Readers Catches – Lesers se Vangste: July 2019

WE CELEBRATE YOUR CATCHES - as published in Stywe Lyne Tight Lines magazine, JULY 2019 Issue 713 TO ENTER: Email a hi-res jpg image and details of the catch (max 80 words!) as attachments to: stywelyne@stywelyne.net Karpioenespan wen by Buffelspoortdam Die Noble pa en seun span van Graham (snr) en Graham (jnr) saam met hul vriend PJ de la Porta woon gereeld as span grootkarp hengelkompetisies by en het al 10de en 4de plekke verower. In Mei is hulle vir hul harde werk beloon deur as algehele wenners by die IBCC toernooi te Buffelspoortdam gekroon te word. Oor 4 dae het hulle 166,49kg karp gevang en het skaars geslaap. Die vis was bedrywig tussen 500 en 530 meter en al die vis is met ’n Spinner/Ronnie rig met Tera Tech se pynappel/peach en mango sowel as gemengde berry pop ups gevang. Hul plan was van die begin tot aan die einde van die toernooi onveranderlik, alhoewel veranderd van vorige toernooie, daarom die oorwinning. Hulle wen ’n oorsese toernooi in Hongarye en sien baie daarna uit. RUBEN FOURIE - My kleinseun, Ruben, het ’n Kaapse stompneus gevang op vars witmossel wat hy self uitgedans het vroegoggend by Keurboomstrand. Ruben het by Plettenbergbaai grootgeword, en branders ry, boogie bord, branderplank, en enigiets anders behalwe visvang, was sy lewe. Ek was natuurlik maar suur en ook bekommerd oor al die haaie en ander gevaartes in die water. En toe gaan Ruben sowaar een Saterdagaand saam met my en sy pa, suster en klein boetie, en ek vang darem twee babers. Ruben wil toe graag die Sondagoggend weer gaan(!) en hy vang toe heerlik vis. Ek het darem enetjie gekry. Cobus Erasmus. MARIUS STRYDOM - Ek het hierdie pragtige galjoen van 53cm vroeg die oggend van Paas-Sondag op Danabaai se derde strand met sandkrap-aas gevang. Na die fotos is dit vrygelaat. Die aas was ’n sandkrap. WILLIE VISSER - Ek het die afgelope Paasnaweek diè 19kg steenbras gevang by Brandfontein, Struisbaai. Vir aas het ek maanskyn wurm gebruik en 40lb Braid lyn. JEAN OLIVIER - Jean het ’n pyjamahaai, (striped catshark), uitgetrek toe hy saam met Witsand Fishing & Charters op die boot uit op die see was, sommer so tussen-in die elwe en rooi romanne. Alma Olivier. TIAAN SWART - Ek deel graag die storie van ’n besonderse elf wat ek gevang het. Ek studeer op Stellenbosch maar is van George af en ’n uiters ywerige hengelaar, nodeloos om te sê sien ek dus baie uit na elke kans om huis toe te gaan en te hengel. Die Paasnaweek was nie ’n uitsondering nie en alhoewel ek so bietjie later as beplan by die huis aangekom het, het ek en ’n baie goeie hengelvriend besluit om te gaan gooi vir groot elwe op ’n plek wat hy weet bekend is vir “blou elwe”. Ons het net voor donker daar aangekom en haastig ingegooi. Ek het so drie minute gewag voordat ek ’n byt soortgelyk aan ’n 40cm elf s’n gekry het. Ek het die vis vasgemaak, maar kon dadelik voel dat dit ’n veel swaarder vis was. Van die begin af was ek oortuig ek het ’n kabeljou van 10 tot 15kg aan die lyn. Toe die vis egter teen die kant kom, het ’n enorme elf voor my gespring, wat my net in verbasing laat staar het. Die land van die vis was vinnig en maklik. Nadat ek en my vriend eers vir mekaar moes bevestig dat dit werklik ’n elf is, het ek die vis gemeet. Sy vurklengte was 78cm wat omskakel in ’n gewig van nagenoeg 6,5kg. Ek het egter geskat dat die vis net 6kg geweeg het, al was dit in goeie kondisie. Dit was ’n besonderse elf en ek glo nie ek sal in my lewe die voorreg beleef om weer so een te kry nie. JOHN ALBERT BRIERS - Ons het die afgelope Paasnaweek gaan hengel by Pearly Beach in die Wes-Kaap. Vrydagmiddag het my vissermansdroom waar geword toe ons op die strand by die karavaanpark lyne nat gemaak het. Ek het besluit om ’n lekker sardynbom aan ’n 5/0 hoek te sit en skielik sing die katrol. Vyftien minute later toe staan almal verstom oor hierdie 8kg kabeljou wat op die wit sand lê. Dit was voorwaar een van my lekkerste oomblikke! Chantelle Rademeyer. VERNON ROBERTS - Vernon vang ’n mosselkraker van 4,5kg met ’n bloedwurm by Groenvlei, Sedgefield. KOBUS NAUDE - Ek het ’n 8,8kg karp met Bossie Banana aas gevang uit ’n plaasdam naby Ogies in Mpumalanga. Die vis