Hoe teiken jy groter vis as jy aanhoudend klein vissies vang?

Morné Saayman: Ek sal dieper gaan en kyk of ek groter vis kry. Gebruik ‘n bodemstrop (Vaaldamstrop) met ‘n swaar sinker wat jy gemaklik kan gooi sodat jy oor die voerlyn kan kom in die dieper water waar groter vis is. Jou byt tempo sal verseker stadiger wees maar ek vang eerder groter vis. Apie Potgieter: Elke dam het sy “tricks” - dit hang af van dam tot dam. Hoe meer jy by ‘n dam hengel hoe beter leer jy dit ken. Wat vir my altyd werk om groter vis te vang is om groter aas (deeg) op te sit met ‘n pap backing agter die deeg en ook om dieper te hengel. Jy kan die aas teen die bol sit sodat die hoeke nie los hang nie – dit gee langer kans vir groter vis om by die aas uit kom. Die ouens hou ook daarvan om met ‘n mieliepit te hengel. Tom Ebersohn: Daar is ‘n paar antwoorde tot hierdie vraag: die eerste sal wees om jou aas aan te pas en om byvoorbeeld enige Fluoro of dip van jou bol af weg te vat en moontlik ‘n sterker geur aan te wend. Die hoekase kan ook aangepas word om ‘n groter aas op die hoek te sit. Ek het selfs al gevalle gehad waar ek die hoekaas kleiner maak en net ‘n klein degie op sit. Dan kan jy ook van jou bestaande kol beweeg deur net oor jou kol te gaan met een stok. Nog ‘n opsie is dat ek my afstand op een stok totaal en al wysig (verder) maar steeds op die kol bly met die ander stok. Dit gebeur gereeld dat jy wel daardie groter vis tussen die kleiner vis kry. As jy klein vissies op ‘n kol vang los jou stok bietjie langer al byt hulle - jy kan dan dubbels vang wat gewig opmaak, of jy kan gelukkig raak en ‘n baber vang wat daardie klein vissie op die hoek raakloop. As laaste uitweg sal ek babers op een stok teiken eerder as om net die kleiner vis te vang. Philip van Wyk: As ons die regte antwoord hiervoor gehad het dan sou ons net groot gevang het! Maar my persoonlike ervaring is dat ek sommer ‘n lekker lang deeg opsit met ‘n backing (vlapappie of GP Backing). Verder kan jy tegnies raak en jou aas terug druk in die bol, en probeer om agter of langs jou kol te hengel. Groter vis wei gewoonlik op die buite kante van jou voerarea. Verder kan jy ook probeer om met pitte te hengel, of die hoeveelheid fluoro op jou bol te verminder. Bertie de Meyer: Ek glo dit hang van persoon tot persoon af - baie ouens hou daarvan om pitte op te sit en baie maak die deeg groter. Ek sal nie eers twee keer dink om dieper te hengel nie; jy kan met pitte en groter deeg steeds op dieselfde kol nog klein vis vang wat nie weeg nie, dit is hoekom ek dieper sal hengel, want as klein vis eers begin wei op ‘n kol keer niks hulle nie. Ek sal van my kol afgaan en dieper gaan en minder dip en ‘n vla backing gebruik. As ek steeds klein vis vang daar binne, wat nie sommer gebeur nie, sal ek ‘n pit op sit en iets sterks op die bol soos garlic, duiwelsdrek of selfs geen dip op sit nie. Ulrich Sirgel: My teenvraag is: hengel jy sosiaal of kompeterend? As jy sosiaal hengel sal ek voorstel dat jy werklik groot gaan. Sit nommer 3 of nommer 5 hoeke op, een of twee pitte en sommer deeg agter die mielies. ’n Groot vis van 2kg het nie ’n probleem om diè aas aanbieding op te tel nie. As jy wil, kan jy selfs ’n haarstrop met drie pitte gebruik, of Tiger Nuts of selfs gewone grondboontjies aanbied. As jy ’n kompeterende hengel glo ek jy wil weeg-vis vang en is jou uitdaging om weg te kom van die 120/140g visse. Sit ’n strop aan met nommer twee hoeke, haak ’n enkel pit, verkieslik sommer ’n groot pit, op die hoek, maak ’n gat met jou vinger in die klaar gevormde voer en plaas jou aas aanbieding binne-in die voerbal. Druk die voerbal ferm toe sodat die aas nie uitsteek nie. Die kleiner vis sukkel om die bol so vinnig soos ’n groot vis te verorber en gee dit ook vir die groot vis kans om by jou aanbieding uit te kom alvorens die klein vis jou aas oppik. Jy gaan nog klein vis hier en daar vang, maar jou gemiddelde vis gaan groter word. Barend Breedt: Dit hang verseker af in watse dam en selfs watse oewer jy hengel, maar jy kan wel deur groter aas soos mieliepitte of groot deeg en selfs backings gebruik om die groter vissies te vang tussen die kleiner vis. Ek stel eerder voor dat jy moet dieper hengel – as die kleintjies op 60m pla, skuif een stok na 100m en as dit nie werk nie na 120m; naamlik soek die afstand waar die groter vis wei. Jonathan Carlson: Ek sal altyd dieper hengel omdat ek glo my kans om groter vis te vang is om dieper te hengel. Ek sal my degies dip en ook 'n baie groter deeg as normaalweg op sit. Ek het al in baie damme gevind dat 'n mieliepit wel soms beter werk vir groot vis, maar dit werk nie by al die damme so nie. Gooi bietjie van jou kol af - die klein vis gee nie die groter vis kans om by die voer uit te kom nie, veral as die vis die dag baie vinnig byt. Rian Putter: Eerstens moet die afstand wat die groter vis vanaf die oewer wei bepaal word. Tweedens hengel so lig as moontlik, gewoonlik dan ook so ver as moontlik. Derdens hou die aas so natuurlik as wat jy kan. Groot vis is slim, stamp eers die voerbol om dit te breek en as die bol natuurlik voorkom sal die vis begin wei. Elke hengelaar het ook sy eie keuse van dipse waarmee hy groter vis teiken. Dit is ook ‘n belangrike faktor by sekere damme. Groot aas speel wel ‘n rol, veral by spesiehengelaars, maar gebruik jou kennis en ondervinding want die omstandighede tydens hengel verander gedurig. Johan Pienaar: Eerstens sal ek my afstand aanpas en kyk of die groter vis nie dieper is nie. Tweedens sal ek my aas groter aanbied en dalk ‘n groter hoek gebruik vir groter aas aanbieding. Derdens sal ek fluoro vermy en my hoekase in my voerbol druk. Mieliepitte kan goed werk vir diè metode. Robert Breedt: Dit is verseker een van die moeiliker vrae om te antwoord - dit is net soos die vraag om weg te kom van al die klein geelvissies wat nie weeg nie. Daar is wel ‘n paar veranderinge wat jy op die dag kan probeer. Ek sal verseker my hengelafstande aanpas, groter aas aansit, soms ‘n groot backing agter die deeg sit, rondspeel met die geure en kleur op die voerbal asook net van die voerkol af hengel. Die groter vis is soms net ‘n entjie weg van die voerkol af.