RIAAN ALLEMAN: Winterhengel in sy volle glorie

WOORDE: Riaan 'Alleman' Riekert & Tiaan Diederiks | FOTO'S & VIDEO: Chrisjan Stander Riaan Alleman was nog nooit bang vir koud kry nie, maar dan moet jy reg voorberei wees. En dan natuurlik is goeie geselskap, ‘n lekker vuur en ‘n groot vis beslis voordelig om die koue nagte om te kry. Dit is presies wat Riaan Alleman beleef het met sy onlangse besoek aan Motsi Motala by Roodekoppiesdam. Dit was middel Junie en die groot vis het by Roodekoppies geloop, so ek moes eenvoudig net plan maak om ‘n sessie daar te reël. Maar met die veiligheidskwessies by ons damme kon ek dit nie alleen aanpak nie en is ek vergesel deur my neef, Chrisjan Stander, 'n nuweling in spesiekringe, en dan ook die manne van die ‘Rooispan’ wat geen bekendstelling nodig het nie. Die lede van die Rooispan wat my bederf het met hulle teenwoordigheid was Frans Delport (Sloet), Tiaan Diederiks en Ralf Coertze, en al wat ek kan sê is, dit was voorwaar ‘n sessie uit die boeke! Hier is Riaan Alleman se slaapplek vir die naweek. Op die foto kan jy duidelik die alarms sien wat ons gebruik om ongewenste gaste weg te hou. Ongelukkig het dit die norm geword by Roodekoppiesdam. Nie almal doen dit nie, maar ek sit selfs ‘n alarm by my stokke. Ek het onlangs gehoor dat hulle selfs die manne se stokke steel – julle weet wat kos die toerusting. Ons kampplek was goed ingerig vir meer gemak – dit help as mens dieselfde gazebos het. Die sessie het egter nie net gegaan oor die hengel nie, maar ook om bietjie meer te kyk na die toestand van ons damme, veiligheid langs die dam en natuurlik hoe ons winterhengel moet benader om dit so lekker, gemaklik en ook suksesvol moontlik te doen. Ek is baie bekommerd oor die toestand van Roodekoppiesdam en meer spesifiek, die hiasinte en die kwaliteit van die water. Toe ek so drie jaar gelede my eerste sessie by Roodekoppies gehad het, was die hiasinte geen faktor nie en kon ons met gemak hengel. Maar oor die afgelope twee jaar het daardie prentjie heelwat verander en moet mens maar op jou tande kners en planne maak om die hiasinte vry te spring. Op die foto kan die planne gesien word wat ons moes maak om meeste van die hiasinte uit te hou om die sessie te kan geniet. Hier kan julle al die hiasinte teen die oewer sien. As julle mooi kyk sal julle die tou sien wat aan die boom vasgemaak is. Ons plant ‘n pen in die water aan beidekante van die hengelarea en maak dan die tou aan hom vas – dit help om die hiasinte van jou stokke af te hou. Dalk is hierdie die oplossing vir ons hiasinteprobleem. Kyk hoe lekker vreet die beeste aan die hiasinte. Ek wonder tog of daar enige voedingswaarde in die hiasinte is? Wat betref die waterkwaliteit kan ek ‘n boek skryf. Die reuk wat met tye van die water af kom laat ‘n mens omtrent snak na jou asem. Die reuk sê net vir my een ding, en dit is ook nie nuwe nuus nie, dat ons land se rioolstelsel kommerwekkend in groot moeilikheid is. En wat die situasie vererger is die feit dat Roodekoppies laer lê as Hartbeespoortdam en dit verklaar alles met die Krokodilrivier wat vanaf Harties in Roodekoppies invloei. Iewers gaan iemand moet hand opsteek en ‘n plan maak anders gaan ons een van die dae nie meer hierdie pragtige visse kan vang nie. Ek weet van meer as tientalle mense wat sere op hulle voete en enkels opgetel het as gevolg van die swak waterkwaliteit. So asseblief mense, skaf maar eerder ‘n wader aan om siektes te vermy. Winterhengel is vir baie hengelaars uitdagend, maar hier wys Riaan Alleman die koue kan gewen word deur die regte klere te dra. Ons het hierdie Fox thermo-pakkies in Europa aangeskaf en dit was regtig my beste kopie vir die jaar gewees. Winterhengel beteken kleiner ase. Hierdie was die twee ase waarmee ek al my sukses gehad het. Links is een pienk fake maize met een wit pit uit die voer uit en regs is 'n klein, pienk fake maize met ‘n geponsde tigernut onder die mielie. Kyk net daardie mooi prentjie in die water – Riaan Alleman wag om sy eerste vangs te weeg. Dan bring dit my by die volgende kommerwekkende punt, naamlik veiligheid langs die dam. Dis baie hartseer om te sê, maar daar is deesdae amper geen veilige hengelwater meer nie en Roodekoppies is so ‘n stappie bo die res. Maar bygesê, met die regte beplanning