Wanneer die land weer oop is vir hengel… Olifantsrivier Hengel

Jan van Schendel, die nasionale afrigter van Holland se hengelspanne, wenner van vele medaljes, lid van FIPS se tegniese kommitee, entrepreneur en adviseur by een van die wêreld se grootste lokaas maatskappye, Marcel van den Eynde, het vir ons kom kuier in Suid-Afrika. Op uitnodiging van SAVOF en onder leiding van die Protea Feederspan se afrigter Gys van der Westhuizen, het Jan, een van die mees ervare hengelafrigters ter wêreld met baie spanmedaljes agter sy naam, ‘n week of twee in Suid-Afrika kom spandeer. Hoofsaaklik was die doel om sy kennis en ervaring met Match- en Feederhengelaars te kom deel. Oor die bestek van twee naweke het hy beide groepe toegespreek en persoonlik bygestaan met raad en gehelp met die fynere insigte. Jan van Schendel Ons het die voorreg gehad om saam met hom vir ‘n dag by ‘n pragtige oord op die Olifantsrivier aan die bo-lope van die Arabiedam, Kubu Kwena, net buite Marble Hall te spandeer. Daar aangekom was Jan heel oorstelp met die natuurskoon en die ware prag van Suid-Afrikaanse toestande. Die oordbestuur het in voorbereiding van ons aankoms die oewer mooi toeganklik gemaak en meer hengelplek langs die water oopgekap. Ons kon toe heel gepas vier seatboxes en nog ‘n stokstaander inpas en vyfstuks gemaklik hengel. Hengelaars op alle vlakke van Feeder en Matchhengel het baat gevind by sy uiters insiggewende werkswinkels. Jan het ‘n plek gekies reg in die middel en kon gemaklik naby genoeg aan die water sit sonder om skrikkerig te voel vir die “plat honde” wat daar rondswem. Hy het begin deur die waterdiepte te toets en te voel wat op die bodem aangaan, en toe besluit op ‘n kol sowat 10 meter van die oorkantste oewer af en ‘n paar feeders vol voer met wurms en pitte in gegooi. Hy het ook ‘n klompie dooie maaiers in die voer geplaas. Dit het ‘n geruime tyd geneem en ‘n paar indikasies is daar opgemerk, maar eintlik verbasend min visaktiwiteit. Eers na sowat ‘n anderhalf uur het hy die eerste vis aan wal gekry, ‘n baber (“Meerval” in Hollands) van so ‘n kilo of wat. Jan se aas en feederkeuses vir die dag.Twee voere, Active en Gold Medal om twee kolle te teiken. Intussen het ek ook die anderkantste wal geteiken, maar effens nader, so 4 meter kort en heelwat pitte daar gevoer, aangesien ek daar karpe sien draai het. Ek het die kol laat rus en eers hier vlak voor my op die uitswaai gehengel. Die klein kurpers het fluks gebyt en selfs ‘n groter bloue en ‘n paar mooi rooiborse het kom aansit. Na ‘n uur of wat se hengel het ek die oorkantste kol begin teiken en binne die eerste kwartier ‘n mooi karp aan die lyn gekry. ‘n Mooi oewer en ek, Gys en Jan kon sommer so bymekaar hengel. Die eerste vis van die dag, ‘n jong baber – “Meerval” in Hollands! Die rivier is vol waterskilpaaie en tussen Jan en myself het ons 4 van hulle aan die lyn gehad. Hierdie een het ons geskep en uitgehaal om vir die kamera te wys hoe hulle lyk. Die byttempo was nie verskriklik vinnig nie en beide Jan en myself het een stok daar agter gegooi en met die ander een hier voor rondgespeel met die klein vis, of so het ons gereken. Op ‘n stadium het die diep stok mooi gebuig en so met die vasslaan saam vlieg die een hier vlak voor ook weg dat jy net katrol hoor skree – nou ja, met twee visse aan die lyn is dit maar altyd bietjie konsternasie, maar Neville Foord was vinnig by om ‘n hand by te sit. Ek en Jan het ook nog ‘n mooi karp of twee daar binne gevang asook ‘n paar klein kurpers hier teen die kant. Op ‘n stadium raak die byte skielik stil en ek slaan so ‘n stadige trek-byt vas en dit voel eers of ek vashaak, maar die vashaak begin stadig te swem. Tot my verbasing kom daar ewe skielik so ‘n ronde figuur met pote uit die diepte op – ‘n tamaai waterskilpad wat sekerlik die skaal naby die 10kg sou trek! Deur die loop van die middag vang ek nog een en Jan twee. Dis nogal ‘n gedoente om die ding geskep te kry en sy pote en snawel is maar skerp. Die maklikste was maar net om die hoeklyn te breek as hy hier by die kant is. Die hoeke is klein en die lyn maar dun en dit sou geen negatiewe effek hê nie. Die mooi karpe het teen die kante gewei, duskant en oorkant. So loop die dag op ‘n einde, met ‘n klompie mooi visse in die paar ure wat ons gehengel het. Jan was heel tevrede en die feit dat die krokodille so naby aan ons verby geswem het, was vir hom nogal ‘n ervaring! Ons het die aand oorgebly en die volgende oggend is ons vroeg weg vir die Feeder Fish-off. Jan en Gys het ontbyt geniet by die oord se restaurant en is deur die seekoeie getrakteer met ‘n sierlike verbyswem en selfs ‘n paar toertjies en ‘n gebaljaar. Jan reken dat dit vir hom ‘n ongelooflike ervaring was en van al sy menige wêreldreise, was hierdie een van die “most precious”! Twee mooi visse terselfdetyd sorg vir konsternasie, en hulle is werklik sterk swemmers. Die rivier het mooi kurpers, maar hulle is temperamenteel en as hulle nie aan die byt is nie, verg dit ‘n fyner benadering om hulle gevang te kry. Neville het ‘n pragbaars van meer as twee kilos aangehad wat sy #16 hoekie met twee maaiers hier vlak tussen die kurpers gegryp het. Die hoeklyntjie was egter nie bestand teen die klippe naby die kant nie en die vis is weg met hoek en al. Hierdie baars het hy met ‘n spinnerbait aangekeer. Ons het nog ‘n paar gevang en kon sien dat daar groot baars moet wees en as hierdie deel van die rivier met ‘n boot aangedurf word, gaan daar beslis grotes aangekeer word. In die kort rukkie wat ons daar gehengel het, was ons redelik suksesvol en het ‘n paar mooi visse aangekeer. KUBU KWENA Kubu Kwena, wat beteken ‘Seekoei’ en ‘Krokodil’, is geleë net sowat 10km buite Marble Hall op die Groblersdalpad, op die walle van die Olifantsrivier. Die oord het uitstekende selfsorg oornag geriewe - en-suite grasdak hout chalets en houthuisies met ten volle toegeruste kombuise en badkamers en ook met lugversorgers toegerus; ook ‘n pragtige restaurant met ‘n gelisensieerde kroeg wat vanuit die dek oor die rivier uitkyk. Hulle kos is heerlik en ook teen ‘n uitstekende prys aangebied. Die seekoeie het ook kom kuier. Die oord is veilig (behalwe as jy graag in die rivier wou swem!) met ‘n elektriese omheining toegemaak en beskik ook oor ‘n klompie kleinwild. Daar is ‘n vlotboot en die oord se “sunset cruise” is natuurlik baie gewild. Daar is genoeg hengelplek, maar die walle is maar hoog, maak voorsiening vir ‘n lang skepnetpaal. Tariewe is baie billik en bespreking kan gedoen word by 076 123 5402. ‘n Regte Afrika ervaring.