Rooineus Muddies in Loskopdam

As jy gedink het die Vaalrivier-Muddie kan ‘n geveg op sit, moet jy nie verbaas wees as die Rooineus-Muddie (Labeo rosae) jou aas optel nie! Hierdie is die “V6” vegters wat aangedryf word deur fris stertspiere – maak vas jou sitplekgordel! Johan Marx besoek Loskopdam en verskaf al die nodige inligting. Vind hier uit: Watter ase vir die rooineuse gebruik kan word.Watter grondvoer geskik is.Watter waterdiepte deur die rooineuse verkies word.Hoe om die bodem te karteer en meer suksesvol te wees. Die dam is gebou in die Olifantsrivier in die pragtige Laeveld natuurskoon wat beslis anders is as waaraan ons op die Hoëveld gewoond is. Loskop spog met ‘n groot verskeidenheid spesies waaronder karp, rooineus-moddervis, blou-en-rooiborskurper, grootskub geelvis, baber en swartbaars die gewildste teikenspesies is. Die Teikenspesie – Rooineus- Muddies! Ek sien al lank uit na hierdie sessies in die Laeveld op soek na een van die mees aggressiewe varswater vegters op ligtegerei. Ek hoor van Rooineuse wat hierdie waters deurkruis wat die skaal gemaklik op 2kg en self meer kan laat bewe! ‘n Twee-kilogram Muddie? Nog nooit gesien nie! Maar menige bevestigings het ek reeds van hierdie feit gekry. Die Rooineus-Muddie het sy ongelooflike veg-eienskap en gees te danke aan ‘n breë stertstam met uitmuntende sterk stertspiere. Dit alles is afgerond deur ‘n breë stert wat die water in ‘n jap-trap kan verplaas om sodoende sy vaartbelynde, blink-silwer lyf deur die water kan laat klief soos ‘n warm mes deur botter! Diè muddie het ‘n kenmerkende rooierige neus wat lyk soos ‘n klomp klein rooi kolletjies wat dig teen mekaar gegroepeer is. In teenstelling met die Vaalrivier-Muddie het die rooineus eintlik ‘n groterige kop wat meer by sy liggaam aangepas is. Die kenmerkende muddie-bek wat na onder as t’ware uitstulp herhinder in ‘n groot mate aan sy neefs wat in die Vaalsisteem voorkom. ‘n Verdere teenstelling met die Vaalrivier-muddie is dat die Rooineus ‘n blink lyf het. Uit-en-uit ‘n pragtige inheemse varswater vis wat menige hengelaars al ure se genot verskaf het. Ase So ry ek nogal ewe ‘n standaard 1kg sak rooiwurms saam na ons sessie. Groot was my teleurstelling toe ek uitgevind het dat hierdie muddies nie eintlik op wurms gevang word nie. Baie ongelowig en huiwerend het ek maar die wurmsak eenkant toe geskuif, maar ek moes net ‘n wurm op die hoek probeer, maar soos ek meegedeel is, sonder sukses. Nee, die rooineuse is heel gelukkig met ‘n degie, sagte witbrood pappie en selfs ‘n sagte floatie op die hoek. Geure wat tradisioneel goeie resultate hier by Loskop lewer is meeste vrugtegeure soos perske, piesang, aarbei en ‘passion fruit’, maar geure soos heuning en musk moet ook nie vergeet word nie. Grondvoer Voorkeur Wat my grondvoer keuse vir Loskop betref het ek steeds my hoogs suksesvolle muddievoer gebruik met die tradisionele aarbei en molasse stroop in die voer gemeng – dis maar ‘n feit dat geen muddie, Rooineus of Vaalrivier, hierdie kombinasie kan weerstaan nie. Dit is belangrik dat jy goenoeg tyd toelaat dat die grondvoer water kan absorbeer sodat jy kan verseker dat die voer onaktief op die bodem sal wees – ‘n voer wat te vinnig gebruik word nadat dit gemeng is mag net té aktief wees en dit mag die vis van jou kol af wegvat met al die drywende partikels. Omdat die muddies in hierdie waters meer gefokus is op ‘n degie, word ‘n “kombersie” - ‘n deegie wat om die hoekaas gevou word – altyd gebruik. Maak dit eers die oggend as jy by die water kom en nie die aand voor die sessie nie. Verder is dit belangrik om nie die kombersie te dun of loperig te maak nie. Nee, jy wil juis ‘n dikkerige deeg pasta hê wat op die aas en voerbol kan vassit tot op die bodem waar die rooineus dit kan bykom. Watter waterdiepte? Die rooineuse is nie bang vir diep water nie. Ek verstaan dat die manne wat hulle van die bote af teiken, selfs water van tot 5 meter diep soek. Dit is dus belangrik om die regte waterdiepte te soek. Hengel eerder moontlik ‘n bietjie verder, maar kry die regte waterdiepte en jy sal mildelik beloon word. Die Rooineuse hou verder daarvan om op sanderige/gruis bodems te voer. Hierdie tipe bodems kan maklik opgespoor word deur na die gewig op die strop te kyk: wanneer daar modder op die bodem is sal daar gewoonlik ‘n bietjie op die gewig vassit. ‘n Skoon gewig beteken ‘n “skoon” sanderige bodem. Die Sessie Is dit nie snaaks hoe ons altyd in afwagting is op daardie eerste byt of skree van die katrol tydens elke sessie nie? Dit is asof dit elke keer 'n nuwe ervaring is, maar tog ken ons dit al te goed. Nou ja, dis was presies só gewees - na 15 minute na die aas die water getref het, het die katrol verwoed geskree - die poeliesman op die lyn niks te wagte! Kort daarna is dit weer so maar dit was nie rooineuse nie, maar Grootskub-geles. Die eerste Rooineus is kort daarna gevang en boonop nogal nie 'n kleintjie nie - die skaal was maklik oor die 1,2kg getrek! Daar is vis op ons kol, want nes die aas op die bodem gaan lê verklik die poeliesman hul teenwoordigheid. Ek vermoed dis van die kleiner rooiborskurpers wat toe later in die sessie gevang is. Toe die rooineuse die rooiborse van die kol verwilder en my deeg hoekaas gryp, tel die sessie spoed op en word die visse bymekaar gemaak - rooineuse, grootskub-geles, klein karpe en rooiborskurpers. Teen 12:00 het die Laeveldson nou al die vlakker water lekker warm gebak - die water teen die kant voel amper lou en ek vermoed die rooineuse voel dit ook aangesien die byttempo al stadiger word en baie hard gewerk moet word om die vistelling aan die beweeg te hou. Omstreeks 14:00 word halt geroep om darem nie te laat by die huis te kom nie. 'n Suksesvolle eerste rooineussessie word afgesluit met 'n paar fotos.