Kunsaashengel In Roodeplaatdam Vir Baber, Karp En Bloukurper

Ek hengel graag in Roodeplaatdam omdat dit so naby my huis in Pretoria geleë is. Ongelukkig, soos meeste damme naby ons stede, is die dam se waterbesoedelingsvlakke baie hoog wat kunsaashengel in die somermaande ietwat demp omdat die water se deursigtigheid afneem. Roodeplaatdam se spesieverskeidenheid het baie afgeneem teenoor wat dit jare terug was. Die dam het ’n gematigde water temperatuur en sy bodem is hoofsaaklik gruisagtig wat dit uiters geskik maak vir ’n groot verskeidenheid spesies. Volgens hengelrekords is heelwat spesies in die dam beskikbaar, soos karp, baber, swartbaars, bloukurper, vleikurper, kanariekurper, dwergkurper, kleinskubgeelvis, papierbek, ghieliemientjie en paling. Meer as helfte van hierdie indrukwekkende lys spesies het egter óf verdwyn óf kom in baie lae getalle in die dam voor. Die hoofoorsaak hiervoor is waterbesoedeling. Jare terug was daar so baie papierbek en kanariekurpers in die dam dat hengelaars dit as ’n pes beskou het. Swartbaars word ook al hoe skaarser. Tans is die dam darem steeds bekend vir sy groot karpe, baie babers en redelike getalle bloukurpers wat daar voorkom. Daar is verskeie openbare hengeloewers rondom die dam met oorde soos Natuurbewaring, Hengelaarsvriend, Noord-Transvaal gronde en Marleo van die bekendste hengelplekke. Die enigste openbare bootlansering is by Natuurbewaring se oord op die Molotopad. Die dam het basies twee vertakkings met talle kleiner baaie en inlope. Die Pienaarsrivier inloop is die gedeelte waar die roeiklub geleë is. Motorbote mag wel daar vaar, maar mag nie in die roeibane van die roeiers of aan die oewerhengelkant hengel nie en mag net teen luierspoed beweeg. Die ander vertakking van die dam is die Edendalespruit se inloop. Hierdie gedeelte is gesoneer vir motorbootsport. Daar is oor naweke gewoonlik heelwat motorbote wat nie hengel nie en boothengel moeiliker maak. Hierdie artikel handel oor hoe om baber, karp en bloukurpers in Roodeplaatdam te vang. Baber Rudolph Venter met n baber van10.04kg. Roodeplaat is by uitstek ’n baberhengeldam. Gedurende die laatwinter tot met laatlengte is die dam se water gewoonlik redelik helder wat baberhengel soveel makliker maak omdat jy die babers op die bodem kan sien lê. Gedurende hierdie tyd van die jaar word die babers hoofsaaklik met die dipmetode gevang en hiervoor werk ’n baber roepstok die beste. Diè stok het nie ogies nie en die lyn loop deur die buis van die stok. Die roepstok is eintlik ’n seevisstok en is so 13 voet lank. Op die stok is ’n draaispoelkatrol gelaai met 100 pond braid. Ek gebruik ’n Blue Marlin Bigshot roepstok, met ’n Penn15 Phantom katrol en 100pond Berkley Whiplash braid. Christiaan Boshoff wys hy kan ook babers vang. Die babers kom bedags in die vlakker water lê, in water van 1 tot 2 meter en is maklik om raak te sien. Dit is belangrik om geluidloos met die jou elektriese sleepmotor deur die water te beweeg. Die beste is om die son van agter of bo te kry want dan sien jy beter in die water. As die wind waai kan die rimpels jou sig belemmer. Gebruik die wind om die boot aan te dryf en minder op die sleepmotor te wees om so min as moontlik geraas te maak. Die babers is gewoonlik glad nie aggressief nie en gryp die kunsaas eerder reaktief as om dit noodwendig te wil eet. Die beste kunsaas is ’n mediumgrootte baberloodkop wat geluidloos op die babersnorre gedip word. Enige plonsgeluid van die loodkop sal die baber laat skrik en spaander. Jy moet vinniger wees met die korrekte plasing as wat die baber jou kan raaksien. Amper soos jag, as die bok jou eerste raaksien het jy te laat geskiet. Die dipmetode vat oefening, maar hoe meer jy dit doen hoe beter sal die plasing wees. Die skrywer met n lekker Roodeplaatdambaber. As die water nie helder is nie, veral later in die somermaande, werk sommige ander metodes van kunsaashengel. Daar is redelik baie rietbosse op die oewers en die babers hou daarvan om in hierdie rietbosse te skuil wat diep genoeg in die water is. Hier kan die plons en roepmetode gerus gebruik word. Plons saggies op een plek langs die rietbos. Begin saggies met jou roepstok roep (klits die water saggies met die stok se punt) en wissel dan af met plonsies. Gebruik ’n baberloodkop. Die loodkop moet net buite sigafstand van die roepstok se punt hang. Hou die riete fyn dop vir