Ons ‘SURVIVOR’-sessie by Buffelspoortdam

WOORDE: Riaan ‘Alleman’ Riekert | FOTO'S: Die ‘Survivors’ Buffelspoortdam lê prentjiemooi agter die boot. As jy vir my vra was dit lekker gaan ek vir jou sê dit was my lekkerste sessie ooit; as jy my vra wil ek dit weer ervaar gaan my antwoord wees, nooit nie! Riaan Alleman het so paar maande terug die voorreg gehad om oud-polisieman Daan Meyer te ontmoet, hy is afgetree en is nou ‘n groot beesboer in die Buffelspoort-area. Daan se grond grens aan die legendariese Buffelspoortdam wat alombekend is vir sy mooi baars en karpe. En dis geen geheim dat as daar mooi karpe betrokke is, is Riaan Alleman daar! Dankie aan Gys Pitzer Motors vir ons veilige wiele, en aan ons sleepwaborg, Camp Master. Nou het Riaan Alleman meer as genoeg pakspasie! My penmaat vir die sessie het ook geen bekendstelling nodig nie. Nico Oosthuizen het al diep spore getrap in die hengelbedryf en het sonder om te huiwer ingestem om die sessie saam met my te doen. Min het ons geweet wat die volgende paar dae vir ons gaan inhou. Met beperkte tyd en die huidige brandstofpryse kon ons ongelukkig nie die plek voor die tyd besoek nie, maar Daan het wel gewaarsku dat as ons daar wou hengel gaan ons moet oopsny, want daar is glad nie oop hengelplekke nie! Nico het wel al sulke hengelsessies gedoen en ons het byvoorbaat besluit om die bossiekappers en snoeiskêre in te pak. Donderdagoggend het aangebreek en ek en my seun, Wian was gepak en reg vir die sessie, of was ons reg vir wat oppad is? Nico kom al die pad van Lichtenburg af wat dieselfde rytyd is as ons van Kempton Park af. Ons het deur goeie beplanning saam gearriveer en die opwinding was groot. Ek het gou kontak gemaak met Daan en hy het ons op sy vierwielmotorfiets begelei dam se kant toe. Die pad af dam toe was ‘n bospaadjie wat heel duidelik nie veel gery word nie en ons moes maar mooi koes vir die doringtakke wat oorhang om nie die bootjies op die sleepwaens te beskadig nie. Hier is ons kampplek in die bos voor ons dit begin regkry het om kamp op te slaan. Wian en Nico bespreek strategie hoe ons dit gaan aanpak. Toe het Daan skielik in die middel van die bos tot stilstand gekom. "Hier is julle kamparea, manne!" het sy stem gebulder. Ons drie het mekaar verslae aangekyk, want glo my as ek sê daar was net digte bos, niks anders nie! Stomgeslaan het ons saam met Daan afgestap dam toe. "Hier manne, hier hengel julle!" Weereens was daar daardie verslae kyke tussen ons drie want daar was net digte riete, so dig dat ons die water skaars kon sien. Daan het ons net daar gelaat en gegroet: "Geniet die naweek, manne, hoop julle vang groot visse!" en hy’s daar vort. "Wel, ons is nou hier, kom ons maak dit werk!" Dit was ons bespreking en ons het aan die werk gespring. Eerste prioriteit was om die rietbos oop te sny en gelyk te maak sodat ons die kamp kon staanmaak. Ons moes ook groot klippe uit die pad rol en die doringbome het dit glad nie maklik gemaak nie, maar vele hande maak ligte werk en binne ‘n uur was ons kamparea reg om die tent op te slaan. Hier is Riaan Alleman hard aan die sny om ons kampplek skaflik te maak om die tent op te slaan. Terwyl ek hard aan die kamparea werk, is Nico druk besig om ons hengelspasie oop te sny; hier moet mens wakker wees vir al daai vioolspinnekoppe! Van ons tent af was die oewer 50m ondertoe en moes ons ‘n pad oopsny om dit moontlik te maak om vinnig genoeg by die stokke uit te kom as daai visse die lyn vat. Nico het die paadjie begin sny terwyl ek en Wian uitgepak het en die kampopset begin leefbaar maak. Met die kampplek oopgesny het ek Nico gaan help onder by die water. Terwyl Nico met die bossiekapper werk het ek ingespring met die snoeiskêr. Dis belangrik om al die riete onder die watervlak te sny – dan is daar minder plek vir die spinnekoppe om op te sit. Ek en Nico swoeg en sweet om die hengelspasie reg te kry – ons moes met tye in die dieper water met die bossiekapper bo ons koppe staan en sny. Met die kamp staande is ons af water toe en hier het die eintlike groot werk vir ons gewag: daar was absoluut geen opening nie en ons moes ‘n hele