KANO-VLIEGHENGEL IN NOORD-KAAP: Naby Die Samevloei Van Twee Riviere

Hengel in die Noord-Kaap

WOORDE: Andre de Kock FOTO’S: Verskaf

Ek het in Delportshoop groot geword, daar in die hoek van die samevloei van die Harts- en Vaalriviere, so dertig kilometer anderkant Barkly-wes in die Noord-Kaap. Daar skoolgegaan, en toe baie jare later teruggekeer en skoolhoof van my alma mater geword. Nadat ek Kimberley toe getrek het om ‘n skoolhoofpos daar te aanvaar, was dit bietjie moeiliker om my stokperdjie te beoefen, naamlik vlieg- en kunsaashengel.

Reg om na die samevloei van die Vaal-en Hartsrivier te vertrek. So word die kano’s gelaai.

Partykeer gryp ‘n groot baber die kunsaas!

My gunsteling teikenvis was, en is steeds die grootbek-geelvis wat in hierdie riviere inheems is, met baber ook op die teikenlys. My seun, Conrad beoefen vir baie lank al slegs vlieghengel en teiken kleinbek-geelvisse in die talle strome by Delportshoop self. In die laaste jare kom die grootbekke slegs stroom-af voor.

My seun, seun, Conrad is ook ‘n bedrewe vlieg- en kunsaashengelaar en teiken ook graag die grootbek-geles.

So lyk die grootbek-geelvisse van die rivier. Hierdie een het die skaal op 8 kg getrek.

Nog een van die grootbek-geelvisse wat met vlieghengel geflous is. ‘n Gunsteling vlieg is die ‘Crystal’ wooly-bugger. Enige groter tipe vlieg met ‘n swart of groen werk ook baie goed.

Die area genoem is stroom-af van waar die Harts in die Vaal in vloei, met talle diep kuile en stroomversnellings wat met vlieg- en kunsaashengel geteiken kan word.

Ek het twee kano’s laat ombou sodat hulle met elektriese motors toegerus kan word. Dit maak dit makliker om vinnig vroegoggend by die gewildste strome uit te kom. Meer water kan dan gedek word. Met die bewaring van die geelvis in gedagte word vang en vrylaat streng toegepas.

Met my kano’s op die Vaalrivier; ‘n elektriese motor maak dit soveel makliker! (Die struktuur in die agtergrond is die Vaal-Gamagara pompstasie wat water voorsien aan Kathu en die omringende myne asook plase in die Kalahari.).

Ongelukkig het sosio-sosiale omstandighede op die oewers taamlik versleg as gevolg van diefstal en betreding vanaf ‘n naburige informele woonbuurt wat ontstaan het. Wat ook ‘n negatiewe invloed op vangste uitoefen is die stel van onwettige nette. Die slegte paaie en ruig bosse in die omgewing maak polisiëring van die gebied baie moeilik, eintlik ‘n baie hartseer situasie.