Kanariekurper

Chetia flaviventris Kanariekurpers het al vir menige junior hengelaar groot genot verskaf omdat dit ’n vissie is wat in groot skole aangetref word en baie maklik is om te vang. Kanaries kan ongelukkig baie maklik ’n verpesting in ’n dam raak omdat hulle so goed aanteel, veral as daar nie ander roofvisse soos swartbaars en babers is om hul getalle onder beheer te bring nie. Kanariekurpers is ovaalvormige vissies met groot bekke. Hulle lyk baie soos klein nembwes (olyfkurpers). Soms word na die kanariekurpers as kerriebekke verwys omdat hulle dikwels geel is. Jong kanariekurpers is gewoonlik grys met ’n pers skynsel. Die volwasse visse is geelbruinerig van kleur. In broeityd is die mannetjies dikwels kanariegeel. Die beste manier om ’n kanariekurper te identifiseer, is deur na die anale vin (vin onder die pens) te kyk. Die anale vin het oranje kolletjies wat as egg spots bekend staan. Verder het kanariekurpers ’n oranje rif op die rand van hul rugvin. Hierdie vissoort kan tot 250 mm lank word, maar is gewoonlik tussen 80 mm en 150 mm. Die SA-kunsaasrekord is 0,590 kg en is by Klein Paradys naby Brits gevang. Kanariekurpers kom in warmwaterstelsels vanaf Gauteng noordwaarts in die Limpoporivier en sy sytakke, tot in Botswana en Zimbabwe voor. Jy sal kanariekurpers veral in klein baaitjies met klipperige of sanderige bodems aantref. Hulle word ook dikwels by bootlanserings, vasmeerplekke, heinings en ander mensgemaakte strukture in die water gevind. Kanaries is roofsugtige vissies wat maklik met erdwurms of kunsasies soos Sada Curlytails en Berkley Powerbait gevang kan word. Groter kanariekurpers kan selfs aan klein swaailemmetjies gevang word. Soms word kanaries ook deur hengelaars gevang terwyl hulle swartbaars met plastiekwurms of kunsvissies teiken. As jy die dag dus lus het om baie visse te vang, gaan gerus na Roodeplaat of Hartbeespoortdam en looi hulle! Bron: Paul Skelton, A Complete Guide to the Freshwater Fishes of Southern Africa. Uitgegee deur Struik. ’n Insiggewende reeks oor varswatervisspesies wat in Suidelike Afrika voorkom. Rudolph Venter het in damme en riviere regoor die land asook in ons buurlande gehengel en het reeds meer as 60 verskillende varswatervisspesies met kunsaas gevang. Kunsaashengelaars is spesiehengelaars by uitstek. Die doel van hierdie reeks is om hengelaars in te lig oor hoe die verskillende visspesies lyk, waar hulle voorkom asook interessante eienskappe van elke vissoort.