My Tarpon – Aanhouer Wen!

Die eerste keer wat ek in Angola gaan hengel het was my besoek aan die Kwanza Lodge vir die week van 11 tot 18 November verlede jaar saam met die bekende hengelgids Shawn Mey van Gofish Tours. Ons was vier hengelaars wat die ekskursie onderneem het – twee Suid-Afrikaners, dis nou ek en Carel van Pretoria saam met Hans van Miami en Manfred van Oostenryk, manne met verskillende agtergronde maar met een gemeenskaplike doel, naamlik om hengel en die natuur te geniet. ’n Persoonlike doel vir my was om ’n Tarpon te vang. Die Lodge is geleë op die oewer van die Kwanzarivier naby die riviermond wat maklike toegang tot die see bied. Die teikenspesies vir die week was tarpon en Cubera snapper, maar dis redelik tegnies met beperkte tye om vir dit te hengel so ons het die beste gemaak van elke minuut in die dag en vir verskeie spesies roofvis probeer en heelwat Jack Crevelle ook gevang. Die eerste dag het sommer goed begin met Carel wat ’n Cubera snapper gevang het en daarna het ons vir Jack Crevelle gesoek en in die middag op die see ’n hele paar gevang. Carel Krog en Shawn Mey. Manfred van Oostenryk, Eon en Carel Krog met Jacks. Die snappers word in die riviermond gevang met lewendige aas soos tilapia of harders wat dan op die bodem gesleep word soos die boot saam met die uitgaande gety dryf. Die gety moet mooi dopgehou word want die rivier is vol waterhiasinte wat met die gety saam afkom, dus kan jy net op die laaste uur van die uitgaande gety voor dit begin draai vir die snappers hengel, so dis krities om lewendige aas te hê voor jy vir die snappers gaan hengel. Hans van Miami en Shawn Mey as gids met 'n Cubera snapper. Ons het ook elke dag vir tarpon probeer - dit word rondom die rivier mond area gedoen waar die rivier ver in die see instoot en ’n lyn rondom die riviermond vorm. Op die lyn waar die bruin rivierwater en skoon seewater ontmoet hang die tapon rond en jag dan vir klein aasvis soos harders. Die lewendige aas word met sirkelhoeke gehaak en dan so ’n ent agter die boot uitgelaat met ’n ballon sodat die aasvissie net onder die oppervlak swem. Ons het heel week geen sukses gehad met die tarpon nie en het dus elke dag maar ander spesies geteiken soos Jack Crevelle wat redelik maklik is om op te spoor, en party dae is meer as 20 gevang in ’n kwessie van ’n uur. Die weer is redelik voorspelbaar - elke oggend is dit windstil maar dan in die middag en veral laat middag kom die wind op en krap die see so effe om en hou aan waai tot vroegaand wanneer dit weer gaan lê, so elke oggend is dit mooi weer met die see spieëlglad. Altesaam in die week het ons 4 mooi groot snappers gevang asook ’n klomp Jack Crevelle. Ons het elke dag ’n oggend- en ook weer ’n middagsessie op die boot gehad, maar die middag is geweldig warm en die humiditeit is baie hoog wat dit redelik ongemaklik maak, so van die ander ouens het nie elke middag weer uitgegaan see toe nie en ek dink sommige het opgegee op die tarpon. Eon is aan met 'n Cubera snapper. Ek het elke dag oggend en middag uitgegaan en op die laaste hengeldag het ek en Shawn alleen uitgegaan die middag en weer vir tarpon probeer - Shawn was vasbeslote dat die tarpon moet byt want hy kon nie glo dat ons nog nie een tarpon in die week gevang het nie aangesien die seisoen vir tarpon reeds begin het. Ons het die 4 lewendige ase uitgesit, 3 op ballonne en een sonder ’n ballon. Daar het so 5 minute verbygegaan en ek het net gaan sit op die sitplek toe sien ek skielik iets wat so “kook” agter die motor en toe begin die een katrol te skree. Ek skree toe vir Shawn “ons is aan!” en ek gryp die stok. Toe spring die vis reg langs die boot uit die water