hengelarea oopsny! Nico met die bossiekapper en Riaan Alleman met die snoeiskêr het die groot werk begin. Soos ons sny het Wian ingespring en al die los gras en riete wat ons gesny het eenkant toe getrek, maar ons moes wakker wees want die riete en gras was besaai met vioolspinnekoppe, en soos almal weet is hy nie jou maatjie nie. Dit was baie uitdagend en met tye was ons so diep in die water dat ons met die bossiekapper bo ons koppe moes staan en sny. Na omtrent drie ure se swoeg en sweet was ons darem klaar en reg om die sessie met alle erns te begin. Uiteindelik is die area skoon en ons kon in alle erns begin hengel. Ons het die opblaasbootjie gedra water toe en dit was nogal tegnies om hom met ons kronkelpaadjie dam toe te kry. Ek en Nico het op die boot gespring en die water gaan verken. Die van julle wat Buffelspoortdam ken sal bewus wees van vyand nommer een, naamlik snotterbelle! Hierdie lastige plant is volop in die vlakker water en as jou lyne daarin beland kry jy dit selde uit sonder om af te breek. ‘n Nadeel van ons sessie was dat ons anderkant die snotterbelle moes hengel want dit is waar die groot karpe wei! Nico ken die dam baie goed en op 6,50m water val dit skielik tot 8,50m; die water hier is ook meer vuil omrede dit ‘n onderwaterrivier is wat daar deurloop. Die karpe is egter mal daaroor om in hierdie vuil water kos te soek. Vir aand een het ek besluit om een stok in daai 6,50m water te sit en die ander een reg aan die oorkant onder ‘n boom wat in twee meter water oorhang. Nico se taktiek was soortgelyk en toe het die wag begin. Dit was ‘n lang uitputtende dag en kort na ete het ons maar gaan inkruip, glo my as ek sê ons het seer spiere gehad waar ons nie eers geweet het daar is spiere nie! Wian spog hier met een van die vele baars wat hy aangekeer het. Pa en seun selfietyd … Ons slaap was egter van korte duur; 01:20 is ons wakker gemaak deur my alarm wat mal gaan en dit was pandemonium om in die donker, steeds aan die slaap, met net ‘n kopliggie daar af te strompel na die stokke toe. Ek en Nico het op die boot gespring om die vis te gaan land, want met al die struktuur was daar geen ander manier om die vis te land nie. My grootste vrees het egter waar geword toe my lyn in die snotterbelle verstrengel raak en toe was dit net bid dat dit sou loskom. Die bid het egter gehelp en my lyn was verlos en die geveg het in alle erns begin. Na ‘n lekker gespook het ek die vis geland en ons rekening is oopgemaak met ‘n pragtige karp van 11,25kg – hier kom ‘n ding! Die skaal jok nooit: Riaan Alleman se karp het die skaal getrek op 11,25kg. Hierdie was my nommer een keuse, Tjop-tjop werk goed veral in die vuiler water waar ek die vis geteiken het. Hier spog Riaan Alleman met sy pragtige vangs in die vroeë oggendure. Dis aangekeer op Fish se Tjop-tjop tigernuts met ‘n rooi sponsie op om die vis se oog te vang. Hier kan julle ‘n beter idee kry van hoe my aasaanbieding lyk. My tweede keuse wat ook drie visse gelok het, maar wat ongelukkig in die struktuur verloor is: Fish se mulberry tigernuts met mulberry dip. Ons het besluit om nie weer die lyn in te vat nie en het verder gaan slaap en die res van die aand het geen vis opgelewer nie. Die volgende oggend douvoordag het my volgende stok by die boom gehardloop en dit was Wian se beurt om dit te land. Ongelukkig het die karp ons geflous en die lyn twee keer om ‘n ou boomstomp gedraai en kon ons hom nie land nie. Die res van dag twee was egter baie stil gewees en behalwe vir een 'line drop' by my deur die dag was daar niks om oor huis toe te skryf nie. Ons het laatmiddag ons lyne weer ingevat maar dié slag taktiek verander: ek het beide myne in die 6,50m water geplaas en Nico sy lyne reg by die riete in 3m water. Met al die werk van die vorige dag steeds in ons lywe het ons kort na ete weer bed toe gegaan, en weereens was ons slaap van korte duur toe Nico se stok net na 12 weggetrek het met ‘n helse gejuig. Ongelukkig het die vis in die riete beland en hy kon hom nie land nie. Hy het dadelik sy lyn weer teruggeplaas en ons is terug bed toe. Kort daarna het sy ander stok gehardloop en dié slag