Maandavonture – Die heel eerste For Anglers lededag!

Dennekruin hengeloord by Roodekoppies is ’n baie spesiale plek met groot karpe wat daar rondswem. Die oord is veilig en met die Krokodilrivier wat daar inkom is daar hope natuurlike kos wat die vis daar hou. Ons het ’n geleentheid gehad om ’n paar dik karpe te gaan vang. Ons digitale platform, www.foranglers.co.za wat al die inhoud bevat waaraan jy kan dink vir al vier ons tydskrifte, (Die Oewerhengelaar, Stywe Lyne, Carp Angler en Baarshengelaar) het afgeskop in Februarie. Daar is nou maandeliks ’n lededag op ’n Vrydag waar ons lede ’n heerlike dag saam met ons en ’n paar kundiges in die industrie kan geniet. Om die dag optimaal te benut, het ons vroeër tyd spandeer om die area te verken om te bepaal in watter areas die vis wei, en voer in te plaas om hulle daar te kry. Schalk van Breda het vir ons ’n mooi voermengsel bymekaargesit wat bestaan het uit gekookte kaboemmielies, gekapte tigers en ’n paar ander sade. Die Fusion 19 van Stywe Lyne met gevorderde sonar en navigasie het baie gehelp om die water voor ons te profileer en presies te sien waar die vis hulle bevind. Ons het ook die boot gebruik om weer die areas wat Super Cast se manne die Dinsdag gevoer het op te top. Daar was baie vis in die rivierloop, maar ons het die helling (oranje - sien kaart onder) geteiken. Met behulp van ons sustertydskrif Stywe Lyne se Fusion 19 boot, met ’n Humminbird Solix 10 toegerus, kon ons die water baie effektief verken. Heelwat vis is opgespoor wat in die dieper water was, en ook groter vis wat in die vlakker areas inkom, wei en weer skuif. Die vis was tipies in 4 tot 6 meter water en veral teen die hellings waar hulle lekker in die modder rondgekrap het. Dit was baie duidelik te sien aan al die borrels wat op sekere areas vanuit die donker waters opgekom het. Volgens die Solix was die bodem redelik hard en het meeste vis in die onderste 2 meter beweeg. Die water temperatuur het verander van 19.3 grade in die oggend tot 20.1 in die middag. ’n Paar plekke is geïdentifiseer en gevoer en vroegoggend op die Donderdag was ons oppad en het ons net alles bevestig en so bietjie voer top-up gedoen, sommer so paar hande vol van die boot af. Vir die top-up het Schalk vir ons gebreekte mielies gekook, wat ons saam met gewone Super Cast voer en gekapte tigernuts gemeng het. Hierby is ’n botteltjie sweetcorn gevoeg en sagte bolle gemaak wat ons van die boot af ingegooi het. Teen die middag se kant was al die werk afgehandel en was daar tyd om ook ’n paar lyne in te gooi. Alhoewel ek my karp spesiehengelgerei daar gehad het, het ek besluit om ook bietjie feederhengel toe te pas en daarmee saam ook ’n stel nuwe stokke en ’n alternatiewe metode op die proef te stel. Voor die pen waar ons die tent opgeslaan het, is daar ’n pragtige rots waarop ek die seatbox gemaklik kon plaas en dit sommer as ’n verhoogde gooiplatform kon gebruik. Ek gaan sit en gooi so 10 cages op dieselfde afstand, (85 meter), maar van links na regs gesprei oor so 5-6m. Die twee splinternuwe 14 swaardiens feederstokke is ideaal om die aas daar diep in te slinger, hetsy ’n cage feeder of method feeder. ’n 40g feeder is ideaal en sonder te veel wind trek dit lekker reguit en tref die kol mooi. Saam met die voer is die gooigewig seker so 80-100g, en skaflik binne die stok se vermoë van 50-180g. ’n Natuurlike platform wat die natuur vir my daar neergesit het, reg voor ons tent. Die water reg voor my is lekker diep en die vis kan maklik van hier af geskep word. Ek reken in die somer sal dit ’n lekker plek wees om die kurpers vanaf te teiken. Op wêreldvlak is daar baie interessante verwikkelinge en FIPS, die wêreld beheerliggaam van kompeterendehengel, is besig om ’n nuwe faset te ondersoek wat Freestyle Feeder Fishing gaan heet. In kort beteken dit dat ’n method feeder gebruik kan word en ook nie noodwendig natuurlike aas en ’n lang hoeklyn nie. Na my mening is dit seker die naaste aan ons gewone papgooi as wat dit kan wees. Dit laat ook toe dat jy ’n klein haarstrop (of selfs groter een) kan hengel, wat in teorie groter vis kan teiken. Nou dit is presies waaroor ek wonder en het besluit om dit uit te toets. Die