uit; Shawn het eintlik sy rug gedraai toe hy gedink het dit gaan in die boot spring! Alles gebeur so vinnig - voor jy jou kon kry begin die vis meters lyn vanaf die katrol stroop. Die vis het die lewendige aas letterlik net 2m agter die boot gevat! Met die eerste hardloop slag het die vis seker so 500m lyn gevat voordat ek kon begin lyn wen. Daarna was dit ’n gestoeiery en het ek geweet die geveg gaan nie gou oor wees nie. Soos ek lyn wen trek die vis weer lyn uit - die vis het op ’n tyd weer gespring en dis iets om te beleef en ongelooflik lekker om te sien! Na so amper ’n uur het ek die vis redelik naby die boot gehad maar dan was dit asof die vis ’n tweede lewe kry en het sommer vinnig weer ’n klomp lyn getrek en het dit dan gevoel asof die geveg nooit gaan eindig nie! Na ongeveer 1 uur en 10 minute het ek die vis reg langs die boot gekry en moes ek en Shawn skarrel om die vis langs die boot te hou, die boot te posisioneer en dan nog probeer fotos neem want die see was redelik omgekrap wat dit nog moeiliker gemaak het. Ek het toe in die water gespring om die vis vas te hou sodat Shawn ’n paar fotos kon neem. Hy het die hoek uitgehaal en ek het die vis vir oulaas vasgehou en toe ’n stoot gegee - om dit te sien veilig weg swem was ongelooflik - dit was ’n goeie gevoel om te weet dat die vis ’n ander dag weer ’n glimlag op iemand anders se gesig kan sit! 'n Handvol tarponskub! Ek het gegaan om ’n tarpon te vang en het my doelwit bereik - dit was beslis die hoogtepunt van die trip en ook van my jaar! Dit was ’n week van harde hengel om uiteindelik te kry waarvoor ek gegaan het maar dit was die moeite werd om te probeer en nie op te gee nie. Ek moet krediet gee aan Shawn - hy het ontsettend baie deursettingsvermoë en hy gee nie op nie. Sy kennis van die see en verskillendes spesies is ongelooflik en hy werk ook baie hard. As gids moet hy in die oggend eerste op wees om die gerei en boot reg te kry, dan ook die net vroegoggend en laataand te gooi om seker te maak daar is ten alle tye lewendige aas beskikbaar. Boonop moet hy met kliënte van verskillende agtergronde en verwagtinge werk waarvoor hy baie geduld moet hê! Kwanza Lodge is ’n baie aangename plek en ek kan elke hengelaar aanraai om ’n draai daar te gaan maak. Daar is verskillende spesies om in die rivier te vang asook in die see soos seilvis, marlyn, dorado en nog meer. Dis net jammer die plaaslike owerhede is nie streng genoeg om die onwettige nette in die rivier en rondom die riviermond te stop nie want dit maak baie spesies dood, insluitend seeskilpaaie (ons het juis een uit ’n net gehaal en losgesny). Ek sal beslis weer Angola besoek om dit verder te verken en hopelik weer met ’n tarpon te stoei. Extreme Fishing in Angola North by Shawn Mey The northern part of Angola is the gem for big fish, loads of action and hard pulling. We fly from Cape Town or Johannesburg with a direct flight to Luanda; from there it an hour’s drive to Kwanza Lodge. The Kwanza River is the largest river system which is why the fish in it can grow to the size they do. We target massive snapper, threadfin and jacks in the river, but when you hop out onto the back line we hang on the current line for those massive silver tarpon, the ultimate fish with their aerial displays and their angry temper once they are hooked. On our tours we supply all the needed tackle to make it easy for any angler to join us - all you need to bring is your clothing and personal toiletries and we provide the rest. The Kwanza Lodge provides comfortable lodging with aircons in each room to break the heat at night. * Bookings: E-mail to: Gofishtours@gmail.com; Web: www.gofishtours.com; Tel: +27743146651