Modder Maak Dit Moeiliker

Vroeër vanjaar is die verhaal geplaas oor hoe ons die grotes al ploegende deur Tzaneendam se modder laat les opsê het. Modder kan beslis vet pret wees, maar dit kan ook dinge moeilik maak vir die hengelaar wat nie weet hoe om sy/haar hengelgerei en –tegnieke by sulke omstandighede aan te pas nie. Dit is darem maar lekker wanneer 'n groot vis die aas vat... So moes die Super MacPac-span verlede jaar by Helderstroom Gevangenis in die Wes-Kaap met skok ontdek dat ons ‘Gauteng-stroppe’ en sinkers nie reg was vir die modderbodem van die betrokke dam waar ons saam met ons Kaapse vriende gehengel het nie. Eers nadat ons van hul stroppe met langer hoeklyne en piepklein sinkers begin gebruik het, kon ons die Super MacPac-dips en floaties tot hul reg laat kom deur heelwat vis te trek. Die les wat ons by Helderstroom geleer het, sou amper ’n jaar later en meer as ’n duisend kilometer verder weer handig te pas kom, en wel by Aston Lake naby Springs in Gauteng. Na ons eerste besoek aan Aston Lake ongeveer twee maande gelede het ons die dam nog drie keer besoek. Aston Lake is ’n hengelaar se droom! Die uitgestrekte oewer bied hengel- en kampplek vir baie hengelaars en word pragtig deur die bestuur skoon gehou. Daar is soewel ablusiegeriewe as ’n klein winkel waar koeldrank, versnapperinge en noodsaaklikhede vir die hengelaar aangehou word. Daarbenewens het die dam nie slyk, hiasinte en vashaakplek nie en is die vis normaalweg nie huiwerig om te byt nie. Dit is dus nie verbasend dat die oewer toenemend vir hengelkompetities bespreek word nie. Gevolglik is dit wys om liewer op ’n weeksdag by Aston Lake te gaan lyne natmaak, of vooraf uit te vind of daar oor die naweek ’n kompetisie beplan word. Tydens ons eerste twee besoeke aan Aston Lake het ons meer na regs gehengel en goed gevaar met die nou reeds bekende Super MacPac-kombinasies: Dippies 1 (Banana), 2 (Berry Mix) en 3 (Pineapple Fluoro) saam met ’n Banlic-floatie aan die hoek; Dippies 4 (Fruit Mix), 5 (Honey Fluoro) en 6 (Sweetcorn) saam met ’n Honey floatie aan die hoek; Dippies 1 (Banana), 3 (Pineapple Fluoro) en 7 (Caller) of selfs 3 (Pineapple Fluoro), 5 (Honey Fluoro) en 7 (Caller) saam met óf ’n Banlic- óf ’n Garlic-floatie aan die hoek. Soos altyd maak spanwerk die dag spesiaal. Gedurende hierdie twee besoeke het ons oudergewoonte met slegs een hoek onder die voerbal gehengel en wel op ’n gooiafstand wat tussen 80 meter en 130 meter gewissel het. Naas ’n paar groot babers wat lustig aan ons karpaas gesmul het, was die karps wat uitgekom het nie baie groot nie, maar het ons lekker besig gehou sodat ons elke keer met ’n gevoel van tevredenheid huiswaarts kon keer. Gerugte wou dit hê dat die dam meer, en ook groter, vis na links naby die riete oplewer. Aston Lake se meerderheid karpe is klein maar lekker woelig. So slaan ons toe ons stokke tydens ons derde besoek naby die riete op. Die water was dié dag baie troebel en ons standaard aaskombinasies wou nie werk nie. Maar daar is gelukkig baie uitstekende dips en floaties in die Super MacPac-reeks en dus ’n antwoord vir enige uitdaging wat die hengelaar in die gesig mag staar. Toe ons die amandel en knoffel kombinasie op die voerbal spuit en dit met ’n skoon geel of wit floatie met ’n backing instuur, het die dinge begin gebeur. Vir backing het ons óf ’n wit degie (gemaak met koekmeelblom, damwater, knoffeldip en duiwelsdrek), óf ’n bruin degie (gemaak van bruinbrood, karamel en baie fluoresien) gebruik. Ander