Marulani, Loskopdam Se Rooineus-Muddies

Marulanikloof Gasteplaas se water by Loskopdam vorm deel van die inloop aan die oostekant van die dam. Ek maak reg vir ‘n dag se lekker hengel en hoop om weer sakke vol van die Rooineus “V6’s” met die olyfgroen rûe aan te keer. Vind hier uit: Hoe belangrik die regte tipe bodem is om Rooineus-muddies te vang.Watter waarde wit mielierys t.o.v. Muddiehengel het.Hoe jy jou dipplan kan vereenvoudig.Hoe om jou voer op die voerkol agter te los. Oord inligting Naam: Marulanikloof Gasteplaas, Loskopdam.Ligging: Oostelike deel van Loskopdam. Hoe om daar te kom: Vanaf Middelburg neem die R34 in die rigting van Groblersdal. Na ongeveer 45km draai links af by die Marulani bordjie. Ry deur die eerste hek. Die huisvesting is na 400m aan die linkerkant van die pad en die hek is aan die regterkant. Lengte van oewer: Ongeveer 400m.Grondoppervlak: Gras of harde klipperige grond tot teen die water.Waterkleur: Skoon met ‘n effense groen ondertoon.Waterdiepte: Ongeveer 2m diep op 40m vanaf die oewer waar ons gehengel het.Obstruksies: Geen bekend. Besprekings: Helgaardt of Leticia by 073 7348508 of 013 2628110. Die Teikenarea Rooineus-muddies is mal daaroor om op die klippe onder die water te wei. Hier vreet hulle graag prooi soos slakke wat op die klippe vassit. In teenstelling met die Vaalrivier-muddies hou die Rooineuse nie noodwendig van modderige bodems nie, maar eerder klipperige of gruis bodems. Hierdie areas kan maklik geïdentifiseer word deur ‘n P2 of P3 grootte gewig stadig oor die bodem te sleep. ‘n Stamperige aksie wat op die punt van die stok registreer, is ‘n aanduiding van só ‘n tipe bodem. Die gewig kan ook geïnspekteer word vir fyn krap en stamp merkies deur die klippe – hierdie is die perfekte hengelarea om Rooineuse te jag. Soms verkies hierdie V8’s water van 2 meter diep, ander kere water van 4 meter en soms ook diep water van tot 7 meter. Probeer dus altyd aanvanklik op twee afstande hengel om die beste afstand vir die dag te bepaal. Maaiers! Ek bring toe ‘n houertjie maaiers saam vandag om te probeer en sonder verbasing tel die Rooineuse sommer onmiddelik hierdie aas op. Omdat dit ‘n natuurlike aas is, assosieer die vis onmiddelik daarmee en besef dat dit ‘n voedselbron van goeie gehalte is. ‘n Groterige hoekaas van drie tot vier maaiers, almal deur die stomp kant van die larwe gehaak, is 100% in die kol. Dit bied ‘n visuele groot en bewegende hoekaas wat die vis net nie kan weerstaan nie. Die paar karpies wat op en om die voerkol bedrywig was het ook hul belangstelling duidelik getoon in die wit larwes deur die aas in sommige gevalle so vinnig op te tel dat ek nog nie eers behoorlik die poeliesman kon aansit nie.Verseker gaan hierdie aas volgende keer weer saam Loskop toe… Wit is warm Ervaring het my geleer dat Muddies oor die algemeen van ‘n wit aas hou. Hieronder tel ase soos deeg, voer en floaties om ‘n paar te noem. Wit ase staan gewoonlik baie goed uit teen die donker bodem van die dam of rivier en daarom is jy gewoonlik verseker dat die vis twee keer sal kyk na ‘n wit aas. Wat jy tot jou voordeel kan gebruik in hierdie geval is wit mielierys. Week dit die aand voor die sessie in water en gebruik dit in jou grondvoer wanneer jy van die oewer af hengel. Vir die manne en dames wat van ‘n boot af hengel, kan die mielierys maklik oor die voerarea gestrooi word. Omdat die mielierys rou en hard is sal die Muddies dit voortdurend optel en uitspoeg terwyl hulle op die voerarea wei wat beteken dat hulle langer geïnteresseerd bly met ‘n groter kans dat jy meer vis sal kan vang. Dis ‘n goeie wenk in meeste Muddie-waters! Vereenvoudig jou dipplan Hoe meer ek hengel hoe meer besef ek die waarde van eenvoud in hierdie sport. Hoe eenvoudiger, hoe beter! Wanneer ek hierdie feit deurtrek na dips in my kas is dit ook nie anders nie. Vandag het ek nooit ‘n kombinasie van geure gebruik nie – nee, slegs een dip op die bol per keer. Vandag het ek my geurplan gewissel tussen 3 verskillende konsentrate nl.die sterk rooi heuning, die geel ‘passion fruit’ sproei en die rooi arbei molasses wat 99% van die tyd ‘n Muddie-wenner is. Ek gebruik die dip of aassproei slegs om die vis se nuuskierigheid te prikkel om sodoende hulle te laat kom ondersoek instel. Akkurate en gereelde voer komplimenteer hierdie dipplan uitsonderlik. Los jou grondvoer op die kol Dis só belangrik om jou voer op die hengelarea te los dat dit amper nie genoeg beklemtoon kan word nie. Dit is juis die doel van grondvoer: om soos ‘n mat op die bodem neergelê te word sodat dit die vis kan hou. Jou voer kan oor een van twee teksture beskik om seker te wees dat dit op die kol agterbly. Eerstens kan dit effens droog voorberei word sodat dit maklik en vinnig sal blus. Tweedens kan dit natter voorberei word en elke bolletjie gebrei word alvorens dit op die gewig gevorm word. ‘n Sagter voerbolletjie sal maklik van die gewig afgeruk word wanneer daar gekap word met die wenslike uitwerking. Daar is steeds te veel hengelaars wat nie hul grondvoer reg voorberei nie - die grootste probleem wat ek raakloop is dat daar nie genoeg water by die voer gevoeg word nie. Maar wees versigtig en voeg net klein hoeveelhede water by in die voorbereidingsproses sodat jy nie per ongeluk te veel op een slag byvoeg nie. Die Sessie Dit het nie lank geneem vir die eerste vis om hoek te vat nie, maar die Rooineuse het aanvanklik weggebly by my adres en my vierde vis was eers ‘n V6, voorafgegaan deur klein karpies wat ook oor ‘n baie goeie veglus beskik. As ek nou terugdink aan hoe die sessie verloop het, besef ek dat die Rooineuse eintlik baie lank geneem het voor hulle uiteindelik op my voerkol gemaklik begin raak het. Maar toe hulle eers daar is, het ek hulle feitlik die een na die ander begin vang. Miljoene der miljoene klein Rooiborskurpers patrolleer die voet-diepte water teen die oewer. ‘n Enkel maaier op die hoek het wondere verrig. Die grootste V6 vir die sessie het ongeveer 1,2kg geweeg.