beweging van die babers in die bos. As die riete naby jou loodkop skud is daar babers op pad na jou kunsaas. Die baber vat gewoonlik hard en vinnig. Dit is onverwags en baie lekker. As jy een baber by ’n rietbos gevang het kan jy maar aanskuif na die volgende rietbos want die ander babers in die bos sal almal gevlug het. Soms kry jy baie baber aktiwiteit in vlakker baaie. Jy sien hoe die babers draai en asemskep. In die vlakker baaie kan jy die babers met vlakloper kunsvissies of lepeltjies vang. Kunsvissies wat goed hiervoor werk is Salmo Hornets, Rapala - of Sensation Brokenback terwyl die Dam Effzet lepeltjies ook baie goed werk om babers in vlak water te vang. Maak lang gooie oor die skool babers en bring teen ’n matige spoed in. ’n Mediumgerei visstok met ’n koffiemeul- of draaispoelkatrol gelaai met 14kg lyn is geskik vir hierdie hengelmetode. Karp Roodeplaatdam se karp bevolking het baie meer geword in die afgelope jare. Lank terug was daar minder maar groter karpe, en deesdae is daar meer, maar ook meer kleiner karp. Die gemiddelde grootte karp wat op kunsaas gevang word, is sowat 5kg wat glad nie sleg is nie. Oor die jare het ek al drie karp oor tien kilogram in Roodeplaat met kunsaas gevang. Daar is heelwat karp wat kruis geteël het met koi-karp en jy sien die wit-gevlekte karp orals in die dam swem. Koos Bonnema met n mooi karp op n Sada loodkoppie gevang. Karp is gewoonlik nie ’n maklike vis om op kunsaas te vang nie, maar beslis een van die lekkerste visse om op kunsaas te vang. Die gooimetode om karp te vang werk die beste in Roodeplaat omdat jy gewoonlik nie naby genoeg aan die voerende karp met jou karpdipstok kan kom nie. ’n Mediumgerei gooistok met 2500 grootte koffiemeulkatrol werk die beste om karp op die metode te vang. Ek gebruik my Berkley Veritas mediumgerei visstok met ’n 2500 Penn Clash en 7,2kg Berkley Nanofil vislyn gelaai met ’n Sada karploodkoppie. Koos Bonnema met n stewige karp van 6.7kg. Kyk waar die karp in die vlakker water voer. Jy kan die karp in baie vlak water tot so 2 meter water vang. Die afstand tussen jou en die voerende karp moet nie te ver wees nie (so 10 meter) want jy moet die vis goed kan raaksien. Gooi die loodkoppie ’n hele ent verby die voerende karp sodat die vis nie die plons van die loodkoppie hoor nie. Bring die loodkoppie vinnig op die oppervlakte in sodat jy dit mooi kan sien inkom. Laat dit reg voor die mond van die voerende karp sak. Dit is nogal moeilik om reg te kry, maar met oefening kry mens dit reg. Die karp sien die loodkoppie en suig dit op. Moenie kap nie, maar tel net jou visstok se punt op en set die hoek. Bernard Venter met n mooi karp op n Sada loodkoppie gevang. Bloukurper Bloukurpers kom hoofsaaklik in die baaie van die dam voor. Die beste tyd om bloukurpers te hengel is in die lentetyd en laat somer. ’n Medium of mediumlig-gerei stok met ’n klein koffiemeulkatrol en 8-pond lyn kan gebruik word. Ek gebruik ’n Berkley Veracity mediumgerei visstok met ’n 2000 Penn Clash en 5,2kg Nanofil om bloukurpers te vang. In die lente maak bloukurpers neste en kan redelik maklik gevang word. ’n Sada karploodkoppie kan in die nes gegooi word. As die kurper die loodkoppie optel om uit die nes te verwyder kap jy en het die vis. Plaas asseblief die vis dadelik terug om terug nes toe te gaan. Chris Boshoff met n mooi blou kurper by Roodeplaatdam gevang. In die laatsomer vorm die bloukurpers skole en dan werk ’n klein swaailemmetjie of Sada Curlytails die beste. Maak lekker lang gooie deur die skool kurpers en bring teen die stadigste inbring spoed moontlik die swaailemmetjie in. ’n Sada Curlytail word op ’n nommer 10 reguitsteel hoekie geplaas met ’n knyploodjie so 20cm van die hoek af. Die kunsasie word stadig, met hop-hop bewegings, deur die skool getrek. Die bloukurper tel gewoonlik die kunsasie vanaf die bodem op. Jy moet blitsvinnig kap om die hoek te set voordat die vis weer die kunsasie los. Bloukurpers kan baie goed sien en dit is belangrik om die maksimum gooiafstand te kry, veral as die water skoon is. Pieter Steytler heel ingenome met sy bloukurper. Die pad vorentoe Met al die waterbesoedeling weet ons nie hoe lank kunsaashengel in Roodeplaatdam ons nog beskore sal wees nie. Dit lyk egter nie of baber en karp getalle afneem nie, inteendeel die babers word al hoe meer en groter. Of bloukurpers sal oorleef sal net die tyd leer.