My Pad na Sukses – Voorbereiding

Met die nuwe hengelseisoen nou in volle swang is elke maand vol hengelaktiwiteite. Soos met enige ding in die lewe is daar altyd “onplesier met die plesier”. In my geval is dit voorbereiding. Dit is altyd lekker om te gaan hengel maar moet dit nie waag om onvoorbereid by die hengelwater op te daag nie. Maar daar is tog ‘n bietjie lekker wat daarmee saam kom en dit is die feit dat jy weet jy gaan binnekort ‘n lyntjie natmaak! Stroppe is seker een van die belangrikste wapens in jou arsenaal. Want hoe gaan jy tog daardie pragvis land sonder ‘n strop? Daar is verskeie stroppe om van te kies en te keur maar ek maak meestal gebruik van die alombekende Gly-Rietvleistrop. Stroppe bind is een van die goed wat ek die minste van hou om te doen maar ongelukkig is dit ‘n moet. Wat my Gly-Rietveistrop bietjie anders maak van die normale, is dat ek ‘n baie klein gewiglose aasveer (“spring”) bo op my “link” pypie sit. Die rede daarvoor is, is dat ek baie sagter en groter voerballe op my sinker kan sit. Die link pypie maak dit ook vir my moontlik om verskillende gewigte sonder moeite te kan verander. Die pypie help ook om vinnig die gewig te verander indien jy dieper moet hengel of as die wind op kom sonder om ‘n nuwe strop uit te haal. Hierdie “link en spring” Gly-Rietvleistrop is ook baie maklik om te verpak in ‘n bank sakkie wat beteken dat ek meer stroppe in my houertjie kan sit want daar is nie ‘n gewig by wat saam verpak moet word nie. Dit is hoe my "Link en Spring" strop lyk. Ek maak gebruik van 'n baie klein spring wat ek bo-op die link plaas. Dit vergemaklik die opsit van 'n sagte voerbal wat vir my meer visse lok en vang. Die voerbal val dan nie maklik af nie maar ek kan steeds die gewig van my strop verander. My gewigte hou ek in ‘n aparte houer wat agter in my voertuig bly en ek haal net uit soos wat nodig is. Die “link” pypies kom in verskillende kleure wat dit maklik maak om verskillende hoekgroottes aan te dui. Ek gebruik byvoorbeeld ‘n swart pypie vir my nommer 0.8 hoeke, ‘n blou een vir nommer 1 hoeke ensomeer. Wat vir my baie belangrik is, en dit is een van die redes hoekom ek nie baie hou van stroppe bind nie, is dat ek na elke sessie my stroppe in ‘n houer gooi en dan by die huis gaan los knip en oor bind. Ek hengel nie twee sessies met dieselfde strop nie want ek wil nie die kans vat om vis te verloor as gevolg van ‘n strop wat nie die vis kan vashou nie. Een van die ander belangrike aspekte van voorbereiding is om seker te maak jou spoele is ten alle tye vol - lyn het geen “line memory” op nie en dat daar geen knope/koeke in jou lyn is nie. Vir my is dit ook belangrik om my voorslag na elke sessie te vervang, veral as ek die sessie baie vis gevang het, of baie gegooi het of selfs as ek baie obstruksies in die water gehad het. Jou voorslag kan bepaal of jy daardie eerste gooi van jou volgende sessie gaan af gooi of moontlik in die vlak water daardie eerste prag vis verloor weens ‘n swak plek of uitgewerkte voorslag. My hooflyn sal ek tussen elke tweede of derde sessie vervang afhangende wat se werk tempo dit gehanteer het. Ek plaas ook net 200m van my hooflyn op ‘n spoel want sou ek met ‘n spoel op 90m vir drie sessies hengel en dan die lyn moet vervang, verloor ek slegs 110m se lyn as ek dit afhaal, in plaas van 210m as ek 300m opgehad het. Dit help nie jy haal slegs die 90m lyn af waarmee jy gehengel het en sit dan weer net 90m terug nie. Dit sal beteken jy moet die ongebruikte hooflyn las aan die nuwe lyn wat beteken jy sit met ‘n moontlike swak plek op jou lyn sou jy dieper as 90m moet hengel, of as jy ‘n groter vis het wat lyn vat. Ek hengel ook met verskillende kleure lyn om verskillende diktes lyn vir my aan te dui – vir 5-pond sal ek wit lyn gebruik, vir 7-pond geel lyn en dan oranje vir 10-pond lyn. Dit is net makliker sou jy vinnig spoele moet ruil onder veranderde omstandighede. Die dik geel 18lb lyn is my keuse van voorslaglyn, hierdie lyn is baie sterk en help dat ek nie my lyn afgooi of maklik stroppe verloor nie. Verder hou ek daarvan om die verskillende diktes lyn op my spoele d.m.v kleurkodes te onderskei. Bv. die wit lyn sal 5lb wees, Die geel lyn 7lb en oranje vir 10lb. Vir my is dit van kardinale belang om genoeg spoele te hê sodat ek kan aanpas by die omstandighede. My verskillende hoekaas aanbiedings maak dat ek die gepaste stroppe moet bind. Die hoekase en die manier hoe ek dit aanbied kan spesie spesifiek wees en daarvoor is ek altyd voorbereid. Bv. Wanneer ek vir Babers met wurms moet hengel dan sal ek 'n Vaaldamstrop met groter hoeke en sterk lyn gebruik, maar sodra ek weer vir ander visspesies soos karp en moddervis begin hengel moet my hoekase kleiner, sagter en soeter wees en daarvoor het ek die gepaste stroppe wat met kleiner hoeke en dunner lyn toegerus is. Ander voorbereiding wat ek doen is om seker te maak al my goed is reg, in werkende kondisie en skoon. Dit help as jy by die water staan om te weet alles is reg om daardie visse te land. ‘n Ander belangrike ding is om verstandelik voorbereid te wees. Jy moet weet hoe jy jou sessie wil begin deur deeglike huiswerk te doen oor die oord wat jy gaan besoek, en dan vir jou ‘n wedstryd plan uit te werk. Ek het ‘n moto wat lui: “ 'n Boer maak ‘n plan, maar ek het ‘n plan en as my plan nie werk nie, dan maak ek soos die Boer”! Babers en karpe verg elk 'n ander benadering om suksesvol te teiken en daarom sorg ek dat ek altyd voorbereid is. Skrywer met 'n jong karp wat hy tydens 'n kompetisie aangekeer het. Hierdie visse kan vir 'n hengelaar baie punte besorg en moet daarom nie geïgnoreer word.