Kies die regte oewer!

As jy vir die eerste keer langs ‘n hengeloewer staan, dan lyk dit somtyds tog te mooi en kies jy ewe gedweë altyd die gerieflikste stukkie oewer om vanaf te hengel sonder dat jy weet wat onder die water aangaan. Om ‘n idee te vorm van hoe dit onder die oppervlakte lyk moet jy eerstens kyk na die kontoere om die oewer self; daarna neem kennis van enige punte, sloepe, boom plantasies, riete, walle of inlope - hierdie strukture gee ‘n paar geheime weg en dis juis hierdie geheime wat ontgin behoort te word. Styl OewersVanaf ‘n styl oewer is dit baie belangrik om te onthou dat jy nie ver uit hoef te hengel nie aangesien jy gewoonlik redelike diep water baie naby aan die kant sal hê. Hengel op ‘n kort afstand is vir my seker die mees bevredigend aangesien die vis soveel harder baklei en gewoonlik met ‘n fenomenale vaart weg trek. Dit is ook veel makliker om jou area te voer en om strikke vir die vis te stel. Kyk baie mooi na die kontoere aan beide kante van die dam op hierdie foto. Die water gaan vlakker wees aan die oorkant en diep aan die duskant. PuntePunte verklik gewoonlik die teenwoordigheid van wisselende kontoere onder die water soos “drop-offs” wat baie goeie teikenareas is. Hier sal ‘n dominerende wind gewoonlik die vis in die sloep in lei en ook kos items deponeer wat gevolglik patrollie roetes vir Karp kan maak. Punte gee die hengelaar dus ook baie meer opsies vir teikengebiede as byvoorbeeld ‘n reguit oewer. Punte bied baie opsies. Let op waar die 2 pods geposisioneer is. SloepeGroot sloepe het die geneigdheid om vlakkerige water aan te dui teenoor klein, lang of smal sloepe veel dieper water sal aandui. Hierdie klein sloepe hou nie gewoonlik residensiële vis nie, maar sal van tyd tot tyd groot rondloper visse huisves. Die water digby die oewers – in hengeltaal as “margins” bekend - is hier wonderlike teikengebiede, veral op groter waters. Groot sloepe kan vir langer periodes Karp huisves, maar die presiese teikenareas sal gewoonlik die tussenseksie areas wees tussen harde en sagte bodems (wat later in hierdie reeks behandel word). Boom PlantasiesBoom plantasies op die oewer, wat gewoonlik aandui dat bome onder die water is, huisves feitlik altyd ‘n populasie Karp en gewoonlik ook die ou heel groot visse. Hier is die posisionering van jou kampie baie belangrik, want jy wil nie parallel aan so ‘n struktuur hengel nie, maar wel direk voor dit. Karp van alle groottes ken hulle omgewing baie goed en jy sal baie gou agterkom hoe min vis jy sal land indien jy parallel aan so ‘n struktuur sou hengel. Bome wat oor die water hang - soos op hierdie foto en die foto langsaan - is baie produktief in die hitte van die dag. Areas soos hierdie moet nooit afgeskryf word nie. Natuurrlike kos sal hier baie volop wees. Droë bome in die water is ‘n goeie teiken plek. RieteGroot bosse riete in die water trek my soos ‘n magneet. Ek het al telling verloor van die hoeveelhede vis wat ek oor die jare voor en binne in rietbosse gevang het. ‘n Tydjie gelede het ek en Loutjie Louwies gaan baarshengel op Hartbeespoortdam en eerstehands gesien hoeveel Karp binne in sulke riet bosse skuil en kos soek, terwyl al wat hengelaar die diep water uitgesoek het. Ek hoef nie hier eers te noem dat ons nie een hengelaar gesien het met ‘n buig in die stok nie. Teiken veral riete wat in redelike diep water staan - dit is juis hulle wat groot verrassings kan oplewer. WalleStyl walle (klei of modder) dui gewoonlik diep water baie naby aan die kant aan, met ‘n prominente val nie ver van die kant af nie. Hierdie areas kan baie keer daardie een ou grote oplewer, maar het al vele kere dosyne vis oor ‘n naweek beteken. Die beste metode hier is om parallel aan die oewer te hengel en ook nie te naby daaraan nie. Stilte is hier sonder twyfel die wagwoord. InlopeInlope lewer gewoonlik baie goeie vangste op, veral in die lente, vroegsomer, begin herfs en diep in die winter. Die “margin” areas naby die kant asook aan die oorkant van die dam is goeie teikengebiede, maar moet nooit die kante van die rivier bodem afskryf nie. Visuele struktuurVisuele struktuur moet nooit geignoreer word nie en kan enige iets van rotse, droë bome, riete in die middel van nêrens, eilande of pilare wees. Weer eens is dit belangrik om nie reg langs hierdie strukture te hengel nie, aangesien jy baie maklik jou vis, jou lyn (en jou ego!) kwyt kan wees. Geen obstruksie nie, maar enkele gras halms in 1,5m water is perfek vanaf September tot Desember. Hierdie vis is gevang voor die wit paaltjie op die foto, teen aan die dam wal in 3m water. Hierdie vis is reg onder die boom agter my se tak wat in die water hang gevang. Hierdie was 1 van 11 vis in 3 ure. Die bogenoemde teikenareas klink vreeslik idillies en ek weet dat daar vele damme in ons land is wat nie noodwendig aan enige van hierdie vereistes voldoen nie, maar dit is dus soveel meer belangrik om tyd langs die water deur te bring en noukeurig al die opsies te bekyk en dan eers jou keuse van hengelplek te maak. Die lekkerste plek lewer nie noodwendig die beste vangste op nie, so gaan stap langs die oewer en ondersoek al die moontlikhede - iewers sal daar iets wees wat anders is as langs die res van die oewer, hoe klein ook al.