kan jy steeds jou hengel geniet. Dit is ongelukkig ‘n feit soos ‘n koei, alleen hengel is taboe – doen dit eerder in groepe. Op die foto's verduidelik ek bietjie meer oor die dinge wat ons in plek gestel het om dit veiliger te maak. Ek moet waarsku, alkoholmisbruik maak jou ook ‘n makliker teiken. Ek sê nie jy moet vrek van die dors nie, maar hou maar matigheid voor oë – die kriminele slaan toe op jou in die oggendure wanneer jy in daardie lekker diep slaap verkeer. Maar met hierdie negatiewe dinge agter my, kom ek vertel meer van ons naweek en die pragtige karpe wat ons geland het. Die Rooispan was bevoorreg om ‘n dag of twee vroeër af te gaan water toe en hulle kon darem vir ons plek hou. Omdat die vis tans so mooi loop, is die oewer elke naweek propvol hengelaars om daardie groot karpe te teiken. Net om die prentjie bietjie in te kleur – in die voorafgaande drie weke van ons besoek het talle karpe uitgekom wat die skaal laat kreun het aan die verkeerde kant van 20kg en dit is wat ons ook na die oewer gelok het. Die dag voor my en Chrisjan se aankoms, het die Rooispan reeds gespog met twee vis wat die skaal laat kreun het bo 16kg en ons was opgewonde om lyne in die water te kry. Tiaan het hierdie monster geland die dag voor ons aankoms. Tiaan spog met een van die vele mooi karpe wat ons geland het. Frans spog met een van sy eerste busse. Ek en Chrisjan het op ‘n lekker koel Vrydagoggend vinnig werk gemaak om ons kamp op te slaan terwyl die voer lekker in die pot geprut het. Op hierdie punt onthou gerus dat met winterhengel maak ons nie groot voerkolle nie – jy maak slegs gebruik van ‘n klein mouse trap, soos dit in spesieterme bekend staan. Natuurlik tussen die opslaan deur kon ons lekker gesels met die Rooispan en hulle het solank met ons waterdieptes en taktiek bespreek. Hierdie jaar is anders as ander jare, gewoonlik in die winter maak jy gebruik van die dieper water om daardie busse te teiken, maar dié jaar is dit egter ‘n perd van ‘n ander kleur. Ek en Chrisjan het besluit om elkeen net met twee stokke te hengel om die druk bietjie te verminder, aangesien daar reeds so baie lyne in die water was. Ongelukkig was Chrisjan beperk op afstand en kon hy net tot op 500m hengel. Ek was egter bevoorreg om aan die oorkant tussen die gras te kon hengel op ‘n afstand van bykans 800m. Ons het eerstens ons merkpale gaan uitsit wat elkeen ook ‘n liggie op het wat dit makliker maak om in die aand te sien as jy moet vis land en lyne invat. Frans het sommer windgat geraak en vier karpe op een aand geland – almal was in daardie oorkantste 4m water geflous. Wat ‘n voorreg – die prag visse wag vir die fotosessie! Met alles in plek was dit tyd om daardie eerste lyne in te vat. Met Chrisjan se tekort aan afstand het ons sy een stok gaan plaas op 5m water waar ons baie struktuur kon kry en sy tweede stok was op die kant van die rivierloop in bykans 9m water. My twee stokke het ek dadelik oorgevat na die gras-areas wat gewissel het van 3-4m water. Aand een het egter geen vis by ons of die Rooispan opgelewer nie maar daar was geen tekort aan ‘n lekker vuur en lekker stories nie. Dit het my tyd gegee om die manne beter te leer ken en glo my as ek sê, die manne praat nie net nie, hulle kén van hengel! Hier is so paar titels wat die Rooispan oor die laaste paar jaar verwerf het: Gys Pitzer Business Classic – Algeheel 1ste plek. FK 6 – Grootste karp vir die toernooi. FK 8 – Grootste karp vir die toernooi. FK 9 – Algeheel eerste met swaarste sak. Hulle het in 10 maande bykans R250 000 in prysgeld gewen, so ja mense, hulle kan vis! Op oggend twee het Alleman wakker geword met musiek in sy ore. Daar was een biep op my Fox-alarm. Ek hengel met monolyn en op die 800m afstand is die een biep gewoonlik al wat mens gaan kry as gevolg van die rekbaarheid van mono. Ek het besluit om ‘n kans te vat en te gaan ondersoek instel – dankie tog ek het die skepnet saamgevat want my gevoel was in die kol. Met my aankoms waar ek my lyn geplaas het, het ek dadelik opgetel my lyn is 20m na regs en ek het geweet die geveg gaan nou begin. Die karp het Alleman lekker besig gehou en sowat 15min later het ek ‘n pragvis van oor die 15kg geland, so my naweek was sommer reeds gemaak! En daar is hy! Kyk net daardie prag vis – die ys is