RIAAN ALLEMAN & die ‘vlieënde Hollander’ hengel by Aqua

WOORDE & FOTO'S: Riaan 'Alleman' Riekert Wie sou kon sê dat die jong man, André Kolb se hengelreise in 'n swembad sou begin? Ja lesers, reg gelees, in 'n swembad, en vandag is hy in Nederland 'n vooraanstaande spesiehengelaar! Kom Riaan Alleman draai die horlosie terug na 2018: Dit was 'n bitter moeilike jaar vir ons Riekerts en een wat ek eintlik nie wil onthou nie. 'n Reuse brand op ons kleinhoewe in Kempton Park het verwoesting gesaai maar danksy die Here se genade was ons huis gespaar. Een van die dinge wat verwoes was was ons swembadpomp en alle pypwerke na die swembad. Weens finansiële implikasies kon ons ongelukkig nie die swembad herstel nie en het die swembad 'n sitting duck geword. 'n Jaar later het my ma, Marinda besluit genoeg is genoeg en dat ons moet plan maak, want die muskiete het ons omtrent weggedra. Sy het met 'n blink plan vorendag gekom en in 'n japtrap was die swembad omskep in 'n dam met pragtige lelies en verskeie ander waterplante. My ma het sommer by die kwekery ‘n paar goudvisse gaan koop en dit in die dam geplaas. My skoonsussie, Marise Riekert het ook vir ons 20 tilapia geskenk en siedaar, die Riekerts se eie visdam. Vandag is daar duisende tilapia en ons spog selfs met 'n kruising van tilapia en goudvis. Nou seker die vraag op almal se lippe: hoekom verveel ek julle met die stukkie geskiedenis en nuttelose inligting? Wel die storie lees as volg: My seuns, Ruan en Wian wat ook mal is oor hengel se vingers het gejeuk en hulle het begin om die vis in die dam te teiken. Met lekker vars wurms uit my ma se tuin het hulle die tilapia een na die ander geland, en soms sommer 'n goudvis ook aan die hoek gehad ... lol, my ma het lekker met hulle baklei. Met dié kom kuier André, my susterskind, die een naweek by ons. Hy’t nog nooit in sy lewe 'n vis gevang nie. My seuns het hom vinnig touwys gemaak en in 'n naweek is hy van geen vis na een van die grootste junior spesiehengelaars in Nederland! Hier spog André met sy eerste baars ooit. Hy het homself gate uit geniet en kon nie genoeg kry nie. André stel sy vernuf ten toon met die aanwending van die aas. Kort na dié kuier het my suster-hulle na Nederland toe getrek en min het hulle geweet wat op hulle wag. Nederland beskik oor baie damme of lakes soos André dit noem. André het baie vinnig vriende gemaak en toevallig was baie van hulle ook kranige jong hengelaars. Met Google en verskeie ander aanlynplatforms was André besig om self vinnig gekonfeit met die nodige tegnieke en toerusting te raak en dan natuurlik het hy Alleman mal gemaak vir nog bietjie ekstra raad. Alleman kry gereeld 12-uur die aand foto’s van pragtige vis wat die man land. 2025 het aangebreek en Alleman ontvang 'n boodskap dat hulle einde Januarie Suid-Afrika toe kom en sal ek omgee om André te vat om een van ons damme te hengel? As gevolg van beperkte tyd moes ek hom na 'n nabye dam vat en het besluit op Aqua Paradiso in Germiston. Aqua is nie die maklikste van waters nie maar Alleman het net voor die man se aankoms darem twee suksesvolle sessies daar gehad. Stokke slaggereed – nou die wag vir, hopelik, daai monster om te byt. Alleman het soos oudergewoonte skoon voer gebruik. Ek glo glad nie aan enige bymiddels nie. Ek het my suster-hulle 11-uur die Saterdagoggend by die lughawe opgetel en teen 13:00 was die bakkie reeds gepak en ons is op pad Aqua toe. Die man kon nie ophou babbel nie en hy was baie opgewonde, hy wou net weet hoe groot is die visse wat ons gaan vang, hoe diep gaan ons hengel, watse aas, watse rigs? Hy het omtrent my ore van my kop af gepraat. Met ons aankoms was die weer eintlik onguur maar van opgee en huis toe gaan was daar geen sprake nie – vis gaan ons vis. Gelukkig het Alleman die voer en alles reeds by die huis voorberei, so daar sou geen tyd gemors word nie. Binne 'n uur was al die lyne sorgvuldig geplaas en toe begin die wag. André het al die ase vir ons opgesit en heeltyd my rigs bevraagteken; hy is omtrent 'n perfeksionis. Ons aaskeuse was eenvoudig – Alleman se tradisie met een pit uit die voer met een wit fake maize bo as aanlokker. Die wag was egter van korte duur toe die alarm wegtrek met 'n helse gejuig. André het amper in die dam ingehardloop so opgewonde was hy. Met ons lewensbaadjies aan het ons ingegaan om die vis te gaan land – Aqua het ongelukkig heelwat bome so ek sal nie aanraai jy probeer die vis kant toe bring nie. Na 'n paar minute se stoei het die vis sy lyf gewys en het André geskree, “Oom Riaan, kyk dis 'n koi!” Aan die lyn was 'n pragtige koi en die man was omtrent uit sy vel uit. Hy het die pragtige koi veilig geland en na 'n paar mooi foto’s het ons die koi veilig teruggeplaas. Hier spog die 'vlieënde Hollander' met sy eerste koi ooit. Die kleure van die koi is merkwaardig en die vis is in top kondisie. Soos dit ons hengelaars betaam is die koi veilig terug besorg vir die volgende hengelaar om te land. Ons het vinnig die aas weer in die water gekry en nie lank nie toe trek dieselfde stok weer weg, en glo my of nie, wragtig weer 'n koi! In my vorige agt sessies by Aqua kon ek nog nooit 'n koi land nie en hier kom die ‘vlieënde Hollander’ en land twee in minder as 'n uur! Die tweede pragtige koi in sy volle glorie. Kyk, met daai stert het André se tweede koi omtrent 'n geveg opgesit. Net soos met die eerste vis, is die een ook weer veilig terug geplaas vir die volgende hengelaar. Die res van die middag was stil en ons het lekker gesels en tussendeur ‘n paar mooi baars geland. Met bietjie vlugflouheid is die man vroeg bed toe. Deur die aand het ons twee byte gehad maar kon ongelukkig net die een land, 'n pragtige jong, gesonde spieëlkarp. Soos ek vroeër gesê het was ons tyd ietwat beperk en moes ons die volgende oggend vroeg oppak om 'n familiebraai by te woon. André wou niks weet van oppak nie en sy woorde was “kom ons vis, die familie kan alleen braai” ... lol! Ek moet vir julle sê, dit was werklik lekker om die jongman se geesdrif te sien en ek kan nou sê, hou André Kolb dop, hy gaan nog diep spore in hengel trap. Soos Riaan Alleman altyd sê: "Waar is dit lekker? Hier is dit lekker!"

