KUNSAASHENGEL: ‘n Besoek aan Loskopdam in die winter – babers of swartbaars?

WOORDE: Bernard Venter FOTO’S: Verskaf Loskopdam is vir seker een van die mees gewilde hengeldamme in Suid-Afrika! Vir die kunsaashengelaar is daar in elke seisoen van die jaar vis by die dam om te vang. In die somer kan meer as 13 visspesies gevang word, letterlik van ‘n ghieliemientjie tot ‘n baber. In die lente maak die vis reg om te broei en is dit veral groot swartbaars wat dan geteiken kan word. Deur die winter is die dam baie gewild vir sy mooi babers maar ook vir swartbaars. Gedurende herfs voer die bloukurpers vir oulaas voor die winter kom. Ek en my seun Rudolph was die afgelope winter gedurende Junie by Loskopdam. Ek wou die babers teiken en Rudolph die swartbaars. Op Saterdag was die weer koud en bewolk en dit het selfs deur die dag met tye gereën. Met die koue en bewolkte weer was babers beslis nie ‘n opsie nie. Daar was bitter min bote op die dam en net die bittereinders het probeer om vis te vang. Ek en Rudolph val onder hierdie kategorie en ons was reeds met sonsopkoms net na ses-uur die oggend op die water. ... vat ‘n swartbaars my stok en trek dit oorboord! Instinkmatig duik ek agterna. By ons eerste hengelplek aangekom gooi ek my plastiese wurm in die water, sit my stok op die dek neer en vroetel in die bootluik om my donkerbril uit te haal. Nou-ja, ons het vir seker op die regte plek stilgehou, want terwyl ek my bril uithaal, vat ‘n swartbaars my stok en trek dit oorboord! Instinkmatig duik ek agterna. Ek weet nie of dit was om my stok te kry of om die vis te vang nie! Nie krokodille of die koue water kon my keer nie! Nodeloos om te sê ek is toe sopnat en al my warm klere help absoluut niks nie en ek trek feitlik als uit. Ek is dankbaar ek het my stok in die duikslag raakgevat, al het ek die vis verloor. Die stok en katrol is ‘n paar duisend rand om te vervang. Dit was nog voor 7-uur die oggend en vrek koud en om alles te kroon het dit so liggies begin reën. Rudolph kry sy pa jammer en deel een van sy warm baadjies met my. Gelukkig het ek darem ‘n reënbaadjie op die boot wat gehelp het om my bolyf droog te hou. https://youtu.be/zzvigimKMgc Maar bittereinders is ons en die vis byt mos, so ons hengel die dag deur, nat en koud of te nie! Ons vang tussen ons twee net vier swartbaars vir die dag, maar die gemiddelde grootte is ver oor ‘n kilogram met die grootste 1,8kg. Dit was reeds donker toe ons by ons blyplek aankom. Eskom se beurtkrag help vir seker nie, maar ek het ‘n lekker warm bad geneem en ons het verder langs ‘n groot kampvuur gekuier tot die krag weer aangekom het. Bernard Venter en sy seun Rudolph (onderste foto) met mooi swartbaars wat hulle op Loskopdam gevang het. Die Sondag se weer was pragtig. Dit was ‘n lekker wintersdag met genoeg sonskyn. Ons het eers agt-uur op die water gekom. Ek het my vrou belowe ons sal net na middagete terug in Pretoria wees. Maar die hengel was te lekker! Ons het begin om swartbaars te teiken, maar soos die son al hoër skuif, het ek al hoe meer vir Rudolph gesê dis nou tyd om die babers aan te tree. Dit was windstil en ideale weer om babers te vang. Die babers kom sonbraai dan op die vlakker banke van die dam wat dit ideaal maak vir baberhengel op kunsaas. Maar net as ons die baberstokke wou uithaal, kry ons weer swartbaarse op die vlakker oewers en hou ons aan om die swartbaarse te teiken. Dit het al hoe later al hoe beter geword! Ons vang toe die Sondag ‘n mooi sak swartbaars met drie visse oor twee kilogram (2,3kg, 2,8kg en 2,9kg) en nog meer tussen een en twee kilogram. Ons het eers die boot net voor vier-uur die middag uitgehaal en die pad huis toe gevat. Middagete tuis word toe maar aandete en ons was net te dankbaar ons het lekker kos tuis wat vir ons wag. Ons het meeste van ons swartbaarse op KVD Ocho stickbaits gevang. Die beste kleur vir ons was die immergewilde pers (Junebug). Ons het gewigloos gehengel wat die sak na die bodem van die stickbait baie natuurlik maak. Die dieper water langs die berghange het vir ons heelwat swartbaarse opgelewer oor die duur van die naweek. Maar toe ons die babers op die vlakker oewers gaan soek, het ons ook baie mooi swartbaarse daar gekry. Die kunsaas wat vir ons die beste gewerk het, was ‘n Junebug 5” KVD OCHO stickbait op ‘n 4/0 OMTD swimbait hoek. Die OCHO stickbait het baie sout in wat dit vinnig laat sink en alhoewel die plastiese wurm baie sag is, is dit besonder duursaam. By Loskop kan babers met ‘n baberdipstok (roepstok) of ‘n gooistok gevang word. Die baberdipstok word gebruik om ‘n baberloodkop op die baber se snorre te dip waar dit in die vlakker water lê en sonbak. Die gooistok werk eintlik beter, want jy kan die baber op gooi-afstand teiken. Ek verkies ‘n wit loodkop om die babers op die gooistok te vang, want jy sien die wit loodkop net soveel beter as jy dit deur die water trek en op die baber se snorre neersit. Die wit loodkop (jig) wat ek gebruik om babers in Loskopdam te vang. Uiteindelik het ons toe net swartbaars gevang want dit was baie lekker. Volgende winter vang ons dalk weer net babers.

KUNSAASHENGEL: ‘n Besoek aan Loskopdam in die winter – babers of swartbaars?

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

Guess the mass of the LARGEMOUTH BASS and WIN an Adrenalin Fishing Tackle Hamper

LESERS | READERS

HARTBEESPOORTDAM: Ifafi en ‘Om Die Dam’ Combo

GHOST CARP in the Western Cape

FIVE TOP SENSATION 13FT RODS ON REVIEW

Fishfinder – JULY

DIE KATROLLE SING: Baber met die naam Jasper

DEEP SEA ADVENTURES: MARLIN ‘BUCKET LIST’ FULLHOUSE!

BEACH FISHING: PB’s in EASTERN CAPE

BAARS-AKADEMIE: So Gepraat Van Wurms …