ons verkies om aanvanklik naby die hengelstaander te bly staan totdat die vis so 50 meter vanaf die oewer is. Daar is drie redes hiervoor:
a) In hierdie stadium kan jy baie maklik agter om jou en jou penmaat se staanders beweeg sou die vis besluit om van rigting te verander. Dit spaar jouself die moeite om in hierdie vroeë stadium oor die ander lyne in die water te klim en klouter agter die vis aan.
b) Jy kan duidelik sien in watter rigting die vis swem en jy kan jouself dienooreenkomstig op die oewer posisioneer alvorens jy die water betree.
c) Jy is ook redelik naby jou ander stok om te kan aanslaan indien ’n ander vis met jou aas op loop sou sit.

DIE INROL:
Knyp die greepgedeelte van jou stok onder jou linkerarm vas indien jy regshandig is sodat die katrol in ’n gemaklike posisie t.o.v jou regterhand links voor jou vir die inrolproses is.

Hou die stok teen ’n helling van 45° effens na links vas.

Omdat die punt van die stok redelik hoog in die lug is sal dit veroorsaak dat die vis as t’ware in die water “opgelig” word. Dit beperk die kanse dat die vis aan ’n obstruksie onder die water kan vashaak. Gebruik ’n rol-en-trek-metode om die vis nader te bring: soos wat jy die lyn inrol, beweeg die punt van die stok vorentoe (in die rigting van die vis). Sodra jy die stokpunt tot voor beweeg het hou jy op om lyn in te rol. Trek die vis nou met die stok nader deur matige spanning op die lyn toe te pas, totdat die stok weer parallel tot die oewer is.

WANNEER DIE VIS SO 50 METER VAN DIE OEWER AF IS:
Beweeg tot kniediepte in die water in aan dieselfde kant van die hengelarea as waarheen die vis swem.

Probeer altyd om die vis aan dieselfde kant van jou hengelarea te kry waarin jou hounet staan.

Sodra die vis geskep is, is jy dus reeds naby jou hounet en kan jy die vis sonder veel moeite in die net gooi. Sou dit gebeur dat die vis regtig vêr van jou hengelarea na een van die kante wegswem sal jy jou skepnet saamvat om dit daar te gaan skep. Sodra jy posisie in die water ingeneem het laat sak jy jou stok sodat dit ewewydig t.o.v. die wateroppervlak is.

Hierdeur word die vis na die bodem “afgetrek” waar dit veilig voel en minder spook as wanneer die stok se punt hoog in die lug gehou word en die vis in die water “opgelig” word. Met hierdie metode kan jy die vis baie vinniger tot teenaan die skepnet bring sonder veel van ’n gespartel. Onthou: hoe meer die vis spook en spartel hoe groter is die kans dat die hoek kan uitskeur en hoe langer neem dit jou om die vis te skep.

VOORBEREIDING VAN DIE SKEPAKSIE:
Los altyd jou skepnet by jou hounet, want jy skep 90% van die tyd jou vis reg langs jou hounet. Dit is onnodig om jou skepnet al die pad van jou staander af saam te dra, boonop beperk dit jou beweging in die water as jy dalk heen en weer moet beweeg agter die vis aan.

Sodra die vis ongeveer 10 meter van jou af is sak en die punt van jou stok tot net bo die wateroppervlak om steeds die vis onder die wateroppervlak te hou.

Nou rol jy die vis in totdat die voorslagknoop in die lyn presies halfpad tussen die katrol en die eerste ogie van die stok is. Jou voorslag se lengte moet van so aard wees dat wanneer jy jou stok loodreg t.o.v. die wateroppervlak sal hou, sal die strop net in die water hang – dit beteken dat sou daar ’n vis aan een van die hoeke wees, dit net-net onder die wateroppervlak sou wees en in die perfekte posisie om dit te kan skep.

Die voorslagknoop dien dus as merker sodat jy presies sal weet wanneer die vis die korrekte skepafstand van jou af is. As jy ’n vis probeer skep wanneer die afstand van die lyn tussen die stokpunt en die vis te kort is sal jy die vis uit die water oplig wat talle nadelige gevolge inhou, onder andere kan die hoek maklik uitskeur.

Sodra die voorslagknoop in posisie is moet jy jou katrol se Baitrunner funksie aktiveer wat beteken dat die vis jou nou nie omkant kan betrap as dit skrik en skielik wil weg swem nie. Jy kan nou die stok met jou linkerhand vashou en die skepnet met jou regterhand vat – die vis is steeds onder die water. Moet nooit die skepnet in die water laat sak nie – die vis kan in die net vas swem, die los hoek sal aan die net vashaak, die vis sal skrik en wegswem net om die hoek uit te skeur of die hoeklyn te breek!

SKEP!
Nou beheer jy die vis met jou stok en trek dit letterlik tot reg voor jou voete.

Al wat nou oorbly is om die stok op te lig en die skepnet onder die vis in te druk. Die vis verwag nie in hierdie stadium om uit die water “opgelig” te word nie, so nog voor die vis mooi weet wat gebeur is die net reeds onder hom.

HOEKVERWYDERING:
Dit is baie gemaklik om nou die skepnet tussen jou bene vas te knyp en die visstok op die raam van die skepnet neer te sit sodat die vis steeds in die water lê. Albei jou hande is nou vry om met die hoekverwydering en losmaak van die strop in die net voort te kan gaan. Jy kan ook met albei jou hande die vis hanteer om dit in die hounet te gooi.

Sommige hengelaars het ’n doelgemaakte stok – en skepnethouer aan hul netstaander vasgeheg om die stok en hounet in te plaas vir wanneer die hoek verwyder word. Verseker dat die strop heeltemal los in die skepnet is en gooi dit uit die net langs jou in die water in.

HOUNET TOE!
Draai die vis (spesifiek karp) onderstebo en plaas een hand oor die vis se kopgedeelte en hou met die ander hand die stertgedeelte vas vir maksimum beheer. Deur die vis onderstebo te draai beïnvloed jy die vis se balans en sal dit nie probeer om los te spartel nie. Verseker dat jou hounet se deksel goed toe is nadat jy die vis daarin geplaas het.




Related Articles

Close