RIAAN ALLEMAN & die ‘vlieënde Hollander’ hengel by Aqua

DUBBELE KOI-VERRASSING!

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

Kleindamplesier, die juweel onder jou neus!

KARPOEWERHENGEL – Die Haarstrop

Light up all ADVENTURES with Camp Master’s String Lights & Lantern!

LONG & SURF CASTING: Part 3

KARPHENGEL: Stroppe vir sand- of gruisbodems

Hengel saam met RIAAN ALLEMAN: Van grasvlaktes tot veranderde water

Binne-in Tom Ebersohn – ‘Die Leeu van Leeuplaas’ – se HENGELKAS

Ons LESERS & JUNIORS spog! • Our READERS & JUNIORS brag!

‘The View on Vaal Resort’ – It should be on your fishing map!

Joining Lines – PART 1

Kleindamplesier, die juweel onder jou neus!

KARPOEWERHENGEL – Die Haarstrop

Light up all ADVENTURES with Camp Master’s String Lights & Lantern!

LONG & SURF CASTING: Part 3

KARPHENGEL: Stroppe vir sand- of gruisbodems

Hengel saam met RIAAN ALLEMAN: Van grasvlaktes tot veranderde water

Binne-in Tom Ebersohn – ‘Die Leeu van Leeuplaas’ – se HENGELKAS

Ons LESERS & JUNIORS spog! • Our READERS & JUNIORS brag!

‘The View on Vaal Resort’ – It should be on your fishing map!

Joining Lines – PART 1

Kleindamplesier, die juweel onder jou neus!

KARPOEWERHENGEL – Die Haarstrop

Sterkfontein Gold: A world-class fishery right in our backyard

R550.00 per year

R55.00 per month

R399.00 per year

R40.00 per month

R399.00 per year

R40.00 per month