Moddervishengel My Manier -2

DEEL 2: WATSE GEREI? Kliek op die link as jy deel 1 gemis het. In hierdie uitgawe konsentreer ek hoofsaaklik op die gerei vir moddervis. Wanneer spesifiek vir moddervis geteiken word, kom die spesie meer tot sy reg indien dit met die regte gerei gehengel word. Wat ek daarmee bedoel is dat jy nie met te swaar gerei moet hengel nie, anders is die aanslaan van die vis nie so vinnig en akkuraat nie. Die krag van die muddy word dan ook nie waardeer nie. Ek glo dat die tipe stok wat gebruik word baie belangrik is. Ek hengel met ‘n 8 vt. stok wat nie te styf is nie. Die stok moet ‘n relatiewe slap punt hê maar geleidelik stywer wees vanaf die middel van die stok tot by die katrol. Omdat muddies gewoonlik nie baie diep gehengel word nie en akkuraat hengel op ‘n kol baie belangrik is, is die bogenoemde stok ideal. Dit kan ‘n grafiet of glasvesel stok wees en ‘n een of tweestuk stok. Ek het onlangs vir my twee 8-voet grafiet stokke aangeskaf en geniet die stokke baie. Indien die vis diep gehengel moet word, kan die stok aangepas word na ‘n 10 of 12-voet stok. In riviere sal ek selfs met ‘n 6 –voet stok hengel. Onthou net, hoe ligter die gerei, hoe lekkerder die baklei! Die katrol moet ook in verhouding met die stok wees. Koffiemeulkatrolle is hier aan die orde van die dag. Dit kan vinnig hanteer word en met die “clip” op die spoel is dit geskik om op ‘n sekere distansie (indien in ge-“clip”) akkuraat elke keer op dieselfde afstand te hengel. Dit op sigself is al klaar baie belangrik. Die katrolle kan dan ook reeds voor die tyd op ‘n gegewe afstand in ge-“clip” word. Soos reeds genoem in Deel 1, in ag genome dat ek die dam en/of rivier ken, ongeveer tussen 40 en 50 meter in”clip”. Saam met die 8-voet stok sal ek ‘n “baitrunner”-tipe koffiemeule (dis nou die katrolle met ‘n voor en agter briek) aanbeveel. Maak seker dat die katrolle by aankoop ekstra spaar spoele het, want dit kom altyd handig te pas veral wanneer vooraf op ‘n sekere afstand in ge”clip” word, of wanneer daar baie lyne afgebreek word met haakplekke, is die spaar spoele handig. Die idee van die ligte stok en katrol is omdat die muddy skelm byt en daar vinnig gereageer moet word die stok sommer met een hand aangeslaan kan word. LYN ‘n Sagte, soepel 5-pond lyn is ideaal omdat baie van die lyn op ‘n spoel gerol kan word. Die dun lyn vergemaklik ook die werp en sak vinniger in die water as dikker lyn. Dan is daar ook nie onnodige “slack” (boog) in die lyn nie. VOORSLAG Sekere tye moet met ‘n groot voerbal gehengel word of groot balle wanneer gevoer word, en daarvoor is die voorslag nodig. Ek verkies om met ‘n helder oranje of groen voorslag te hengel omdat jy kan sien waar die vis swem en dit die skep van die vis vergemaklik, ook wanneer iemand anders vir jou moet skep. Glo my, die helder kleur van die voorslag skrik NIE die vis af nie. Ek sal dit egter nie op die strop gebruik nie. Hier kan die sterkte van die voorslag 12 of 15-pond wees. STROP ‘n Baie belangrike aspek is die strop. Ek maak twee stroppe, naamlik die Rietvlei en ‘n kort Vaaldam muddy strop. Vir muddies verkies ek egter ‘n Vaaldamstrop. As die vis skelm byt met rukke en stote, slaan die Vaaldamstrop die vis makliker raak as ‘n Rietvlei strop. Let ook op die klein hoeke op die skets. LET WEL - Die boonste hoek van die Rietvleistrop gly nie en is naby die voerbal met ‘n kort hoeklyn. Daar kan ge-eksperimenteer word met die grootte van die sinker. Maak seker die sinker kan maklik vervang word met ‘n ander deur van die inskroef-tipe gebruik te maak. Die staander vir die stokke, voeremmers ensovoorts, gaan verskil van persoon tot persoon volgens hul persoonlike voorkeure, solank die twee poliesmanne (verklikkers) ten alle tye van agter die stokke gesien kan word. Hier verkies ek my hengelkas langs my op ‘n tafeltjie en nie tussen die stokke nie. Agter my staander is ‘n klein werksoppervlakte waar ek kan werk en die poliesmanne terselfdertyd kan dophou. Daar is ook spasie vir spaar stroppe wat klaar gelaai word indien die vis vinnig byt. Kortom, vir moddervis moet alles kompak wees, maklik verkrygbaar en hanteerbaar wees. Jy moet ook gemaklik wees agter jou stokke sonder om oor iets te val as jy vinnig moet beweeg. ‘n Moddervis byt baie keer net vinnig en dan is hy klaar, so wees gereed daarvoor! Vir interessantheid, in my vorige aflewering het ek genoem dat tydens ‘n kompetisie muddies vir jou ekstra punte kan beteken en deurslaggewend wees. Tydens ‘n besoek aan Bloemhof het ek as ‘n gas saam met die Bloemhof Hengelklub by Bloemhofdam aan ‘n kompetisie wat strek oor 8 ure deelgeneem. Ek het 91 vis ingeweeg, waarvan ongeveer 30 muddies was. Laatmiddag het ek die muddies in die vlak water sien speel en hulle geteiken. As dit nie daarvoor was nie, sou ek heelwat minder vis in die net gehad het.