is weer vrygelaat. GERRIT JONKER - Hierdie 8kg baber het Gerrit by Kwaggaskloofdam met ’n karploodkop kunsaas aangekeer vanaf hulle boot. Hy behoort aan die Cape Winelands Artificial Lure Angling Association. JACQUES KOEKEMOER - I caught this beautiful and unique specimen, a twotone fingerfin, on a slightly overcast day down in the Eastern Cape, with a brisk south easterly blowing, using an octopus leg and chokka combo. Apologies for the photo quality, as I had to DIY it. But this is definitely a catch to remember, and after a quick pic, she was safely released again. Thanks again for a great magazine. Daniël se eerste haai oor 100kg: Struisbaai deur Pieter van der Merwe Ons was weer bevoorreg om in Struisbaai vakansie te kon gaan hou tydens die Maart 2019 skoolvakansie. Hierdie jaar was ons ’n lekker groepie, ek, my vrou Fransa en ons seun Daniël, my skoonma Rita, skoonsuster Thania en swaer Pieter asook hulle dogter Naomi. Ons manne kon natuurlik nie wag om op die strand te kom nie. Die haaie het geroep en Daniël, 12 jaar oud, wou baie graag die stryd aansê met ’n MENEER oor 100kg. Min het ons geweet wat vir ons voorlê. Dag 1. Die gety het gestoot van ongeveer 11h00 af en ons het geelstertkop as aas gebruik vir die haaie. Daniël het gooi-aas gebruik en ek die gly-aas metode. Ongeveer 16h00 tel Daniël iets op wat net lyn van die katrol afstroop. Ek was oortuig dat dit ’n groot swart pylstert was. Die vis was aan vir 55 minute en ongeveer 500m uit maar die lyn het aan iets gaan vasgesit en Daniël moes maar die teleurstelling aanvaar. Dag 2. Terug op die plaat en die haai-aas was weer eerste in die water. Ons het met 2 stokke gevis vir haaie en elk ’n stok met kleiner aas vir kleiner vis. Ons het ’n paar sandhaaitjies gekry en dit is altyd lekker pret. Laat die middag trek Daniël se stok plat en hy is aan. Na ’n lekker geveg van ongeveer 25 minute land hy sy eerste skeurtandhaai van 131kg. Wat ’n lekker ervaring om te sien hoe jou seun sy eerste GROOT haai vang. Ongeveer ’n uur later tel ek ook een op net om hom in die vlak water te verloor. 131kg Dag 3. Gaan kuier ons by vriende in Pearly Beach en besluit om ’n lyn te gooi vir eetbare vis, maar niks wou byt op die dag nie. Dag 4. Ons begin weer hengel op die plaat met baie hoop aangesien die vis aan die byt is die laaste paar dae. Ons vang weereens lekker sandhaaitjies maar die eetbare vis wil niks weet nie. Laatmiddag is dit weer my beurt met die haaistok en ek kry ’n mooi 128kg skeurtandhaai. Dag 5. Teen die tyd is my swaer Pieter meer as gereed vir bietjie aksie en sommer vroegoggend is hy aan met sy eerste haai. Hy hanteer die geveg baie mooi en land ’n 129kg skeurtandhaai. Vir die res van die dag is dit net sandhaaitjies. 129kg Dag 6. Ek en Daniël hengel van vroegoggend af op die hawemuur maar kry niks vir die dag nie. Die hawemuur is besondere plek en die kinders geniet dit baie. Ek kan myself verkyk aan hoe die kinders daar hengel. Dag 7. Weereens terug plaat toe. Hoe dan anders? Vandag kom Naomi saam want sy wil ook voel hoe trek ’n haai. Ons was nog nie eers lank op die strand nie toe trek my stok plat. Ek set die hoek en gee die stok vir haar. Soos dit nou maar soms gaan vang mens nie almal nie en verloor sy die een. Ek laai toe weer aas en sy is sommer gou weer vas. Hierdie keer speel sy hom mooi en ja, raai wat, sy land die grootste een van ons almal, ’n 144kg skeurtandhaai. 144kg Daniël het vasgebyt met die hengel en tel toe ook weer een op. Die mannetjie verbaas my en land nog ’n skeurtandhaai van 110kg. Later die middag kry ek ook toe nog een van 118kg. Ons beste dag met 3 haaie oor 100kg. 118kg Dag 8. Teen die tyd wonder ons nie meer waar ons gaan hengel nie, ons gaan net reguit plaat toe. Vandag kom maak Orville ’n draai. Hy is getroud met Fransa se niggie en hulle is met vakansie van Kanada af. Terwyl hy by ons staan en gesels trek my stok weer plat en ek gee die stok vir hom. Hy het sommer kort werk gemaak van ’n 108kg skeurtandhaai. 108kg Ek het die stok weer gelaai met aas en vang vir oulaas ’n 90kg skeurtandhaai. Dit was by verreweg die meeste haaie wat ons tydens ’n vakansie gevang het, 8 skeurtandhaaie. Wat ’n voorreg om dit met familie te kon deel.