Kompeterende Hengel En Ongunstige Toestande

Hengel is ’n buitelug sport, heelwaarskynlik een van die hoofredes hoekom ons sosiaal of kompeterend daaraan deelneem. Ek ervaar gereeld dat ek weer kans sien vir ’n nuwe week se uitdagings na ’n hengelsessie. Die wegbreek en ontspanning wat saam met die hengel verloop is waarskynlik nie die enigste rede vir die goeie gevoel na so ’n hengelsessie nie. Wetenskaplikes stel dit duidelik dat genoeg sonskyn jou beter kan laat voel. Die gevoel van “ek sien weer kans“ is dus geestelik sowel as gesondheidsgewys gefundeer. Hengel bly egter ’n buitelug sport en is hengelaars gevolglik aan die elemente van die natuur blootgestel. In Suid-Afrika sluit dit in stormsterk winde, reën, weerlig, vloede en ons gevaarlike sonskyn. Sosiale hengelaars kan hul hengel omstandighede kies. Hiermee bedoel ek dat hulle kan slegte omstandighede vermy deur bloot nie in sulke toestande te hengel nie. Ek onthou hoe my pa jare terug, nog voor die tyd van tegnologie en apps wat “best fishing days” aandui, ’n hengel uitstappie saam met ’n vriend van hom gereël het. Die vriend was een van die hengelaars wat erg aan die wind, maan, temperatuur, ens. vir hengelsukses geglo het. Hy het toe soos gereël my pa teen 04:30 by die huis kom oplaai en vertrek Vaalrivier toe. Om 05:00 arriveer hulle op Schoemansdriftbrug. Hy stop op die brug, draai sy venster af, lek sy finger nat en steek dit by die ruit uit. Na 10 sekondes se deeglike evaluering van die windrigting en temperatuur kom die kommentaar: “Nee, die wind waai uit die verkeerde rigting en is te koud”. Sonder enige verdere redekawel word die bakkie omgedraai en vertrek hulle weer terug huistoe. Kompeterende hengelaars het egter nie die voorreg om hul dag te kies nie. Datums word vasgemaak en ongeag die omstandighede moet gehengel word. Om suksesvol te kan wees is dit dus belangrik om jou toenadering sodanig aan te pas. Met die oog op dit gaan ek na ’n paar aanpassings in my hengel verwys wat hengel vir my ’n sukses in daardie toestande maak. Die windrigting en sterkte kan vinnig jou hengelsessie verander en daarom moet jy altyd voorbereid wees vir alle omstandighede. WEERLIG: Weerlig is een van die natuurverskynsels waarmee nie gespeel moet word nie. SAVOF bepaal dus dat tydens byeenkomste daar ’n weerligmeter by die beamptes moet wees. Dit is ook belangrik dat hengelaars gehoor gee aan hierdie reël soos neergelê deur die beamptes aan die begin van die dag. Daar is egter ook verskeie apps op selfone wat jou waarsku as weerlig in jou omgewing voorkom. Vir my eie veiligheid gebruik ek die “Lightning Alarm” app. Sodra dit aandui dat die weerlig in die omgewing van 20km weg van my af is, sal ek my stokke ten alle koste vermy, selfs al byt ’n vis. REËN: Ek het verskeie kere al gevind dat reën ’n goeie ding is in die sin van vis wat byt. Dit kan egter frustrerend word as jy nie daarop voorbereid is nie. Ek sorg dus altyd vir ’n goeie kwaliteit reënjas, asook twee goeie, waterdigte sambrele, droë handdoeke en klere. Ek plaas een sambreel oor my kas en een net agter my kas waaronder ek dan kan staan. Genoeg handdoeke word benodig om jou hande af te droog; sorg dat dit gebêre word waar hulle nie nat word nie sodat jy deur die loop van die kompetisie jou nat handdoek kan ruil vir ’n droë een. Droë klere help dat jy nie vanmiddag nat huistoe hoef te ry nie. WIND: Wind is een van daai elemente wat jy nie sonder wil wees by die water nie, maar wat ook hengel moeilik kan maak. Water wat soos ’n spieël lê, skep altyd ’n idilliese beeld, maar kan hengel baie traag maak. ’n Ligte wind van voor of agter maak hengel gewoonlik aangenaam. Toerusting soos windpenne kom handig te pas wanneer die wind sterk van die kant waai. Die probleem begin egter as die wind stormsterk van die kante begin waai. So onthou ek ’n SA’s by Vaaldam waar die wind so erg gewaai het dat hengelaars se staanders en kaste omgewaai het, en diè wat ’n ligte sinker gebruik het se lyne het letterlik uitgespoel. Vir ’n matige sterk wind