Karp met Kunsaas #4: Karp met vlieggerei saam met Francois Botha

Dit is meestal makliker om karp met ‘n kunsvlieg te vang as met kunsaas. Maar dan moet die karp op die oppervlakte vreet of die water moet nie te diep wees nie waar jy die karp wil vang. Karp moet gesien word om met vlieg te teiken. Gewoonlik kan mens die karpe sien as hulle sterte bo die water uitsteek waar hulle in die vlak water voer, of wanneer hulle voer los hulle ‘n string borrels. Plaas jou vlieg voor die borrels want dit is waar sy kop is, of kyk vir stofwolke soos hulle vir insekte, slakkies en skaaldiere soek, of water grasse wat beweeg. Luister ook vir suiggeluide soos hulle op die oppervlakte tussen gras suig of skuimlyne van alge en insekte. Ek verkies ‘n sewe gewig stok om karp mee te vang. ‘n Ses gewig is ook perfek, maar ek gebruik ‘n sewe gewig stok wat 10 vt lank is, waarmee ek dip en gooi. Die 10 vt stok werk beter as ek vir hulle dip met sy ekstra lengte. Dit is ook ideaal as ek ‘n baber sien of vir kurpers dip. Die katrol moet ‘n remstelsel hê, want dit is nodig as jy ‘n 10kg bul haak! Maak die rem losser as die vis naby die boot of skepnet kom, want as die vis jou sien gaan hy weer en weer hardloop. Ek gebruik ‘n dryfvlieglyn wat by my stok se gewig pas met 100m Dacron agterslag en ‘n 3x taps voorslag. Soms maak ek die voorslag self met 15 pond van 1.5m nylon vislyn gelas aan 10 of 12 pond van 1.5 m nylon vislyn. Hoe minder knope daar is om deur die ogies te gaan as die vis weer hardloop wanneer die vlieglyn verby die punt van die stok is hoe beter, anders kan jou stok se punt breek as jou voorslag se knope aan jou vliegstok se ogies haak. Daar is basies vyf metodes wat ek gebruik: Dip Metode Bekruip die karp waar hy in die vlak water voer. Die geringste geluid of vinnige beweging sal die vis laat skrik. Dip jou vlieg so 10 cm tot 20 cm voor sy mond en beweeg die vlieg effe op en af. As die vis se mond oopgaan suig hy die vlieg in terwyl sy kop effe lig. Kap onmiddellik voor hy die vlieg uitspoeg. Vir die metode word ‘n vlieg met ‘n lood of tunksten kraaletjie, of “dumbbelle” ogies gebruik wat vinnig tot voor die karp sink. Damme: Meeste damme en riviere veral noord in ons land soos Vaalkop, Roodekoppies en Roodeplaat.Vlieë: Hybrid ,Carp Tugger ,Carp Fritz met dumbbells , Zulu met brass bead. Gooi Metode Dit is waar jy die karp sien maar jy nie betyds naby genoeg aan die vis kan kom nie weens - die bodem wat raas, of watergras, of stompe, of tyd wat hy voer en aanbeweeg, ens. Hier moet jy akkuraat kan gooi want jy het dalk net een of twee kanse. Gooi so ‘n meter verby sy kop en lig jou stok se punt op sodat die vieg nog op die oppervlak nader beweeg tot so 20cm voor sy kop waar hy voer en laat sak en wag vir daai lippe. Damme: Baberspan , Bloemhof , Vanderkloof ,VaaldamVlieë: Zulu, Carp Fritz, Carp Tugger, Gold Ribbed Hare’s Ear Droëvlieg metode Die metode gebruik ek gewoonlik as ek van ‘n boot af hengel. Dan soek ek karpe wat gewoonlik skole op die oppervlakte eet. Dit is veral net voor die winter maande. Ek gebruik ‘n dryf vlieg en gooi dit voor die karp waar hy op die oppervlakte voer in skuimlynne wat deur die wind veroorsaak is of waterinsekte wat uitgebroei het. Kap sodra die karp die vlieg opslurp. Damme: Albert Falls, Inanda, Roodekoppies, Klipvoor en Hartbeespoort. Vlieë: Wally Wing Karp droë vlieg, Caddis, Elk Hair, Realistic, DDD, Adam’s, Brood vlieg en Beatles. "Strip or Streamer" metode Daar is min plekke in Suid Afrika waar ek dit sal gebruik. In Amerika is dit gewild waar varswaterkreef voorkom. Hier sal ek dit kombineer met drie vlieë; onder vlieg, ‘n groot Gold Ribbed Hares Ear vlieg, middel Carp Fritz vlieg op dropper lyn en bo ‘n Hotspot vlieg. Jy kan ook ‘n Carp Tugger vlieg gebruik wat jy verby die karps laat dryf of trek wat in die rapids voer, veral wanneer daar geelvis of moddervis eiers is. Plekke: Vaalrivier en Oranjerivier.Vlieë: Carp Tugger, Bloedwurm, enige Nymphs en Karp Fritz. Tenkara metode Hierdie is seker die mees opwindendste manier om karp te vang. Die stok is soos ‘n dipstok. Daar is geen katrol nie, net ‘n stukkie vlieglyn en voorslag en vlieg. Die vlieglyn word voor aan die punt van die vlieg stok vasgemaak met ‘n toutjie aan die stok se punt. Die hele lyn met voorslag is een en ‘n halwe keer die lengte van die stok. Jy gooi die vlieg voor die karp se kop terwyl hy eet en as hy dit vat dan hardloop en swem agter die vis aan tot jy hom uit kry! Die grootste een wat ek al so gevang het was 4kg. So vlak water is die beste plek en ruk hom so gou as moontlik op die oewer. Damme: Baberspan, Bloemhof en Vaaldam is die beste en damme met vlak baaie en karp wat langs die oewer af vreet.Vlieë: Zulu nat vlieg , Hybrid , Carp Tugger, Bloedwurm ,Gold Ribbed Hares Ear. Ten slotte – die domvlieg! Hier is ‘n vlieg wat die karp laat dom lyk, ek is skaam om dit te deel. Dit is so eenvoudig om te bind, maar dit werk enige plek! Ek gebruik dit in modderige water en dit werk so goed dat dit die karp laat dom voorkom. Dit verteenwoordig niks wat in die water voorkom nie, maar dit werk elke keer! Karp met Kunsaas #1: InleidingKarp met Kunsaas #2: Hengelgerei om karp met kunsaas te vang.Karp met Kunsaas #3: Hengelmetodes om karp met kunsaas te vang.Karp met Kunsaas #4: Hengelmetodes om karp met vlieg te vang.