normale manier van feederhengel met die cage en lang hoeklyn was heel effektief en het heelwat vis gelewer in die 4-6kg klas. Die method feeder word gelaai met ’n klein 6 of 8mm mango en piesang boilie met ’n paar spuite bloekomolie en die ander een met ’n enkel pit wat so paar minute in sweetcorn gelê is, dieselfde Super Cast wat ons in die voer gegooi het. Nadat ek die twee stokke gegooi het en sommer so wydsbeen op die seatbox se staanders geplaas het, is ek maar doenig om die res van die kamp agtermekaar te kry. Sonder te veel verwagting loer ek so nou en dan na die stokke en maak seker dat die los hiasinte wat so ronddryf nie aan die lyne gaan haak nie. Die stokke se punte is mooi onder die water in, sodat die meeste hiasinte oordryf. Ek is nog besig om die een stok se lyn so effens te verstel of die ander katrol skree lekker. Ek het wel die lyn ingeknip, maar het so 6 meter oor op die katrol om die vis te draai - altans so het ek gedink. Voordat ek die stok behoorlik in die hand het is die lyn teen die katrolknip en al die rek binne sekondes uitgetrek; ek spook om die lyn uit te knip en beland amper in die water. ’n Klein hoekie met ’n haarstrop en ’n boilie pennetjie. Die piesang en mango gegeurde boilie wat deur Feedertech ingevoer word kom in 6, 8 of 10mm grootte. Hierdie #10 hoekie het uitstekend gehaak en elke byt was aan, maar die 0.20mm hoeklyne het nie gehou nie. Dit het wel een karp van 9,62kg geland. Die aas word mooi binne die voerbal weggesteek. Met hierdie method feeder en giet vorm, is die kombinasie perfek gebalanseer en trek soos ’n koeël deur die lug. Wanneer dit die water tref, sak dit met die gewig na onder en die aas lê perfek na bo geposisioneer. Die poging was onsuksesvol en die hoeklyn is morsaf. Heel verslae doen ek herstelwerk en gooi weer. Skaars het ek die stok neergesit of die ander stok se katrol skree - voor ek dit optel is die lyn afgeloop teen die haak. Nou ja, duur les - ek merk my lyn met ’n waspen en haal die lyn uit die katrolknip. Ek gooi weer en is nog besig om die lyn styf te maak toe ek die buig van die stok uit die hoek van my oog waarneem. Hierdie keer is ek gereed en maak vas. Die vis swem seker so 30 meter of meer voor ek dit vir die eerste keer kon draai. Dis die stok met die method feeder en boilie. Na sowat 10 minute se baklei is die vis so 50 meter van die kant af en breek sy kop water. Die ander stok se punt buig en die katrol skree nou lekker. Ek probeer vir ’n wyle albei stokke hanteer, maar dit werk nie. Ek wonder nou waarom die ander twee manne so lank wegbly met die boot - "Alweer opsoek na swartbaars..." dink ek so by myself. Te veel visse en te min hande en die ander vis hardloop in ’n haakplek in. Nadat ’n paar visse vaarwel toegewens is met die ligter gerei, het ek die hoeklyn swaarder gemaak en ’n groter hoek gebruik. Die boilie is ook opgegradeer, en elke vis is geland. Die stokke is werklik gerat om groot vis te speel en hanteer dit baie goed. Die vis is lekker lewendig hier naby die kant, maar ek kry dit geland met ’n skepnet wat eintlik te klein is vir die doel. Die karp is ’n bielie van oor die 9,5kg en word veilig in die lang hounet geplaas. Ek kan nie self ’n foto neem nie, en moet maar wag dat die manne terugkom. In die volgende uur en ’n half vang ek nog vier of vyf mooi visse so op my eie en verloor nog twee wanneer die vis gelyk byt. Net terwyl ek besig is om nog ’n vis te baklei wat iewers aan ’n merker en ander lyn vashaak, kom kollegas Duncan Murfin en Tobias Weber oor die water aan. Ek beduie wat die probleem is en hulle gaan help gou. Die lyne word vinnig losgemaak, en die vis geland. In ’n kwessie van drie ure word ’n paar mooi karpe geland, waarvan ’n paar meer as 9,5kg geweeg het. Terwyl die ander twee manne elkeen besig is om ’n karp te speel, vat ek die baarsstok van die boot af en maak ’n gooi of twee na die klipeiland aan die linkerkant. ’n Mooi baars speel saam en slaan die jerkbait hard. Een van die mooiste gesigte in hengel is as daardie karp so stadig wegswem en in die diep waters wegsak. Die laaste blik wat jy sien is so vinnige versnelling asof dit nou sy lyf net so skud en vir jou wys dit het nog woema. Skaars