Ons Hengel By Georgedam

Georgedam is geleë aan die voet van die Outeniquaberge omring deur fynbos en woude. Die dam is die hoofbron van water vir George en is ‘n bewaringsgebied waar kort voetslaanroetes, fietsrybane en piekniek areas vir die publiek beskikbaar is. Die natuurlewe word hier gekenmerk deur verskeie voëlspesies waaronder die bekende Knysna Lourie en Visarende onder andere voorkom. Dit is ook niks vreemds vir ‘n Bergskilpad om by jou kampplek te kom inloer nie. Die damwal is laasjaar verhoog en danksy die genade het reën die dam nou amper 100% vol gemaak. Met die nuwe grond en plante onder water, glo ek die vis gaan lekker wei en kan ons uitsien na nog meer hengelpret. My vriend Lian Haasbroek met 'n pragtige baber op 'n viskop gevang. Die dam se water het ‘n kenmerkende swarttee kleur as gevolg van die bergstrome wat in die dam vloei. Die kleur is dan ook kenmerkend van die taniene wat deur die boom blare in die water vrygestel word. Aangesien die dam jaarliks deur duisende toeriste besoek word het die plaaslike munisipaliteit maatreëls ingestel om die omgewing en waterbronne te beskerm en om ‘n gesonde ekosisteem te verseker. Die hoofingang na die dam word gevolglik gemoniteer deur sekuriteitsbeamptes en alle besoekers moet ‘n register voltooi. Wessel van Dyk met een van die mooi karpe wat in die dam voorkom. Indien jy die dam 30 minute na sononder wil besoek moet jy vooraf aansoek doen vir ‘n permit in George by die munisipaliteit se “Law Enforcement Section”. Om in die dam te kan hengel benodig jy die nodige lisensie wat by die munisipale natuurbewaringsgebou verkry kan word. Hounette word ook slegs toegelaat wanneer daar aansoek gedoen is om ‘n kompetisie hier aan te bied. Hierdie grootte babers kan 'n baie lekker geveg opsit, en om hulle uit die takke te hou en te land is groot pret. Georgedam beskik oor karp, baber, paling en swartbaars. Dit is egter nie gewild vir kompetisies nie aangesien dit by die wal geweldig vinnig diep word. Dieptes is hier gemeet tot 16m. My persoonlike ervaring is dat indien jy hier suksesvol wil hengel jy nie verder as 12-15m moet gooi nie. Op diè afstand hengel jy reeds op 3-4m diep water. Die karp wat hier geteiken word is egter gewoonlik onder 1kg. Die tweede hengelarea is meer na die inloop waar dit ongeveer 30m tot 70m breed is. Die helling is egter steeds steil en val die diepte baie vinnig na 2m tot 3m. Diè area kan egter nie meer as 10 hengelaars huisves nie. My vorige besoek aan die dam was gedurende die winter, en ek het al uit verskeie oorde verneem van die groot vis wat daar rond swem. Gedurende laasjaar is die wal verhoog en ek kon aan geen ander dam dink nie om sosiaal te gaan hengel toe my hengelmaat, Wessel voorstel dat ons die dam vir ‘n sosiale uitstappie gaan probeer. Nog 'n vis aan die lyn! Hierdie vis het baie hard geverg om in die takke aan die oorkant in te swem maar gelukkig het alles gehou en kon ek hom land. Met die nodige permitte voortydig gereël, arriveer ek op ‘n Saterdag oggend om 06:30 by die hek. Die sekuriteitsbeampte ontvang my op ‘n vriendelike en behulpsame wyse. Na die normale inspeksie van die permitte en die voltooiing van die register vertrek ek op die grondpad na my hengelbestemming. Groepies fietsryers kom by my verby en groet asof ek elkeen by die naam ken. Ek verkyk my vir die hoeveelste keer aan die fynbos en varings wat dakhoogte groei. Ek kry die twee-spoor paadjie wat afdraai na die inloop toe en ry stadig teen die steil afdraand af. Om die laaste draai maak die fynbos oop en die dam lê soos ‘n spieël voor my. My hengelmaat, Wessel is voor my daar en hy is al besig om sy