is windpenne ’n goeie oplossing. Die penne word voor jou stokke in die water geplaas en sodra jy ingegooi het word die lyn oor die penne geplaas. Stormsterk wind is baie hengelaars se ondergang, dit is iets wat elke hengelaar moet leer om by aan te pas. Die poliesman word nou tussen die penne en jou stok se punt geplaas wat byt aanduiding meer duidelik maak as wanneer die penne nie gebruik word nie. Indien daar opdrifsels teen die kantlangs voorkom sal die penne ook voorkom dat dit aan jou lyn vashaak. Met stormsterkte wind gaan ’n ligte sinker wind-af spoel. Dit verplig jou dan om na gooistroppe (Vaaldam/Boerstroppe) met sinkers (afhangend van die omstandighede) van P4- P8 te hengel. Hou egter hier in gedagte dat jou stok wel die swaar sinkers moet kan hanteer. Indien jy sonder windpenne hengel het ek al gevind dat die vis nie die lyn kan trek nie a.g.v. die weerstand van die water teen die lyn. Indien die vis terug byt val die poliesman ook nie soos normaalweg nie. Die wind hou die lyn styf al sleep die vis die sinker terug na jou toe. In sulke toestande moet jy die poliesman in lyn kry met ’n vaste merk voor jou. As ’n vis byt sal dit dus weg beweeg van die merk af. Meeste hengelaars mis hierdie byte omdat hulle nie seker was waar hul poliesman was nie. Met ander woorde die poliesman sal nie op of af beweeg soos normaal nie, maar links of regs van jou merk. VLOEDE OF ERGE STROME: Indien ’n stroom opdrifsels of hiasinte bevat, is die gebruik van ’n “back lead” ’n goeie oplossing. Sodra die stroom egter jou sinker spoel, moet swaarder sinkers oorweeg word. Uit eie ervaring weet ek dat jy met ’n gly-Rietvleistrop kan hengel tot op ’n punt, waarna jy sal moet oorgaan na ’n gooistrop. Hier kan van P4 tot P8 sinkers gebruik word na gelang van die stroomsterkte. Sonder die back lead moet jou poliesman met ’n merk aan die oorkant opgestel word. Die poliesman sal in die meeste van hierdie omstandighede ook links of regs van hierdie merk beweeg en nie op of af soos normaal nie. Indien jy nie die byt raaksien nie, sal een van twee goed gebeur, eerstens gaan jy die vis verloor wat tot gevolg het dat jy na ’n lang wag sal moet uittrek en weer jou aas ingooi. Tweedens sal jy, indien die vis homself behoorlik vasgebyt het, na ’n tyd merk dat jou lyn heel stroom af lê. Sodra jy nou uittrek behoort die vis reeds aan die hoek te wees. In so ’n geval het baie hengeltyd verlore gegaan, wat beteken dat dit jou ’n plek in die kompetisie kan kos. Dit is egter belangrik om voor die tyd seker te maak watter grootte gewig jy wel suksesvol met jou stok kan werp. ’n Tè swaar sinker kan dalk jou stok beskadig. Tydens die afgelope SAVOF Spele was sterk strome en erge wind presies die situasie wat die hengelaars moes oorkom. AFSTAND: Tydens ’n kompetisie het jy nie die voorreg om te kies waar jy wil sit en hengel nie, gevolglik vereis die helling van die dam soms dat jy lang afstande moet gooi om by die vis uit te kom. Hier is dit belangrik dat jy met die regte strop en die regte stok hengel sodat jy by die vis kan uitkom. Gly-Rietvleistroppe is in sulke gevalle nie die mees geskikte strop om te gebruik nie. Gooistroppe word dan gebruik en baie kere selfs sonder voer op die strop. In 2019 moes ek ’n kompetisie hengel in Nqwebadam. Tydens die voorafgaande tyd was die inligting aan ons dat jy vlak kan hengel, jy moet net voer in die water kry. Na die oefendae het ons besef dat die vis dieper as 150m lê. Met die regte gerei en strop kon ons toe wel vis tussen 150m en 160m met swaar gooistroppe en net wurms op die hoeke vang. Die natuur kan soms uitdagings vir ons as hengelaars bied, deur egter die korrekte voorbereiding te tref kan die meeste hiervan oorkom word om steeds ’n genotvolle en suksesvolle hengeluitstappie te beleef. Links-en-regs bo: Neem skuiling teen die son en tref voorsorg, Suid Afrika se son is een van die gevaarlikste elemente en hengelaars wat dit ignoreer kan baie sleg tweede kom. Onder: Skrywer met 'n skaflike vangs in baie nat en moeilike omstandighede.