fbpx
AaskliniekBank AnglerHow To

Maak Maklik Jou Eie Deeg Boilies

Deegboilies is ‘n sagte haakbare boilie wat geskik is vir gebruik tydens enige konvensionele oewerhengel sessie. Match hengelaars kan dit ook met goeie resultate gebruik. Die deegboilie is ‘n uitstekende aas wanneer daar tempo gehengel word aangesien dit maklik aan die hoek gehaak kan word. Die deegboilie kan alleen of saam met enige ander hoekaas gebruik word: van wurms tot deeg en selfs floaties. ‘n Ander voordeel van ‘n deegboilie is dat verskillende geure en of kleure gemaak kan word om by die spesifieke sessie aan te pas. Die deegboilie is ‘n bodemaas wat glad en glibberig in die water raak en dus maklik deur die vis ingesuig kan word. Kom ons kyk hoe deegboilies gemaak word:

STAP 1:
Maak ‘n gegeurde of gekleurde deeg soos normaalweg deur koekmeel in water wat met ‘n konsentraat (dip) gegeur is, in te roer totdat dit styf genoeg is om met die hande hanteer te word.

STAP 2:
Rol nou ‘n lang wurm van ‘n gedeelte van die deeg. Die wurm moet ongeveer 5mm in deursnee wees. Hoe dikker die wurm hoe groter gaan die deegboilies wees.
STAP 3:
Met die stomp kant van ‘n mes, sny nou die wurm in gelyke dele sodat die deegboilies almal min of meer ewe groot sal wees.
STAP 4:
Elke segment word nou tussen die handpalm en wysvinger tot ‘n klein balletjie gerol.

STAP 5:
Kook water in ‘n pot op die stoof. Wanneer die water kookpunt bereik, word die deegboilies in die kookwater gegooi. Die deegboilies sal aanvanklik sink. Kook die deegboilies vir ongeveer 10sekondes totdat almal dryf.

STAP 6:
Skep die deegboilies nou met ‘n lepel af…
STAP 7:
… en lê dit op ‘n handdoek neer om droog te word.

STAP 8:
Na sowat 30 minute as die deegboilies droog is skep dit in ‘n bakkie en voeg ‘n bietjie vla poeier by. Rol die deegboilies in die vla sodat dit nie aan mekaar vas klou nie.

STAP 9:
Bêre die deegboilies in ‘n botteltjie met ‘n skroefprop sodat dit nie uitdroog nie.
STAP 10:
So lyk die deegboilie op die hoek.
Tags
Close