was ons meer gelukkig, en Nico het ‘n pragtige karp geland van 8,50kg. Die res van die aand was stil en ons kon rustig verder slaap. Wees net gewaarsku: as julle ooit beplan om hierdie tipe hengel te doen – daardie vioolspinnekoppe klim oral in, op jou stokke en in die boot. Nico spog hier met sy een karp wat hy uit die riete kon hou. Hy het ongelukkig vele vis in die riete verloor. Ons Tentco-verblyf vir die naweek; maak seker jy hou jou tent baie mooi toe want hier is baie ongewenste karakters. Dag drie het aangebreek en dit was ‘n donker dag gewees: Nico en ek het ‘n hele paar mooi karpe verloor as gevolg van die riete en die struktuur en daar was geen vis geland nie. Die laaste aand het aangebreek en Riaan Alleman het besluit om weereens albei stokke te plaas in daardie 6,50m water. Na ‘n lekker biefstuk op die kole is ons bed toe op afwagting vir daardie alarms om te skree! Die rondte het ons slaap darem gehou tot 03:00 toe myne wegtrek; ek kon dadelik hoor dis ‘n mooi vis en Wian was baie opgewonde. Ons het op die boot gespring, maar ongelukkig het alles van hier af verkeerd geloop: eerstens wou die boot nie behoorlik werk nie en ek moes inderhaas afspring in die diep water om die boot uit die riete te kry; met die gesukkel het die vis die lyn behoorlik deur die snotterbelle getrek, en vir een of ander rede wou die motor glad nie saamwerk nie en het bly vrek sodra ons vetgee. Met al die gesukkel het ons ongelukkig die lyn in die snotterbelle afgebreek, en toe was my moed in my skoene, en met my kop tussen my bene kon ek figuurlik net nie die trane stop nie. Ek weet dit was ‘n ‘bus’ en ons het hom verloor! Met ‘n baie swaar hart is ek bed toe en sal ek altyd wonder hoe groot was daardie vis werklik gewees; een ding weet ek – dit was groter as aand een se vis! Hier word ek uitgevang terwyl ek die laaste bietjie boeliebief sommer so uit die pot eet, mens mors mos nie kos nie! Ons 50m bospaadjie af na die water toe, ons moes maar mooi kyk waar ons hardloop om nie ons nekke te breek nie. Die laaste oggend het aangebreek en ek was vroeg uit die vere om een laaste poging aan te wend. Nico se stok het egter net na 07:00 begin hardloop en met groot hartseer het ons hom ook in die riete verloor. Dit was egter die laaste byt gewees en ons het in alle erns begin wegpak. Om die naweek in ‘n neutedop op te som is nie maklik nie, maar die feit dat ons slegs twee vis kon land en sewe verloor het sê sekerlik genoeg! Maar op ‘n ligter noot, dit was een vir die boeke en ten spyte van alles sal ek hierdie naweek in my lewe nooit vergeet nie. Soos die troepies destyds gesê het: "Weermag was lekker, maar ons wil dit nooit weer oorhê nie!" Met geen geriewe nie moes ‘n boer ‘n plan maak om te was. Nico het vir ons hierdie stort saamgebring wat mens sommer op ‘n karbattery koppel. Riaan Alleman steel so ‘n skelm foto net om te wys ons het darem gestort ook! Hier is ‘n paar dinge wat ek geleer het as julle ooit so iets wil aanpak. Op sulke sessies is daar nie geriewe nie, so mens moet selfversorgend wees (in ALLE opsigte!). Maak seker jou beligting is voldoende. Ons het ligte met sonpanele by die kamp en onder by die water gebruik. Omdat mens so in die bos is weet mens nooit hoe veilig dit is nie; ons het vier alarms saamgevat wat ook met sonkrag herlaai, en hulle om die voertuie en tent geplaas (beskikbaar by Takealot). Vat genoeg drinkwater saam. Ons het geen vuur gemaak nie. Gebruik liewer ‘n gasbraai want jy wil nie graag die bos aan die brand steek nie! Maak seker jy het ‘n goeie kopliggie, en kyk mooi in die boot as jy inspring want ons is meer as een keer deur die spinnekoppe gebyt. As ‘n vioolspinnekop jou wel byt, sal jy na twee dae sien dit vorm ‘n blasie; plaas ‘n waslap in kookwater en hou dit so lank jy kan op die blasie om die gif te neutraliseer. Herhaal die proses vir drie dae. Vat handskoene en die regte snytoerusting saam as jy jou kamp- en hengelplek moet oopsny. Hou jou tent te alle tye toe – jy wil nie besoekers soos slange en spinnekoppe in jou tent innooi nie! Soos Riaan Alleman altyd sê: "Waar is dit lekker? Hier is dit lekker!"