treffervariasies was Yellow Motivator saam met ’n strepie pynapple Fluoro) of botter-vanielje en karamel. Opvallend genoeg het al die vis dié dag aan skoon floaties met ’n bruinbrood- of wit degie gebyt. Wat egter nog meer interessant was, was dat dit slegs die twee stokke met twee hoek-stroppe was wat gehardloop het. By nadere ondersoek het ons ook opgemerk dat die visse deurgaans die boonste hoek gevat het. Behalwe dat die water sigbaar troebel was, het ons telkens wanneer ons ’n stok opgetrek het om vars aas op te sit, ervaar dat dit moeilik was om op te katrol soos wat die sinker waarskynlik in die modder op die bodem gesleep het. Dit het ons laat besluit om die een hoek-stroppe op die oorblywende stokke te vervang met twee hoek-stroppe, veral aangesien daar nie vashaakplek in die dam is nie. Nie lank nie of hierdie stokke het ook begin vis lewer. VLNR: Enkelhoek Rietvleistrop, Dubbelhoek Rietvleistrop met verskillende gewigte asook 'n gly-boerstrop met 2 hoeke vir gebruik in modder. ’n Week later was ons die Saterdag weer terug, toegerus met sowel twee-hoek ‘link’-stroppe met ‘mushroom’-sinkers as ’n Boerstrop wat ons wou uitprobeer vir modder toestande. Laasgenoemde is toegerus met twee hoeke bo die voerbal wat verseker dat die aas nie onder in die modder lê nie. Ongelukkig kon ons nie dié dag op ons vorige plek naby die riete plek kry nie, aangesien daar ’n groot hengelkompetisie aan die gang was (meer hieroor in die volgende uitgawe). Die organiseerders het wel vir ons ’n gaatjie meer na regs aangebied waar ons toe ons eksperiment kon voortsit. Hoewel ons vermoed dat daar meer modder op die dam se bodem na links is, was die water met die dag van die kompetisie ook na regs baie troebel en het ons dus weereens vir ’n modderbodem gereed gemaak. Ons het drie van ons vier stokke met ons twee-hoek ‘link’-stroppe gelaai en die vierde stok met die Boerstrop. Ten spyte van erge kompetisiedruk op die oewer wat normaalweg veroorsaak dat vis slegter byt, die feit dat ons dié oggend laat by die dam aangekom het en eers 10:00 ons stokke kon ingooi, en dat ons tussendeur besig was om fotos en video van die kompetisieverrigtinge te neem, het ons binne ’n paar uur vyf visse gevang en het al die stokke − en dus albei die stroppe wat ons getoets het − goed gewerk. Amandel/knoffel mengsel op die voerbal met 'n skoon geel floatie en fluorescein kappie as hoekaas. Om af te sluit − wees bedag op die geaardheid van die bodem waar jy hengel. Indien die water modderig vertoon en/of jy voel asof die sinker deur modder sleep wanneer jy inkatrol, vermy liewer die gebruik van ’n strop met net een hoek onder die voerbal. Hoewel hierdie strop in baie ander omstandighede uitstekend werk (veral waar daar vashaakplek is), bestaan die gevaar met ’n modderbodem dat die voerbal (met die aas onder die voerbal) in die modder kan gaan lê en die vis dus nie by die aas kan uitkom nie. Skakel in so ’n geval oor na ’n twee-hoek-strop (een hoek onder en die ander een bokant die voerbal) sodat die boonste hoek weg van die modder vry in die water kan hang waar die vis dit kan optel. Dieselfde logika geld vir die Boerstrop met albei hoeke bo die voerbal. Vir selfs groter positiewe effek stel ons voor dat jy ook onmiddellik jou ‘link stroppie’ van ’n kleiner ‘mushroom’-sinker voorsien wat ligter is en dus ’n kleiner kans staan om in die modder weg te sak. Babers byt graag aan Macpac se floaties by Aston Lake. Lekker hengel en moenie dat modder julle volgende keer ore aansit nie!