KwaZulu-Natalse Geelvis

Labeobarbus natalensis Die KwaZulu-Natalse geelvis se streeknaam is scaly (meervoud: scalies), die naam waaronder dit algemeen bekend staan. Scalies lyk baie soos die kleinskub-geelvis, maar dié twee spesies word nie saam aangetref nie. Hierdie visspesie word slegs in KwaZulu-Natal se waters gevind en is ’n stroomvis. Gesonde scaly-bevolkings kom algemeen in KwaZulu-Natal se riviere voor, waaronder die Mooirivier, Umgenirivier en Tugelarivier. Hul verspreiding is van die Mkuzerivier tot by die Umtamvunarivier op die Oos-Kaapse grens. Scalies word ook by verskeie damme soos Albert Falls en Midmar se rivierinlope gevind. ’n Wyfie kan tot 20 000 eiers tydens broeityd dra. Die kleur van die spesie wissel baie van plek tot plek. Sommige riviere huisves heldergeel scalies, terwyl ander riviere valer olyfgeel scalies het. Soms het hulle ’n brons skynsel op hul blaaie. Die water se helderheid beïnvloed die scalies se kleur. Soos meeste geelvisspesies, verskil scalies se bekke ook grootliks afhangende van die struktuur waarop hulle wei. Soms het hulle dik rubberlippe en ander kere weer dun, harde lippies. Ek het ook al in sommige individue ’n vals lipformasie waargeneem wat voor bokant die bek sit en veroorsaak dat dit lyk asof die vis ’n dubbele bolip het. Die skubbe is redelik klein en hulle het 35 tot 39 skubbe op die laterale lyn vanaf die kiefdeksel tot by die stert. Verder het scalies ’n taamlike groot stertvin. Hierdie visspesie het ’n langwerpige vorm en is dus vir spoed gebou. Die SA-rekord vir scalies is 4,628 kg, wat sedert Oktober 1956 staan. ’n Vis bo 2 kg is ’n goeie vangs. Hul habitat sluit in stroomversnellings tot diep, stadig vloeiende poele. Die visspesie se dieet bestaan uit klein watergoggas, krappe en klein vissoorte. Scalies is aggressiewe kalante wat doeltreffend met verskeie hengelmetodes soos aas, kunsaas en vlieghengelgerei geteiken kan word. Ek het ’n paar jaar gelede tydens Nasionale Kunsaashengelkampioenskappe by Albert Falls mooi scalies met ’n ligtegerei-visstokkie, gelaai met swaailemme of Salmo Hornets, gevang. As jy naby ’n rivier met scalies bly, nooi ek jou om ’n paar van dié gedugte stroomvisse vir my part te vang! Bron: Paul Skelton, A Complete Guide to the Freshwater Fishes of Southern Africa. Uitgegee deur Struik. ’n Insiggewende reeks oor varswatervisspesies wat in Suidelike Afrika voorkom. Rudolph Venter het in damme en riviere regoor die land asook in ons buurlande gehengel en het reeds meer as 60 verskillende varswatervisspesies met kunsaas gevang. Kunsaashengelaars is spesiehengelaars by uitstek. Die doel van hierdie reeks is om hengelaars in te lig oor hoe die verskillende visspesies lyk, waar hulle voorkom asook interessante eienskappe van elke vissoort.