Weskus: Langebaan & Omgewing -3

[Weskus: Langebaan & omgewing DEEL EEN] Die wit stompneus (Rhabdosargus globiceps) of soos algemeen genoem Stumpy, is ’n endemiese vis aan die Suid-Afrikaanse kus en word aangetref vanaf die Kei rivier tot by Angola. Hier op die Weskus in Langebaan is hulle ’n gesogte vangs en verskaf ’n heerlike geveg op ligtegerei en is ook smullekker in die pan. Hulle kom voor in die getymeer en word oor die algemeen so 20-40cm groot. Stumpies hou van sanderige bodems en die vlakker water in die meer pas hulle goed, alhoewel hulle in die see tot op 50m diep aangetref word. Die jong vis is lief om in en om die seegras te bly. Die stompneuse van die Weskaap skiet kuit so van Julie tot Februarie. Die eerste stop as jy Langebaan binnekom om te hengel moet verseker hierdie ou bekende gebou wees waar jy jou hengel en aasmaak lisensie kom uitneem. Die daglimiet is 10 vis per dag per hengelaar en moet 25cm meet om wettig te wees. ’n Hengellisensie is nodig wat by die poskantoor te koop is. In Langebaan is die beste maande om hulle aan te keer in Oktober en November en weer in Maart en April. Hier is die algemene vangs so 600-700 gram, en ’n goeie vangs sal so 1,5kg wees. So nou en dan kom daar ’n bielie uit wat die skaal op so 2kg trek. Die stompneus het ’n baie spesifieke trek-byt en kan duidelik onderskei word van die ander klein aasvreters wat gewoonlik op die bodem wei. "Wanneer jy die byt voel, gee so effens lyn tot dit mooi trek en slaan dan aan" meen Terry Boucher, een van die spesialiste op hierdie gebied. Die beste tyd om hulle te teiken is twee ure voor laagwater as die gety terugtrek, en twee ure na laagwater as die gety weer begin instoot. Hulle is ook fluks aan die byt in die nag, met dieselfde gety kondisies. Op Langebaan is daar ’n paar plekke wat bekend is vir die Stumpies, maar die belangrike faktore om voor te soek is water wat so tussen vier en sewe meter diep is, verkieslik op ’n skuins sanderige bodem. As die water tussen 16˚C en 19˚C is, dan vreet hulle sommer lekker. Terry Boucher en sy skippie, “Dot-T” wat na sy vroulief vernoem is, vanweë sy liefde vir hulle albei, is ’n bekende gesig by die lanseerblad op Langebaan. Terry se boot is funksioneel ingerig met een van die permanente en baie belangrike stukkies toerusting, naamlik die lang krewelpomp (sien die blou pyp) wat baie prakties stewig vasgemaak word hier agter, mooi uit die pad uit. 1-2-3 vinnige rats aksies en ’n paar krewels val in die net. Hier werk twee stelle hande lekker en vinnig word genoeg modderkrewels bymekaar gemaak. Langebaan het baie plekke wat aan hierdie vereistes voldoen, maar as jy daar is, vra gerus rond vir die "elf lyn", "donker gat", "middel keel" en rondom die eiland. Oppad na een van hierdie plekke toe, stop gerus naby die paaltjies op een van die rooi-aas banke en soek vir ’n mooi plekkie tussen die seegras waar jy die bodem mooi kan sien en wat bereikbaar is met ’n lang krewelpomp, om die beste aas vir vir die Stumpies te versamel - modderkrewels! Nou hier is die belangrike deel, en vir my een van die mees effektiewe maniere wat ek nog gesien het. Dit is vinnig en moeiteloos, gegewe die feit dat jy die regte toerusting het en presies verstaan hoe om te werk te gaan. ’n Lang krewelpomp van ten minste twee meter is nodig. Wanneer jy die plekkie mooi geïdentifiseer het, ry so 10m stroom-op en gooi ’n anker sodat die boot mooi bokant die oop kolle tot stilstand kom. Gebruik ’n skepnet of dryfnetjie met klein gaatjies, wat sommer so oor die boot se kant gehou word, binne-in die water. Soms kom daar sommer nog so paar diertjies in die mengsel uit, wat heel interessant is, maar nie eintlik goeie aas nie. Hier is een van die unieke Isopoda spesies wat in Langebaan voorkom, ’n spinnekopkrap en ’n klein tongvissie (Sole). ’n Plastiese emmer of mandjie werk mooi om die aas lekker vars te hou, en kan dit maklik weer in die water gedoop word om dit nat te hou. So ’n klompie krewels is genoeg om ’n sessie te hou. Die langsteel hoek het ’n baie spesifieke funksie, en hou die aas mooi reguit en help om dit makliker te haak. … wat uiteraard ook gemeet moet word, net om seker te maak. Hierdie een is amper groot genoeg - stompneus moet meer as 25cm wees, anders moet dit terug. Die eerste mooi Stumpy van ons sessie…. Hier is dit maklik as twee persone saamwerk, waar een die net vashou en die ander die pompwerk doen. Druk die pomp diep in en terwyl die agterste hand trek, druk jy die pomp verder in die modder in. Haal dit uit en maak hom leeg in die net. Jy sal dadelik sien as ’n area meer krewels lewer en pomp dan sommer gou nog ’n paar in die area terwyl die boot op die plek is. ’n Plastiese mandjie met gaatjies in werk baie goed om die diertjies vars en ongeskonde te hou totdat hulle gehaak moet word. Die daaglikse limiet op modderkrewels is 50 en ’n wettige aaslisensie is nodig. Die skerp langsteel hoek haak mooi deur die harde benerige bek. Om die Stumpies te teiken is eintlik heel eenvoudig, en ’n medium of medium-sagte stok van 6-7 voet en ’n koffiemeulkatrol met 10-15 pond lyn op is meer as voldoende. Die byt is dan sensitief en die geveg is lekker pret op die ligter gerei. Hierdie hengelaartjie, Owen Boucher het die dag saam met sy oupa op die boot spandeer en spog met een van sy vangste. In hierdie waters is dit natuurlik altyd moontlik om ’n ander spesie soos ’n hondhaai of kabeljou op te tel, en dan is dit ’n ander geveg, maar dis maar waaroor hengel gaan. ’n Ronde of ovaal glysinker van so 2-3oz, met ’n langsteel 2/0 hoek op ’n 20lb hoeklyn van so 500-600mm, bied die aas perfek aan. Met die gety wat redelik trek kan die aas vinnig gesak word totdat die sinker die bodem tref en dan vasgehou word. As die sinker baie deur die gety gelig word, laat nog so bietjie lyn uit, of gaan na ’n 4oz gewig. Terry hou daarvan om met die stok in sy hand te sit as hy Stumpies hengel, om beter in kontak te wees met wat op die bodem aangaan en vinnig te kan reageer as die aas opgetel word. Om die beste te maak van jou stompneus dag, maak seker dat die aasversameling en alle voorbereiding noukeurig gedoen word, doen moeite om presies te bepaal waar die boot moet lê as dit geanker is, en wees gereed om te hengel so 2 1/2 ure voor die gety draai. Posisioneer die boot sodat die kombinasie van die stroom en die wind jou nie te veel laat swaai nie. Geniet elke oomblik van jou stompneus hengelervaring, en as jy ’n vissie of twee vir die pan vat, doen dit oordeelkundig.