Ons ‘SURVIVOR’-sessie by Buffelspoortdam

RIAAN 'ALLEMAN' RIEKERT

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

Von Du Rust is ‘Von-derlik’

LEES DIT NOU! / READ IT NOW! Die Oewerhengelaar | DESEMBER 2023

CAMPING for the holidays – with CAMP MASTER

ZERO TOT HERO – Barbara Conradie

VAALRIVIER: Stuur jou foto’s van siek visse!

New TOPS Regulations Open for Public Comment

ONS LESERS SPOG! • OUR READERS BRAG!

ONS JUNIORS SE FOTO’S! • OUR JUNIORS’ PHOTOS

GESTREMDE HENGEL IN SUID-AFRIKA

Fishing is a family affair

Von Du Rust is ‘Von-derlik’

LEES DIT NOU! / READ IT NOW! Die Oewerhengelaar | DESEMBER 2023

CAMPING for the holidays – with CAMP MASTER

ZERO TOT HERO – Barbara Conradie

VAALRIVIER: Stuur jou foto’s van siek visse!

New TOPS Regulations Open for Public Comment

ONS LESERS SPOG! • OUR READERS BRAG!

ONS JUNIORS SE FOTO’S! • OUR JUNIORS’ PHOTOS

GESTREMDE HENGEL IN SUID-AFRIKA

Fishing is a family affair

SOCIAL BASS FISHING: Remind Yourself Of The Good Times!

Von Du Rust is ‘Von-derlik’

THE BLUE ECONOMY

R550.00 per year

R55.00 per month

R399.00 per year

R40.00 per month

R399.00 per year

R40.00 per month