gebreek en my naweek is sommer klaar gemaak. Waterfoto's is altyd baie spesiaal en Alleman se opblaasboot het die perfekte foto verseker. Hierdie drywende landingsmat geborg deur Tackle Cabin is ‘n moet vir elke hengelaar. Hier is so paar wenke as mens lang afstand hengel: As jy monolyn hengel moet jy besef die lyn rek baie op so lang afstand, so moenie verwag dat die vis gaan gryp en hardloop nie. As jy jou lyn gaan uithaal om vars aas op te sit, vat maar altyd ‘n skepnet saam – mens weet nooit wat wag aan die anderkant nie. Maak ook seker jy het altyd ‘n nuwe rig met aas op die boot, dan kan jy sommer na jy die vis geland het, dadelik weer jou aas plaas. 800m is ver en mens wil nie te veel heen en weer ry nie. Ook nog so stukkie raad – maak gebruik van back leads oor die afstand om lyndruk te verminder. Jy wil nie ‘n onderwater wasgoedlyn span om die karpe weg te skrik nie. Ek sal gewoonlik twee opsit so 200m uitmekaar om seker te maak my lyn lê mooi op die bodem. Met my aankoms op die oewer het daar groot opgewondenheid geheers oor die mooi vis en almal was sommer positief. Wat sou volg vir die res van die dag was absoluut pandemonium! Ons het in daardie vlak water aan die oorkant die een groot vis na die ander geland. Rooispan het ook besluit om daardie area te teiken en veral Frans was baie suksesvol. Frans het op aand nommer twee baie mooi vis geland en kon skaars ‘n oog toemaak, maar glo my dit was die wakker bly werd. Hier is so bietjie raad vir naghengel: Maak seker jy het eerstens ‘n baie goeie kopliggie anders gaan jy sake vir jouself baie moeilik maak daar buite. In die aand moet jy verkieslik nie alleen op die boot uitgaan nie. Maak ook seker as jy uitgaan in die aand dat 'n hengelmaat ook op die oewer is – dit is die skelms se gunsteling tyd om hulself te help as almal op die boot uit is. Maak ook seker jy het beligting op die oewer – in die aand kan mens lekker deurmekaar raak as jy nie weet waar jou kamp is nie. En seker die heel belangrikste, dra jou reddingsbaadjie! Ja-nee kyk, Frans was omtrent in die vis! Hier spog hy weer met ‘n lekker vettie. Frans, stop dit nou! Ons almal weet jy kan hengel – gee die ander manne ook ‘n kans. Met ‘n baie suksesvolle aand twee agter die rug, het die laaste oggend aangebreek, en wat ‘n oggend sou dit nie wees nie. Chrisjan het die voorreg gehad om sy eerste vis op ‘n boot te land en so ook sy eerste Roodekoppies vis – toe kon ons net na vele meer uitsien – hou so aan, aanhouer wen! Dit was ongelukkig tyd vir oppak, maar glo my as ek sê daar was nie tyd om te pak nie. Met elke lyn wat ek in die water geplaas het, was daar 20 minute later aksie; ons het die een mooi vis na die ander geland. En daar is hy nou. Ralf het darem ook ‘n kans gekry om ‘n bitter mooi vis te land. Ongelukkig moes ons egter besluit om die stokke uit te hou om gepak te word – dit was immers Vadersdag en ek moes by die seuns uitkom. Dit was werklik ‘n sessie vir die boeke en ek wil net baie dankie sê vir Frans en sy troepe – dit was voorwaar vet pret. Hou die Rooispan dop, hulle gaan nog meer diep spore trap! Maar ja, so kom alle goeie dinge tot op ‘n einde en soos ek altyd sê: "Waar is dit lekker? Hier is dit lekker!!" 'n Laaste paar wenke: Maak gebruik van kleiner aas in die winter – die visse eet nie so aktief soos in die somermaande nie. Wanneer jy voer maak slegs gebruik van 'n mouse trap – dit help nie jy gooi 200kg in die dam nie, die visse gaan nooit by jou aas uitkom nie. Gaan hengel in groepe, dit is net vir jou eie veiligheid. Sluit alle waardevolle besittings eerder in jou kar toe – op die stadium breek hulle nie by voertuie in nie. Maak seker jy het lekker lang toue en lang penne om lyne te span om die hiasinte uit te hou. Skaf vir jouself ‘n ordentlike wader aan, anders mag jy dalk met ‘n paar siektes huis toe gaan. Kry ook vir jou alarms om om jou tent te span. Takealot verkoop dit in pare van vier en hulle herlaai deur die dag in die son. Moenie bang wees om die vlakker water te teiken nie – mens weet nooit waar wei die visse nie. Maak ook seker jy is reg opgestel om daardie langer afstande te kan hengel. En dan laastens vir die winter – maak seker jy het genoeg hout en warm klere, en helaas, lekker Old Brown-sjerrie om jou van binne warm te hou!