gerei reg te kry. Ons groet en wissel ‘n paar gedagtes oor die dag se hengel voor ek my gerei begin aflaai. Kenmerkend van ons hengelaars som ek die water op terwyl ek my gerei gereed kry. Nog een in die net en die glimlagte strek van oor tot oor - dis mos waarom ons hengel! Ek sien vis draai teen die wal waar ons opslaan asook teen die oorkantste wal. Teen die oorkantste oewer lê verskeie bome wat deur die jare omgeval het half onder die water. Ek besef dadelik dat dit ‘n kos spens vir die vis moet wees en dat dit ook as skuiling vir die vis dien teen roofdiere soos die visarende wat gereeld daar kom jag vir iets te ete. Die dam is hier omtrent so 50 tot 60m breed. Wanneer die visse byt is dit altyd lekker, maar om die tyd met goeie vriende te deel maak dit soveel beter. Ek haal my 8-voet en 10-voet stokke uit vir die dag se hengel. My 8-voet stok gooi ek op 15m, gelaai met ‘n knoffel float met pynappel en passion fruit op die bal. Die rede hiervoor is dat die dam nie baie gehengel word nie en ook omdat die soet sagte geure in die verlede vinnig vir my vis gegee het. Dit is egter geneig om kleiner vis te trek. Die 10-voet stok gooi ek so na moontlik aan die bome aan die oorkant met dieselfde hoekaas. Hier gooi ek bunspice en passion fruit op die bal en hoop om groter vis met die sterker geure te lok. As ek gedurende die dag my dips verander sal ek altyd net een geur weg vat of vervang met ‘n ander. Ek poog dus altyd om met een geur deurentyd op die bal te bly. Ek besef dat die stok nie meer as ‘n paar sentimeter kan loop voordat die vis in die bome verstrengel gaan raak nie. Skrywer met een van die babers wat hy op die dag by Georgedam aangekeer het. My kort stok hardloop eerste en ek vang ‘n pragtige klein karp. Ek gooi die stok weer terug op dieselfde plek met die hoop om ‘n goeie kol te bou en dalk groter vis te trek. Almal vang sporadies vis rondom my. ‘n Paar groter karpe word in die oorkantste bome verloor as jy nie betyds jou stok kan bereik nie. Teen 10-uur trek my diep stok weg, en met die vasmaak besef ek dat die nie ‘n karp is nie. Ek speel die vis versigtig en na ‘n senutergende paar minute kry ek dit weg van die takke en ons skep ‘n jong baber van so 4kg. Hierna word ‘n jong karpie opgesny en elkeen offer een stok op vir baberhengel. Die hengel genot wat hierna volg was vir ons almal iets om te onthou. Skaars raak die aas water of baber se kind begin aan die aas peusel. Die viskopaas wat ons gebruik het om die babers aan te keer. Ons hengel met ‘n enkele sirkelhoek direk op die voorslag geknoop. Aangesien ons met sirkelhoeke hengel kan jy nie kap nie en moet jy staan en wag totdat die baber besluit om met die aas weg te swem. Hierdie is 'n bielie van 'n baber en wat 'n plesier om die vis te kon vang, al moet ek self sê, hier is ek darem in my noppies! Die viskoors loop hoog en om geduldig te staan en wag raak ‘n senutergende besigheid. Ons is egter net gewapen met 7lb lyn en wen die babers baie van die gevegte. Om 12:00 maak Wessel vas met ‘n vreemde vis. Na ‘n paar spekulasies trek hy tot ons almal se verbasing ‘n mooi paling uit. Die paling het sy viskop-aas gevat - ‘n eerste vir hom. Wessel van Dyk se paling wat hy aangekeer het. Dit is voorwaar 'n baie skaars spesie en hy is baie trots op sy vangs. Met ons naby stokke het ons steeds op die karp bly konsentreer. Alhoewel die meeste klein gebly het, het daar later tog ‘n paar mooi karp die aas kom optel. By verskeie geleenthede was ons aldrie gelyk aan met vis. Georgedam se groot karp het my weer uitoorlê. Ons het egter die dag se hengel geniet en sal beslis weer vir hulle en die groter babers kom hengel.