was hulle aan wal of die volgende stok staan sekel. Nou is dit hulle beurt en elkeen staan en baklei ’n vis. Duncan land ’n pragkarp van 9,76kg en Tobias se vis vat hom egter vir ’n stappie deur die rivierloop en hy swem ook in ’n haakplek vas. Ons spring vinnig op die boot om te kyk of ons dit kan beredder, maar die vis is voort. Terug op die kant word al die gebroke stroppe herstel en weer gegooi. Tobias land ook ’n bielie en ek vang nog ’n paar jonger vis van so 5-6kg. Diè twee manne, wat eintlik baarshengelaars is, land so elkeen ’n PB en by verre die grootste karp van hulle hengelloopbane. Volgens tradisie staan albei van hulle heel braaf vir die "damwaterdoop". Duncan Murfin, erkende baarshengelaar en dryfveer van die For Anglers platform is welbekend aan groot groen visse vang, maar so ’n dik karp het hy nog nie geland nie. Hierdie bul is ook die grootste van die dag en trek die skaal tot net duskant die 10kg. Ter nabetragting kyk ek na wat waar gevang is, aangesien die stokke so omgeruil is in die proses dat dit omtrent elke keer op ’n ander plek gegooi is. Daar is net een ding wat konstant gebly het, en dit is dat die method feeder met die klein boilies telkemale die groter vis gelewer het. Die kleinste een was bykans 8kg en die grootste 9,8kg, waar die cage feeder en enkelpit meer vis gelewer het, maar waarvan die grootste 6,5 kg was. Verder was dit beduidend dat die vis konstant op sowat 15-20 meter agter die voer gevang is, waar die water so 1,5m meter dieper is, so al asof hulle in en uit beweeg na die voer toe en oppad heel aggresief wei. Beide Duncan en Tobias het hulle PB doop soos manne gevat! Hierdie doelgemaakte stokke van Feedertech, wat deur wêreldbekende Hongaarse hengelaar Gabor Döme ontwikkel is, kan die method feeder gemaklik op 100-120m neersit en hanteer die groot vis uitstekend. Die son begin sak toe Tobias sy laaste vis vang en ons raak rustig om die kampvuur en braai ’n vleisie terwyl ons die middag se chaos herleef en in detail bespreek. Ons is heel opgewonde oor wat die volgende dag gaan inhou as die regte karphengelaars, by name Gilbert Foxcroft en Schalk van Breda hulle opwagting maak om ons ForAnglers.co.za lede te wys hoe dinge gedoen word. Ons buurman, JR Smith, een van ons For Anglers lede, het vroeg die Vrydagoggend al onder die mooi karpe ingeklim. Gys Pitzer Motoring, ons Wielevennote se manne is ook natuurlik daar en geniet die dag saam met ons. Pieter Bouwer, Wouter Richards en Hannes Gouws is bedrewe hengelaars en verstaan groot karphengel. Hulle spesialiseer in die aasboot-ding en is nie bang om die lyne op al die verskillende plekke te gaan neersit nie. Hulle maak ook so nou en dan ’n foutjie en dan moet die lyne maar versigtig uit die proppe losgemaak word. Hulle land mooi karpe, onder andere Hannes se 12kg vis. Ons kuier lekker saam met die For Anglers lede en worsbroodjies is ’n welkome toevoeging. Pieter Bouwer, die bestuurder by die Linbropark tak van Gys Pitzer Motoring, vat sy prys soos ’n man vir die kleinste vis vir die dag. So breek die volgende dag aan en na lekker koffie en beskuit waar almal ontmoet is, word alles opgestel en almal het die geleentheid om te sien hoe gaan die groot manne te werk om die vis aan te keer. Wat my beïndruk het, is die eenvoud waarmee die manne die taak aangepak het. ’n Geskiedkundige dag waar die bittereinders elke bietjie kennis uit ons gashengelaars getap het. Gilbert standardiseer op ’n baie eenvoudige D-rig met ’n enkel tigernut, ’n paar houersvol gesoute partikels en ’n weggooisinker om dit veiliger te maak vir die vis. (Lees presies hoe hy dit gedoen het in die nuutste uitgawe van The Carp Angler.- Red). Schalk aan die anderkant maak ’n lang Vaaldamstrop met hoeklyne wat gly as daar ’n groot vis aan is, laai ’n klein voerbol met floaties en degies en werp dit ook so 20 meter agter die voerlyn. (Lees die storie elders in hierdie uitgawe.- Red). Op albei metodes, heel verskillend, vang hulle mooi vis - die ooreenkoms? "Eenvoud en fokus!" Die laaste sarsie vis vir die dag, sommer almal tegelyk en vier karpe weeg saam meer as 35kg. Hier is Schalk van Breda, Marius van Eeden, Gilbert Foxcroft en Wouter Richards.