RIAAN ALLEMAN: Winterhengel in sy volle glorie

en die Rooispan by Roodekoppies

KEEP FISHING ALIVE: If you like our work support For Anglers’ journalism with a digital membership!

Premium Digital

Read Next

Suid-Afrikaanse Gunstelingvliegies – Die Walker’s Killer

Chasing Bass Giants

SPECIMEN FISHING: Understanding Carp Feeding In Winter, Part 2

KUNSAAS-AVONTUUR: My droomvis uit Loskopdam

RIAAN ALLEMAN neem deel aan die BIG FISH CHALLENGE 2025

STRANDHENGEL: Droom Kabeljou By Gamtoos

AN ANGLING LIFE: Modern Ski-Boat Beach Launching

FLOAT TUBE and KICKBOAT BASSING: The Optimal Topwaters To Fish When Seated In A Tube

Stywe Lyne Tight Lines JUNIORS: July 2025 Issue 785

Stywe Lyne Tight Lines LESERS READERS: July 2025 Issue 785

Suid-Afrikaanse Gunstelingvliegies – Die Walker’s Killer

Chasing Bass Giants

SPECIMEN FISHING: Understanding Carp Feeding In Winter, Part 2

KUNSAAS-AVONTUUR: My droomvis uit Loskopdam

RIAAN ALLEMAN neem deel aan die BIG FISH CHALLENGE 2025

STRANDHENGEL: Droom Kabeljou By Gamtoos

AN ANGLING LIFE: Modern Ski-Boat Beach Launching

FLOAT TUBE and KICKBOAT BASSING: The Optimal Topwaters To Fish When Seated In A Tube

Stywe Lyne Tight Lines JUNIORS: July 2025 Issue 785

Stywe Lyne Tight Lines LESERS READERS: July 2025 Issue 785

Suid-Afrikaanse Gunstelingvliegies – Die Walker’s Killer

PRIM & PROPER … Namibië in AKSIE – Deel 4

Bloemhof Dam’s three kurper species

R550.00 per year

R55.00 per month

R399.00 per year

R40.00 per month

R399.00 per year

R40.00 per month