‘n Drie-spesie Uitstappie by Thabo Se Dam

Wanneer jy tehore kom van ’n nuwe water waar jy nog nie gehengel het nie, en dan nog boonop die fotos sien van hoe goed die vis en die oewer lyk, maak dit nou maar eenmaal die hengelaar binne jou wakker. Jy begin dan dadelik dink en planne maak oor hoe jy so ’n water sal hengel om ook van dié prag blinklywe in die net te kry. Die skoon voerbal met ’n Soet Wit Degie, gewone oranje float en so bietjie ekstra vleis aas was gebruik om die karpe nader te roep. So was dit die geval in Maart toe Charmagne Grimbeek van ons sustertydskrif, Stywe Lyne, vir my haar fotos wys van haar en haar gesin se uitstappie toe hulle vroeër die jaar Thabo se dam net buite Bronkhorstspruit ontdek het. Ek het dadelik begin uitvind oor waar hierdie dam geleë is en presies hoe groot die water is wat ons sou hengel. Die dam is nie vreeslik groot nie, so 380m² en word gevoed deur ’n fontein, dus is die water helderskoon. So pak ons – dis nou ek saam met Charmagne, my pa Jurgens en my seun Kéan - die pad Thabo se dam toe. SWD vs Die Sparberry deeg. Wie sal wen? Ek sou sommer van die geleentheid gebruik maak om twee van ons aaskombuis se degies teen mekaar te hengel om te sien watter een die beste sou vaar – watter een sou op die dag gekroon word as die wenner met betrekking tot die hoeveelheid vis wat dit oplewer? Die twee degies was die SWD (soet wit deeg) en die Sparberry Degie. Om nie die degies se geur te belemmer nie het ek besluit om net skoon oranje floaties onder op die hoek te hengel met so ’n ekstra vleisaas as ’n bonus happie vir die plaasdam visse. Teen 09:00 was almal se lyne in. Charmagne het besluit om heel regs teen grasse te hengel, ek en Kéan in die middel, en my pa heel links. Vir hom was hierdie uitstappie iets werkliks besonders omdat ek en hy nie veel tyd kry om saam te hengel nie. Wat dit nog meer spesiaal gemaak het was die voorreg wat ons gehad het dat seun, pa en oupa kon saam hengel. Dit is hierdie uitstappies wat hengelaars behoort te koester, want dit is waar gesinsbande stywer gebind word en waar herinneringe gemaak word wat altyd met jou sal bly. Dit is raadsaam om by Thabo se dam dieper te hengel, dus kom ’n aasboot goed te pas. Langs die oewer het ander hengelaars lyne in gehad, en toe ek hulle hoor juig het ek gou ’n draai by hulle gaan maak. Die raad wat hulle en Charmagne my gebied het, naamlik dat jy hier by Thabo se dam diep moet hengel het regtig gewerk. Dit help ook om van ’n aasboot gebruik te maak, so te danke aan Andries van Arrow Bait Boats kon ons ons lyne invat tot op so ongeveer 200m. Oppad terug sien ek dat Kéan besig is om met ’n vis te stoei op een van my stokke en hardloop toe nader om die tweegeveg van nader te beskou. Die keer was dit Oupa se beurt om die skepwerk te doen, maar tjoeps, af is die vis, met net ’n skub ter nagedagtenis wat in die net oorbly. Wat wel hieruit gekom het is dat die eerste byt was op die SWD aas en nie op die geursame Sparberry deeg nie. Daardie lyn het glad nie eers geroer nie. Terug water toe met ’n nuwe skoon voerbal en SWD kombinasie, en waaragtig, weereens byt ’n karp, en steeds is die ander lyn stil. Dit het my laat wonder: waarom werk skoon hengel beter as wat geure doen? Al wat oorbly van ’n verlore vangs... Die oomblik as ek aan ’n dip of geur raak was die byte stil vir die dag. Op verdere ondersoek oor my vraag waarom skoon hengel werk teenoor gegeurde dips, het ek afgekom op Pro Mania hengelaar, Morné Saayman wat al twee Pro Mania’s gewen het deur nie van enige aas dips gebruik te maak nie. (Sien sy artikel hier). ’n Baie gesonde Thabo se dam karpie. Na my karpe het Charmagne ook ’n hele paar karpe kon vang, waarvan een van haar vangste besluit het om grasse toe te swem. Met baie geduld, diep in die water inloop en spanwerk van my, Kéan en Charmagne kon ons ook haar blinklyf terug oewer toe besorg. Om Charmagne se vis uit die grasse te gaan haal het behoorlik spanwerk geverg, soveel so dat al drie die water moes binne stap. Sommiges dieper as ander. My pa, wat heel links van ons gehengel het, se lyne was ook erg stil deur die loop van die dag, maar toe sy katrol eers wegtrek, kon hy vasmaak met ’n 4kg baber. Kleinseun en oupa kon hierdie baber tot in die net in speel met baie praatwerk van beide. Vir Kéan was dit hom nie beskore om ’n karp of baber te kon uittrek vir die dag nie, al het Charmagne van haar gelukbringer ‘Liquorice All Sorts’ met hom gedeel. Maar opgee wou hy nie, en het besluit om te kyk of hy van die honderde vleikurpers kon aankeer op Karibawurms. Charmagne se gelukbringer All Sorts was sommer opgedeel in die kilogram vis wat volgende gaan byt. Gooi vir gooi sorg die vleikurpers vir hope pret. Hulle kan met min moeite die jongklomp lank besig hou. Hierdie dam het regtig baie vleikurpers, soveel so dat dit wemel van die vis as jy die water binne stap. Die voordeel hiervan is dat dit weer die swartbaars van kos voorsien. Kéan kon wel nie die grootste vis vir die dag vang nie, maar het beslis die meeste vis gevang. Gooi vir gooi het hy vasgemaak met hierdie vegtertjies, en dit het hom voorsien met hope pret. Weereens was dit ’n aangename hengelervaring, en weereens kon ons iets uit die dag leer - en solank jy leer kan jou hengel net telkens verbeter.